ސްޕެއިން އަށް ޓްރަމްޕް ދެއްވި އިންޒާރުތަކާ ދެކޮޅަށް މެކްރޮން ތެދުވެއްޖެ

އީރާން އަށް ހަމަލާ ދިނުމަށް ސްޕެއިންގައި ހުރި އެމެރިކާގެ ބޭސްތައް ބޭނުން ކުރުމުގެ ހުއްދަ އެ ޤައުމުން ނުދިނުމުން، ސްޕެއިންއާ ދެކޮޅަށް ވިޔަފާރީގެ ދަތި ކުރުމުގެ ފިޔަވަޅު އަޅާނެ ކަަމަށް ވިދާޅުވެ އެމެރިކާގެ ރައީސް ޑޮނަލްޑް ޓްރަމްޕް ދެއްވި އިންޒާރުތަކާ ދެކޮޅަށް، ފްރާންސްގެ ރައީސް އިމަނުއެލް މެކްރޮން ތެދުވެ ވަޑައިގެންފި އެވެ. 

ފްރާންސްގެ ރައީސްގެ އޮފީހުން ބުދަ ދުވަހު ނެރުނު ބަޔާނެއްގައި ބުނެފައި ވަނީ އެ ޤައުމުގެ ރައީސް މެކްރޮން، ސްޕެއިންގެ ބޮޑު ވަޒީރު ޕެޑްރޯ ސަންޗޭޒްއާ ފޯނުން ގުޅުއްވައި ވާހަކަ ދައްކަވާފައިވާ ކަމަށެވެ. އަދި އެ ފޯނު ކޯލުގައި، އިޤްތިޞާދީ ގޮތުން މަޖުބޫރު ކުރުވުމަށް އެމެރިކަ އިން ދެމުންދާ އިންޒާރުތަކާ ދެކޮޅަށް، ޔޫރަޕުގެ ޤައުމެއްގެ ހައިސިއްޔަތުން ފްރާންސް އޮތީ ސްޕެއިން އާއެކު ކަމަށް މެކްރޮން ވިދާޅުވި އެވެ. އަދި އެކަމުގެ ޔަގީންކަން ވެސް މެކްރޮން ވަނީ ސްޕެއިން އަށް ދެއްވައިފަ އެވެ. 

މިއީ އެމެރިކާ އިން އީރާން އަށް ހަމަލާ ދިނުމަށް، ސްޕެއިންގައި ހުރި އެމެރިކާގެ ބޭސް ބޭނުން ކުރުމުގެ ހުއްދަ އެ ޤައުމުން ނުދިނުމުން އުފެދުނު މައްސަލަ އެކެވެ. ސްޕެއިންގެ އެ ނިންމުމާ އެކު، އެމެރިކާގެ ރައީސް ޓްރަމްޕް ވަނީ އެ ޤައުމާ އެކު އޮންނަ ވިޔަފާރީގެ ގުޅުން ކަނޑާލާނެ ކަމުގެ އިންޒާރު ވެސް ދެއްވައިފަ އެވެ. 

ފްރާންސްގެ ރައީސް މެކްރޮންގެ އޮފީހުން އިތުރަށް ބުނި ގޮތުގައި، މިއީ ޔޫރަޕުގެ އިއްތިހާދުގެ ޤައުމު ތަކުގެ މެދުގައި އޮންނަން ޖެހޭ އެއްބައިވަންތަކަން ދެއްކުމަށް ލިބުނު ފުރުސަތެއް ކަމަށެވެ. އަދި ބޭރުގެ ޤައުމު ތަކުން ޔޫރަޕުގެ ޤައުމު ތަކަށް ކުރިމަތި ކުރާ ބިރު ދެއްކުންތަކާ ދެކޮޅަށް ފްރާންސް އަބަދު ވެސް ވަކާލާތު ކުރާނެ ކަމަށް އެ ބަޔާނުގައި ބުނެފައިވެ އެވެ.

މިކަމާ ގުޅިގެން ބައިނަލްއަޤުވާމީ މަސްރަހުގައި އެމެރިކާ އާއި ޔޫރަޕުގެ ޤައުމުތަކާ ދެމެދު އޮތް ގުޅުމަށް އިތުރު ނުތަނަވަސްކަމެއް ވަނީ ވެރިވެފައި އެވެ. ޚާއްސަކޮށް އީރާންގެ މައްސަލައިގައި އެމެރިކާ އިން ގެންގުޅޭ ހަރުކަށި ސިޔާސަތު ތަކަށް، ޔޫރަޕުގެ ގިނަ ޤައުމު ތަކުން ތާއީދު ނުކުރާކަން ހާމަވެގެން ގޮސްފައިވެ އެވެ.