ހަމައެކަނި ބޮން އަޅައިގެން އީރާންގެ ވެރިކަމަށް ބަދަލެއް ނުގެނެވޭނެ: ފްރާންސްގެ ރައީސް މެކްރޮން

އެމެރިކާ އާއި އިޒްރޭލް އިން އީރާންއާ ދެކޮޅަށް ވަރުގަދަ ހަނގުރާމައެއް ކުރަމުން އަންނައިރު، ހަމައެކަނި ބޮން އަޅައިގެން އީރާންގެ ވެރިކަމަށް ބަދަލެއް ނުގެނެވޭނެ ކަމަށް، ފްރާންސްގެ ރައީސް އިމަނުއެލް މެކްރޮން ވިދާޅުވެއްޖެ އެވެ. 

ހޯމަ ދުވަހު މެކްރޮން މިހެން ވިދާޅުވެފައި ވަނީ މެޑިޓެރޭނިއަން ކަނޑުގައި އޮތް ފްރާންސްގެ ޗާލްސް ޑި ގޯލް، މަތިންދާބޯޓު އުފުލާ މަނަވަރަށް ކުރެއްވި ޒިޔާރަތުގެ ތެރެއިންނެވެ. އެގޮތުން މެކްރޮން ވިދާޅުވީ، މެދު އިރުމަތީގައި މިހާރު ހިނގަމުން އަންނަ ހަނގުރާމަ އަދި ވެސް އެތައް ހަފުތާ އަކަށް ދެމިގެން ހިނގައި ދާނެ ކަމަށެވެ. 

މީގެ އިތުރުން މެކްރޮން ވިދާޅުވީ އީރާންގެ ސިޔާސީ ނިޒާމަށް ނުވަތަ، އެ ޤައުމުގެ ވެރި ކަމަށް ބޮޑެތި ބަދަލު ތަކެއް ގެނައުމަކީ ހަމައެކަނި ބޮން އަޅައިގެން ޙާސިލު ވާނެ ކަމެއް ކަމަށް ޤަބޫލު ނުކުރައްވާ ކަމަށެވެ. މިދިޔަ ފެބްރުވަރީ މަހުގެ 28 ވަނަ ދުވަހު އެމެރިކާ އާއި އިޒްރޭލް އިން އީރާން އަށް ހަމަލާ ދިނުމުގެ ސަބަބުން ފެށުނު މި ހަނގުރާމައިގެ އެންމެ ވަރުގަދަ މަރުހަލާ އަދި ވެސް ދުވަސް ތަކަކަށް، ނުވަތަ ހަފުތާ ތަކަކަށް ދެމިގެން ދާނެ ކަމަށް މެކްރޮން ވަނީ ލަފާ ކުރައްވައިފަ އެވެ.

އެމެރިކާ އާއި އިޒްރޭލްގެ ސަބަބުން ފެށުނު މި ހަނގުރާމައާ ގުޅިގެން، މެދު އިރުމަތީގައި ހާސްކަމާއި ނުތަނަވަސްކަން ބޮޑުވެފައިވާއިރު، މިއީ އެހެން ސަރަހައްދު ތަކަށް ފެތުރިގެން ގޮސްދާނެ ބިރުވެރި ކަމެއް ކަމަށް ވެސް މެކްރޮން ފާހަގަ ކުރެއްވި އެވެ. 

މީގެ އިތުރުން މެކްރޮން ވިދާޅުވީ، މި ހަނގުރާމަ ދެ ވަނަ ހަފުތާ އަށް ގޮސްފައިވާއިރު، ބައިނަލްއަޤުވާމީ ވިޔަފާރީގެ މުހިންމު ތަނެއް ކަމަށްވާ ހޮރުމޯޒް ކަނޑު އޮޅި އަލުން ހުޅުވުމަށް ފްރާންސް އާއި، ބައިވެރިން ގުޅިގެން ދިފާއީ މިޝަނެއް ތައްޔާރު ކުރަމުންދާ ކަމަށެވެ. މެކްރޮން ވިދާޅުވީ، އެ މިޝަންގެ ބޭނުމަކީ ހަނގުރާމައިގެ އެންމެ ނުރައްކާތެރި މަރުހަލާ ނިމުމުން، މުދާ އުފުލާ ބޯޓު ފަހަރާއި، ތެޔޮ ޓޭންކަރު ތަކަށް ސަލާމަތްތެރިކަން ފޯރުކޮށްދީ އަދި ކަނޑު އޮޅި އަލުން ހުޅުުވުން ކަމަށެވެ. 

އެ މިޝަންއާ ގުޅޭ ގޮތުން މެކްރޮން ވިދާޅުވީ އެއީ ޔޫރަޕުގެ ޤައުމުތަކާއި، ޔޫރަޕުން ބޭރުގެ ޤައުމުތައް ގުޅިގެން ހިންގާ ހަމައެކަނި ދިފާއީ، އަދި އެހީތެރިކަން ފޯރުކޮށްދިނުމުގެ މަސައްކަތެއް ކަމަށެވެ. މީގެ އިތުރުން، މެދު އިރުމަތީގެ ކަނޑުގެ ދަތުރު ފަތުރުގެ ރައްކާތެރިކަން ކަށަވަރު ކުރުމަށް ހިންގާ އޮޕަރޭޝަންތައް ވަރުގަދަ ކުރުމަށް ތައްޔާރަށް އޮތް ކަމަށް، އދ. އިން ވެސް ވަނީ ހޯމަ ދުވަހު ހާާމަ ކޮށްފަ އެވެ. 

މެދު އިރުމަތީގެ ހަމަލާތަކާ ގުޅިގެން ފްރާންސް އިން ވަނީ ޗާލްސް ޑި ގޯލް މަނަވަަރުގެ އިތުރުން، ފްރިގޭޓް މަނަވަރަކާއި، އަދި ވައިގެ ދިފާއީ ނިޒާމުތައް ސައިޕްރަސް އަށް ފޮނުވައިފަ އެވެ. ފްރާންސް އިން ބުނާ ގޮތުގައި އެ ޤައުމުގެ މި ޙަރަކާތަކީ ހަަަމައެކަނި ދިފާއީ މަޤުސަދުގައި ކުރާ ކން ކަމެވެ. މި އޮޕަރޭޝަންގައި އަށް ފްރިގޭޓް މަނަވަރުގެ އިތުރުން، ހެލިކޮޕްޓަރު އުފުލާ ދެ މަނަވަރު ބޭނުން ކުރާނެ އެވެ. 

ހޯމަ ދުވަހު މެކްރޮން ވަނީ، އިޒްރޭލްގެ ބޮޑު ވަޒީރު ބެންޖަމިން ނަތަންޔާހޫއާ ފޯނުން ގުޅުއްވައި، މެދު އިރުމަތީގެ މަސްރަހު އަދި ލުބުނާންގެ މަސްރަހާ ގުޅޭ ގޮތުން ވެސް މަޝްވަރާ ކުރައްވައިފަ އެވެ.