ޔޫކްރެއިން އަށް 90 ބިލިއަން ޔޫރޯގެ ލޯނު ދިނުން ތަންފީޒު ކުރުމަށް މެކްރޮން ގޮވާލައްވައިފި

ޔޫކްރެއިން އަށް 90 ބިލިއަން ޔޫރޯގެ ލޯނު ދިނުމަށް ޔޫރަޕިއަން ޔޫނިއަން އިން ނިންމާފައިވާ ނިންމުން ތަންފީޒު ކުރުމަށް، ފްރާންސްގެ ރައީސް އިމަނުއެލް މެކްރޮން ގޮވާލައްވައިފި އެވެ. 

ހުކުރު ދުވަހު މެކްރޮން ގޮވާލައްވާފައި ވަނީ ޔޫކްރެއިން އަށް ދޭން ޖެހޭ ސަޕޯޓު އެންމެ މަތީ ފަންތީގައި ދިނުމަށާއި، ޔޫރަޕުގެ އަމިއްލަ ސަލާމަތާއި ރައްކާތެރިކަން ވަރުގަދަ ކުރުމަށް ކުރަން ޖެހޭ ކަންކަން ކުރުމަށެވެ. 

ޔޫކްރެއިން އަށް 90 ބިލިއަން ޔޫރޯގެ ލޯނެއް ދިނުމަށް އީޔޫ އިން ނިންމާފައި ވަނީ 2025 ވަަނަ އަހަރުގެ ޑިސެމްބަރު މަހުގެ ތެރޭގަ އެވެ. މެކްރޮން ވަނީ އެ ނިންމުމާ އެއް ގޮތަށް، އެކަން ތަންފީޒު ކުރުމަށް ގޮވާލައްވައިފަ އެވެ. މެކްރޮން ވިދާޅުވެފައި ވަނީ، އެއީ ޤައުމު ތަކުގެ ވެރިން ނިންމަވާފައި ނިންމުމެއް ކަމަށާއި، އެކަން ތަންފީޒު ކުރެވެން ޖެހޭ ކަމަށެވެ. 

މީގެ އިތުރުން މެކްރޮން ވިދާޅުވީ، އެ މައްސަލައިގައި ހަންގޭރީގެ ބޮޑު ވަޒީރު ވިކްޓާ އޯބަން އާއެކު މަސައްކަތް ކުރައްވަމުން ގެންދަވާ ކަމަަށެވެ. އެގޮތުން ކޮންމެ ފަހަރަކު ވެސް އޯބަންއާ މަޝްވަރާ ކުރައްވާ ކަމަށާއި، ޔޫކްރެއިން އަށް ބޭނުންވާ ސަޕޯޓު ދިނުމުގައި ކުރިއަށް ދިޔުމަށް ބޭނުންވާ ކަމަށް ވެސް މެކްރޮން ވަނީ ވިދާޅުވެފަ އެވެ. 

މެކްރޮން ވަނީ ޔޫކްރެއިން އަށް ދޭ ސަޕޯޓާ ގުޅުވައިގެން ޔޫރަޕިއަން ޔޫނިއަންގައި ދިފާއީ އުފެއްދުންތައް އިތުރު ކުރުމުގެ ވާހަކަ ވެސް ދައްކަވައިފަ އެވެ. އެގޮތުން މެކްރޮން ވިދާޅުވީ ހަތިޔާރު އުފެއްދުމުގެ ޤާބިލުކަން ވަރުގަދަ ކުރަން ޖެހޭ ކަމަށާއި، އެއީ ގިނަ ދުވަސް ތަކެއް ވަންދެން ވަކާލާތު ކުރަމުން އައި ކަމެއް ކަމަށެވެ. އެމެރިކާގެ ސަލާމަތަށާއި، ޔޫކްރެއިން އަށްޓަކައި މިހާރުގެ ޙާލަތުގައި ޔޫރަޕުގެ އުފެއްދުންތައް އިތުރު ކުރަން ޖެހޭ ކަމަށް ވެސް މެކްރޮން ވިދާޅުވި އެވެ. 

ހުކުރު ދުވަހު ޔޫރަޕިއަން ކައުންސިލްގެ ރައީސް އެންޓޯނިއޯ ކޮސްޓާ ވިދާޅުވެފައި ވަނީ، ބުރާސްފަތި ދުވަހުގެ ސަމިޓުގައި ޔޫރަޕިއަން ޔޫނިއަންގެ ލީޑަރުން ވަނީ، ޔޫކްރެއިން އަށް 90 ބިލިއަން ޔޫރޯގެ ލޯނު ދިނުމަށް ހުރަސް އަޅަމުން އަންނަ ހަންގޭރީގެ ބޮޑު ވަޒީރު އޯބަންގެ އަމަލުތައް ކުށްވެރި ކުރައްވާފައި ކަމަށެވެ. 

އޯބަން ވަނީ ދުރުޒްބާ ޕައިޕްލައިން މެދުވެރިކޮށް ތެލުގެ ސަޕްލައި އަލުން ފެށުމާ ހަމައަށް ޔޫކްރެއިން އަށް ފައިދާހުރި ކޮންމެ ނިންމުމަކަށް ސަޕޯޓު ނުކުރައްވާނެ ކަމަށް އަލުން ވިދާޅުވެފަ އެވެ.