ޓްރަމްޕްގެ ގޮވާލުމަށް ފުރަގަސްދީ، ހޮރްމޫޒް ހުޅުވުމުގެ އަސްކަރީ އޮަޕަރޭޝަންގައި ފްރާންސް ބައިވެރި ނުވާނެ ކަމަށް މެކްރޮން ވިދާޅުވެއްޖެ

މެދު އިރުމަތީގައި މިހާރު ހިނގަމުންދާ ހަމަނުޖެހުން ތަކުގެ ތެރޭގައި، ހޮރްމޫޒް ކަނޑު އޮޅި ހުޅުވުމަށް ހިންގާ އެއްވެސް އަސްކަރީ އޮޕަރޭޝަނެއްގައި ފްރާންސް އިން ބައިވެރި ނުވާނެ ކަމަށް، އެ ޤައުމުގެ ރައީސް އިމަނުއެލް މެކްރޮން ވިދާޅުވެއްޖެ އެވެ. 

އަންގާރަ ދުވަހު އޮތް ކެބިނެޓުގެ ބައްދަލުވުމުގައި މެކްރޮން މިހެން ވިދާޅުވީ، ހޮރްމޫޒް ކަނޑު އޮޅި ހުޅުވުމަށް އެމެރިކާ އިން އިސްނަގައިގެން ކުރިއަށް ގެންދާ މަސައްކަތް ތަކުގައި ފްރާންސް އިން އެހީތެރިވާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެފައިވާ ވާހަކަ އަށް ރަައްދު ދެއްވަމުންނެވެ. 

ހޯމަ ދުވަހު ޓްރަމްޕް ވިދާޅުވެފައި ވަނީ ހޮރްމޫޒް ކަނޑު އޮޅި ހުޅުވުމަށް ޤައުމުތައް އެއްބަސްް ކުރުވުމުގައި ފްރާންސްގެ ރައީސް މެކްރޮން ގެންގުޅުއްވާ ސިޔާސަތަށް 10 އިން 8 މާކްސް ދެއްވާ ކަމަށެވެ. އަދި އެމެރިކާގެ މަސައްކަތްތަކުގައި މެކްރޮން ބައިވެރިވެ ވަޑައިގަންނަވާނެ ކަމަށް ޓްރަމްޕް ވަނީ ވިދާޅުވެފަ އެވެ. 

ނަމަވެސް، މެކްރޮން ވިދާޅުވެފައި ވަނީ ފްރާންސް އަކީ ހަމަ ނުޖެހުމުގެ ބައިވެރިއެއް ނޫން ކަމަށާއި، މިހާރު އޮތް ޙާލަތުގައި ހޮރްމޫޒް ކަނޑު އޮޅި މިނިވަން ކުރުމުގެ އޮަޕަރޭޝަންގައި ފްރާންސް އިން ބައިވެރި ނުވާނެ ކަމަށެވެ. މީގެ އިތުރުން ފްރާންސުގެ ސަރުކާރުގެ އިސް އޮފިޝަލުން ވިދާޅުވެފައި ވަނީ، ހޮރްމޫޒް ކަނޑު އޮޅި އަލުން ހުޅުވާލުމުގެ މަސައްކަތް ކުރުމަށް ވަކި ކޯލިޝަނެއް ހެދުމުގެ މަސައްކަތް އެ ޤައުމުން ކުރަމުން އަންނަ ކަަމަށެވެ. އަދި އެ މަސައްކަތުގައި އެމެރިކާގެ ބައިވެރިވުމެއް ނޯންނާނެ ކަމަށް ވެސް ބުނެފައިވެ އެވެ. 

މެކްރޮން ވިދާޅުވީ މިހާރުގެ މަސްރަހު ހަމަޔަކަށް އެޅި، އަދި ބޮން އެޅުންތައް ހުއްޓުމަކަށް އައުމުން، އެހެން ޤައުމުތަކާ ގުޅިގެން އާގު ބޯޓު ތަކަށް ސަލާމަތީ ރައްކާތެރިކަން ފޯރުކޮށްދިނުމުގެ ޒިންމާ އުފުލަން ފްރާންސް އިން އޮތީ ތައްޔާރަށެެވެ. މިއީ ޓްރަމްޕްގެ ގޮވާލެއްވުމަށް މެކްރޮން ފާޅުގައި ދެކޮޅު ހެއްދެވި ފުރަަތަމަ ފަހަރެވެ. 

މިދިޔަ ހަފުތާގެ ތެރޭގައި ފްރާންސް އިން ވަނީ ވިލާތުގެ ޤައުމު ތަކުގެ އިތުރުން، އިންޑިއާ ހިމެނޭހެން އޭޝިއާގެ ޤައުމުތަކާއި އަދި އަރަބި ޤައުމުތަކާ މަޝްވަރާ ކޮށްފަ އެވެ. އެ މަޝްވަރާ ތަކުގެ ބޭނުމަކީ ވިޔަފާރި އުޅަނދު ތަކަށް ހިމާޔަތް ދިނުމަށް ހަނގުރާމަ މަތީ ބޯޓުތައް ފޮނުވުމަށް ޕްލޭނެއް އެކުލަވާލުމެވެ.