ރަޝިޔާގެ ނިއުކްލިއާ ފޯސް ތަރައްޤީ ކުރުމަކީ އެންމެ މުހިންމު ކަންތައް: ޕުޓިން

އެމެރިކާ އާއެކު ރަޝިޔާ އިން ހަދާފައިވާ ނިއުކްލިއާ އެއްބަސްވުމުގެ މުއްދަތު ހަމަވުމާ ގުޅިގެން، ރަޝިޔާގެ ނިއުކްލިއާ ފޯސް ތަރައްޤީ ކުރުމަކީ މިހާރު އެންމެ މުހިންމު ކަންތަކުގެ ގޮތުގައި ބަލަން ޖެހޭ ކަމަށް އެ ޤައުމުގެ ރައީސް ވްލަޑިމިއަރ ޕުޓިން ވިދާޅުވެއްޖެ އެވެ. 

ޕުޓިން މިހެން ވިދާޅުވެފައި ވަނީ އާދީއްތަ ދުވަހު ދެއްވި ވީޑިއޯ މެސެޖެއްގަ އެވެ. އެގޮތުން ޕުޓިން ވިދާޅުވީ ރަޝިޔާގެ ސަލާމަތާއި ރައްްކާތެރިކަން ކަށަވަރު ކޮށްދޭ އަދި ދުނިޔޭގެ ބާރު ތަކުގެ ހަމަހަމަކަން ދެމެހެއްޓުމަށް ބޭނުންވާ ނިއުކްލިއާ ފޯސް ތަރައްޤީ ކުރުމަކީ އެންމެ މުހިންމު ކަންތައް ކަމަށެވެ. 

ރަޝިޔާގެ ވަތަންވެރިންގެ ދުވަހުގެ މުނާސަބަތުގައި ވާހަކަ ދައްކަވަމުން ޕުޓިން މިހެން ވިދާޅުވެފައިވާއިރު، އެމެރިކާގެ ރައީސް ޑޮނަލްޑް ޓްރަމްޕް ވަނީ މީގެ ކުރިން ޕުޓިން އަށް ވަރަށް ބޮޑަށް ފާޑު ވިދާޅުވެ ވާހަކަ ވެސް ދައްކަވައިފަ އެވެ. ރަޝިޔާ އިން ފާހަގަ ކުރާ މި ދުވަހަކީ، އެ ޤައުމުގެ ސިފައިންނަށް އިޙުތިރާމް އަދާ ކުރުމަށް ފާހަގަ ކުރާ ދުވަހެކެވެ. 

ޕުޓިން ވިދާޅުވީ ސިފައިންގެ ބާރާއި، ނޭވީގެ ބާރު އިތުރަށް ވަރުގަދަ ކުރުމަށް މަސައްކަތް ކުރައްވާނެ ކަމަށެވެ. އަދި ޔޫކްރެއިންއާ ދެކޮޅަށް ހިންގަމުން އަންނަ ހަނގުރާމަ އަށް ހަަތަރު އަހަރުވާން ކައިރިވެފައިވާއިރު، އެ ހަނގުރާމަ އިން ލިބިފައިވާ ތަޖުރިބާ އިން ފައިދާ ނަންގަވާނެ ކަމަށް ވެސް ޕުޓިން ވިދާޅުވެފައިވެ އެވެ. 

ހަމައެއާ އެކު ޕުޓިން ވިދާޅުވީ، ސިފައިންގެ ހުރިހާ ބަޔަކަށް ވެސް ކުރިއެރުން ގެނެސް ދެއްވާނެ ކަމަށެވެ. އެގޮތުން ހަނގުރާމަ އަށް ތައްޔާރުވުމާއި، އަވަސް އަވަހަށް ޙަރަކާތްތެރިވުން އަދި އެންމެ ދަތި ޙާލަތްތަކުގައި ވެސް މަސައްކަތް ކުރެވޭނެ ގޮތަށް ސިފައިންގެ ބާރުތައް ތަރައްޤީ ކުރައްވާނެ ކަމަށް ޕުޓިން ވަނީ ވިދާޅުވެފަ އެވެ. 

ޕުޓިން މި ވާހަކަ ދައްކަވާފައިވާއިރު، ރަޝިޔާ އިން ޔޫކްރެއިންއާ ދެކޮޅަށް ހިންގަމުން އަންނަ ހަނގުރާމަ އަށް އަންގާރަ ދުވަހު ހަތަރު އަހަރު ވާނެ އެވެ. މި ހަނގުރާމައިގެ ސަބަބުން ޔޫކްރެއިންގެ ގިނަ ސަރަހައްދު ތަކެއް ވަރަށް ބޮޑަށް ހަލާކުވެފައިވާއިރު، އެތައް މިލިއަން ބަޔަކަށް ވަނީ ގެދޮރު ދޫކޮށް ދާން ޖެހިފަ އެވެ. މި ހަނގުރާމައިގައި ރަޝިޔާ އާއި، ޔޫކްރެއިން އިން ވެސް ގިނަ ބަޔަކު މަރުވެފައިވެ އެވެ. 

ދުނިޔޭގައި އޮތް އެންމެ ބޮޑު ނިއުކްލިއާ ދެ ބާރަކީ ރަޝިޔާ އާއި އެމެރިކާ އެވެ. މި ހިނގާ ފެބްރުވަރީ މަހުގެ ކުރީ ކޮޅު ނިއު ސްޓާޓް އެއްބަސްވުމުގެ މުއްދަތު ހަމަވުމާ ގުޅިގެން، ދެ ޤައުމުގެ ދެމެދުގައި މިހާރު އަސްކަރީ ކޮންޓްރޯލް ކުރުމާ ގުޅޭ އެއްވެސް އެއްބަސްވުމެއް ނެތްކަން ފާހަގަ ކުރެވެ އެވެ. 

ނަމަވެސް، ރަޝިޔާ އިން ބުނެފައި ވަނީ ނިއުކްލިއާ މައްސަލައިގެ ކަންކަމުގައި ޒިންމާދާރު ގޮތެއްގައި ކަންތައް ކުރިއަށް ގެންދާނެ ކަމަށާއި، އެމީހުންގެ ނިއުކްލިއާ މަސައްކަތުގައި ކަނޑައެޅިފައިވާ ހައްދު ތަކަށް ވުރެ އިތުރު ނުކުރާނެ ކަމަށެވެ.