އެމެރިކާގެ ތާާރީޚުގައި އެންމެ ދިގު ތަޤުރީރު، ޓްރަމްޕް ވިދާޅުވީ އޭނާގެ ސިޔާސަތުގެ ސަބަބުން ޤައުމު މިހާރު އޮތީ "ރަން ޒަމާނެއްގައި" ކަމަށް

އެމެރިކާގެ ކޮންގްރެސްގައި ދެއްވި، ސްޓޭޓް އޮފް ޔޫނިއަންގެ ތަޤުރީރުގައި އެ ޤައުމުގެ ރައީސް ޑޮނަލްޑް ޓްރަމްޕް، އޭނާގެ ސަރުކާރުގެ އިޤްތިޞާދީ ކާމިޔާބީ ތަކަށް އަލިއަޅުވާލައްވައި ވަރަށް ބޮޑަށް ވާހަކަ ދައްކަވައިފި އެވެ.

އަންގާރަ ދުވަހުގެ ރޭ ޓްރަމްޕް ދެއްވި މި ތަޤުރީރަކީ އެމެރިކާގެ ތާރީޚުގައި ވެސް، މިހާތަނަށް ރައީސަކު ދެއްވި އެންމެ ދިގު ތަޤުރީރެވެ. އެމެރިކާގެ ރައްޔިތުންގެ މެދުގައި ޓްރަމްޕްގެ މަޤުބޫލުކަން ވަރަށް ބޮޑަށް ދަށްވަމުން އަންނަ ދަނޑިވަޅެއްގައި ދެއްވި ތަޤުރީރުގައި ޓްރަމްޕް ވިދާޅުވީ، އޭނާގެ ސިޔާސަތުގެ ސަބަބުން އެމެރިކާ މިހާރު އޮތީ "ރަން ޒަމާނެއްގައި" ކަމަށެވެ. 

މިއަހަރުގެ ނޮވެމްބަރު މަހުގެ ތެރޭގައި އެމެރިކާގެ މިޑް ޓާމް އިންތިޚާބު އޮންނައިރު، ތަޤުރީރުގެ ފުރަތަމަ ގަޑިއެއް ހާ އިރު ޓްރަމްޕް ހޭދަ ކުރައްވާފައި ވަނީ އިޤްތިޞާދީ ކަންކަމަށް އަލިއަޅުވާލައްވައި ވާހަކަ ދެއްކެވުމުގަ އެވެ. މިއީ އާންމު ރައްޔިތުންގެ ތާއީދު ހޯއްދެވުމަށް ޓްރަމްޕް ކުރެއްވި ކަމެއް ކަމަށް ބައެއް ފަރާތް ތަކުންް ފާހަގަ ކޮށްފައިވެ އެވެ. 

މިގޮތުން އެމެރިކާގެ އިންފްލޭޝަން ކޮންޓްރޯލްކޮށް، ހިއްސާގެ ބާޒާރު ރެކޯޑު މިންވަރަކަށް މަތިކޮށް، ޓެކްސް ކުޑަކޮށް އަދި ބޭހުގެ އަގުތައް ވަރަށް ބޮޑަށް ތިރި ކޮށްފައިވާ ކަމަށް ޓްރަމްޕް ވިދާޅުވި އެވެ. ޓްރަމްޕް ވާހަކަ ދައްކަވަމުން ގެންދެވިއިރު، ވެރިކަން ކުރާ ރިޕަބްލިކަން ޕާޓީގެ މެމްބަރުން ވަރަށް ބޮޑަށް ތަރުހީބު ދެމުން ދިޔައިރު، ޓްރަމްޕް ވިދާޅުވީ އެމެރިކާ މިހާރު އޮތީ ކުރިއަށް ވުރެ މާ ބޮޑަށް ވަރުގަދަވެފައި ކަމަށެވެ. 

ޓްރަމްޕް ތަޤުރީރު ކުރައްވަމުން ގެންދެވިއިރު، އިދިކޮޅު ޑިމޮކްރެޓިކް ޕާޓީގެ ގިނަ މެމްބަރުން ވަނީ މި ޖަލްސާ ބޮއިކޮޓް ކުރުމަށް ފަހު، ބޭރުގައި މުޒާހަރާ ކުރުން ކުރިއަށް ގެންގޮސްފަ އެވެ. އެކަމުގެ ސަބަބުން، ކޮންގްރެސްގެ ގިނަ ގޮނޑިތައް ހުރީ ހުހަށެވެ. 

ދެ ވަނަ ދައުރަކަށް ވެރިކަން ކުރައްވަމުން ގެންދަވާ ޓްރަމްޕްގެ މަޤުބޫލުކަން ދަށްވަމުންދާއިރު، އީރާނުގެ މައްސަލައިގައި އޮތް ނުތަނަވަސްކަމާއި، އެމެރިކާގެ ދިރިއުޅުމުގެ ޚަރަދުތައް ބޮޑުވުމުގެ ސަބަބުން ޤައުމުގެ ރައްޔިތުންގެ މެދުގައި ވަނީ އިންތިހާ އަށް ކަންބޮޑުވުން އުފެދިފަ އެވެ. 

ސްޓޭޓް އޮފް ޔޫނިއަންގެ ކުރީ ކޮޅު ޓްރަމްޕް ވާހަކަ ދައްކަވަމުން ގެންދެވީ، ލިޔެފައިވާ ސްކްރިޕްޓަށް ވަރަށް ބޮޑަށް ބައްލަވައިގެނެވެ. ނަމަވެސް، އިމިގްރޭޝަންގެ މައްސަލައިގައި ވާހަކަ ދައްކަވަމުން ޓްރަމްޕް ވަނީ، އިދިކޮޅު ޑިމޮކްރެޓް ޕާޓީގެ ބައެއް މެމްބަރުންނަށް ވެސް ބަހުގެ ހަމަލާތައް އަމާޒު ކުރައްވައިފަ އެވެ. 

އެމެރިކާގެ އިންފްލޭޝަން ދަށަށްދާ ކަމަށް ޓްރަމްޕް ވިދާޅުވި ނަމަވެސް، ކާބޯ ތަކެއްޗާއި، ބޯހިޔާވަހިކަމާއި، އިންޝުއަރެންސް އަދި ޔުޓިލިޓީސްގެ އަގުތައް އަދިވެސް ހުރީ ވަރަށް މަތީގަ އެވެ. އަދި މިދިޔަ ހުކުރު ދުވަހުގެ ތަފާސް ހިސާބު ތަކުން ދައްކާ ގޮތުގައި އިޤްތިޞާދީ ކުރިއެރުމަށް ވެސް ވަނީ މަޑު ޖެހުމެއް އައިސްފަ އެވެ. 

ރޮއިޓާސް އާއި އިޕްސޯސް އިން ކުރި ސާވޭ އަކުން ދައްކާ ގޮތުގައި، ޓްރަމްޕްގެ އިޤްތިޞާދީ ސިޔާސަތު ތަކާއި، ކަންކަން ބައްޓަން ކުރައްވަމުން ގެންދަވާ ގޮތާ މެދު ހިތްހަމަ ޖެހެނީ އެމެރިކާގެ އެންމެ 36 އިންސައްތަ ރައްޔިތުންނެވެ.

ނޮވެމްބަރު މަހު އޮންނަ އިންތިޚާބުގައި ހައުސް އޮފް ރެޕްރެޒެންޓެޓިވްސްގެ ހުރިހާ ގޮނޑި ތަކާއި، ސެނެޓުގެ ތިން ބައި ކުޅަ އެއް ބައި ގޮނޑި އަށް މެމްބަރުން އިންތިޚާބު ކުރާއިރު، ކޮންގްރެސްގެ ކޮންޓްރޯލް ހޯދުމަށް އިދިކޮޅު ޑިމޮކްރެޓިކް ޕާޓީ އިން ދަނީ ވަރަށް ބޮޑަށް މަސައްކަތް ކުރަމުންނެވެ. މީގެ އިތުރުން، ޓްރަމްޕް ތައާރަފު ކުރައްވާަފއިވާ ޓެރިފް ނިޒާމު ސުޕްރީމް ކޯޓުން ބާތިލު ކޮށްފައި ވީ ނަމަވެސް، ޓްރަމްޕް ވަނީ ސުޕްްރީމް ކޯޓުގެ ފަނޑިޔާރުންނާ މެދު ސުވާލު އުފައްދަވައި އަދި ޙުކުމަށް ވެސް ގޮން ޖައްސަވައިފަ އެވެ. 

ގާތް ގަނޑަކަށް އެއް ގަޑިއިރާއި 47 މިނެޓަށް ދެމިގެން ދިޔަ މި ތަޤުރީރުގައި ޚާރިޖީ ސިޔާސަތަށް މާ ބޮޑު ސަމާލު ކަމެއް ޓްރަމްޕް ދެއްވާފައި ނުވެ އެވެ. އަށް ހަނގުރާމައެއް ނިމުމަކަށް ގެނެސްފައިވާ ކަމަށް ޓްރަމްޕް ވިދާޅުވި ނަމަވެސް، އެއީ ހަގީގަތާ ޚިލާފު ވާހަކައެއް ކަމަށް މާހިރުން ފާހަގަ ކޮށްފައިވެ އެވެ. 

މީގެ އިތުރުން ރަޝިޔާ އިން ޔޫކްރެއިން އަށް އަރައި ގަނެ، ހަނގުރާމަ ކުރަމުން އަންނަތާ ހަތަރު އަހަރު ފުރުނު ދުވަހު ޓްރަމްޕް ދެއްވި މި ތަޤުރީރުގައި އެ ވާހަކަ އަށް ވެސް މާ ބޮޑު ސަމާލު ކަމެއް ދެއްވާފައި ނުވެ އެވެ. އީރާންގެ މައްސަލައިގައި ޓްރަމްޕް ވިދާޅުވެފައި ވަނީ، ޑިޕްލޮމަސީގެ މަގުން މައްސަލަ ޙައްލު ކުރަން ބޭނުންވާ ކަމަށާއި، ނަމަވެސް އީރާން އަށް ނިއުކްލިއާ ހަތިޔާރު ހޯދުމުގެ ފުރުސަތު ދުވަހަކު ވެސް ނުދެއްވާނެ ކަމަށެވެ.