ހަންގޭރީ އިން ދެކޮޅު ހަދާތީ، ރަޝިޔާ އަށް ދަތި ކުރުމުގެ ފިޔަވަޅު އެޅުމަށް ނުނިންމޭނެ

ރަޝިޔާއާ ދެކޮޅަށް އައު ދަތި ކުރުމުގެ ފިޔަވަޅު ތަކެއް އެޅުމަށް މަސައްކަތް ކުރަމުން ގެންދިޔަ ނަމަވެސް، ވިލާތުގެ އިއްތިހާދު (އީޔޫ)ގެ މެމްބަރު ޤައުމު ތަކުގެ މެދުގައި އެއްބަސްވުމަކަށް އާދެވޭނެ ކަމަކަށް ނުބެލެވޭ ކަމަށް، އީޔޫގެ ޚާރިޖީ ސިޔާސަތާ ބެހޭ އެންމެ އިސްވެރިޔާ ކާޖާ ކަލާސް ވިދާޅުވެއްޖެ އެވެ.

ހޯމަ ދުވަހު ބޭއްވުމަށް ހަަމަޖެހިފައިވާ އީޔޫގެ ޤައުމު ތަކުގެ ޚާރިޖީ ވަޒީރުންގެ ބައްދަލުވުމުގެ ކުރިން ނޫސްވެރިންނާ ވާހަކަ ދައްކަވަމުން ކަލާސް ވިދާޅުވީ، ރަޝިޔާއާ ދެކޮޅަށް އަޅަން ނިންމާފައިވާ އައު ފިޔަވަޅުތަކާ މެދު ހަންގޭރީ އިން ދެކޮޅު ހަދަމުން ގެންދާތީ، އެ ބައްދަލުވުމުގައި ހުރިހާ ޤައުމުތަކެއްގެ މެދުގައި އެއްބަސްވުމަކަށް ނާދެވޭނެކަން މިހާރު ސާފުވެފައިވާ ކަމަށެވެ. 

ކަލާސް ފާހަގަ ކުރެއްވި ގޮތުގައި ހަންގޭރީ އިން މި ފިޔަވަޅުތަކާ މެދު ގެންގުޅެމުން އަންނަ ހަރުކަށި އުސޫލުގެ ސަބަބުން، ހޯމަ ދުވަހު އޮންނަ ބައްދަލުވުމުގައި އެކަމާ މެދު ގޮތެއް ނިންމުމަށް ހުރަސް ތަކެއް ވަނީ ކުރިމަތިވެފަ އެވެ. އީޔޫގެ ޤަވާއިދުތައް ހުންނަ ގޮތުން، މިފަދަ މުހިހްމު ނިންމުންތައް ނިންމޭނީ އިއްތިހާދުގެ ހުރިހާ މެމްބަރު ޤައުމު ތަކެއްގެ ފުރިހަމަ ތާއީދު އެކަމަށް ލިބިގެންނެވެ. 

ރަޝިޔާ އިން ޔޫކްރެއިން އަށް އަރައިގަތުމާ ގުޅިގެން އީޔޫ އިން ދަނީ ސިލްސިލާކޮށް އެ ޤައުމާ ދެކޮޅަށް ދަތި ކުރުމުގެ ފިޔަވަޅުތައް އަޅަމުންނެވެ. ނަމަވެސް، ހަންގޭރީ އިން މީގެ ކުރިން ވެސް ވަނީ ރަޝިޔާއާ ދެކޮޅަށް އަޅާ ބައެއް ފިޔަވަޅު ތަކުގެ ސަބަބުން އެ ޤައުމުގެ އިޤްތިޞާދަށް ނޭދެވޭ އަސަރު ކުރާނެ ކަމަށް ބުނެ، އެކަމާ ދެކޮޅަށް ވީޓޯގެ ބޭނުން ހިފައިފަ އެވެ. 

ހޯމަ ދުވަހުގެ ބައްދަލުވުމުގައި އެއްބަސްވުމަކަށް ނާދެވުނު ނަމަވެސް، ކުރިއަށް އޮތް ދުވަސް ތަކުގައި މެމްބަރު ޤައުމު ތަކުގެ މެދުގައި މަޝްވަރާ ކޮށްގެން މި މައްސަލަ އަށް ހައްލެއް ހޯދުމަށް މަސައްކަތް ކުރާނެ ކަމަށް ބެލެވެ އެވެ. އީޔޫގެ ޚާރިޖީ ސިޔާސަތާ ބެހޭ އެންމެ އިސްވެރިޔާގެ މަގާމަށް ކަލާސް ހަވާލުވެ ވަޑައިގެންނެވި ފަހުން، މިއީ ރަޝިޔާގެ މައްސަލައިގައި އޭނާ ކުރިމަތިލާން ޖެހިފައިވާ އެންމެ ބޮޑު ގޮންޖެހުމެވެ.