އިޒްރޭލް އާއި ލުބުނާންއާ ދެމެދު ސުލްޙަ ޤާއިމު ކުރުމަށް މެދުވެރިއެއްގެ ދައުރު އަދާ ކުރަން ފްރާންސް އޮތީ ތައްޔާރަށް: މެކްރޮން

އިޒްރޭލް އާއި ލުބުނާންއާ ދެމެދު ހިނގަމުން އަންނަ ހަމަ ނުޖެހުންތައް ހުއްޓާލައި، ހަނގުރާމަ ހުއްޓާލުމުގެ މަޝްވަރާތައް ފްރާންސްގެ ޕެރިހުގައި ބޭއްވުމަށް ތައްޔާރަށް ހުންނެވި ކަމަށް، ފްރާންސްގެ ރައީސް އިމަނުއެލް މެކްރޮން ވިދާޅުވެއްޖެ އެވެ. 

ފްރާންސްގެ ރައީސް މެކްރޮން މިކަން ހާމަ ކުރައްވާފައި ވަނީ ހޮނިހިރު ދުވަހު އެކްސްގައި ކުރެއްވި ޕޯސްޓެއްގަ އެވެ. އެގޮތުން މެކްރޮން ވިދާޅުވީ، އިޒްރޭލް އާއެކު ސީދާ މަޝްވަރާ ތަކަށް ދިޔުމަށް ތައްޔާރަށް އޮތް ކަމުގެ އިޝާރާތެއް ލުބުނާންގެ ލީޑާޝިޕް އިން ދީފައިވާ ކަމަށެވެ. އެހެންކަމުން ދާއިމީ ޙައްލެއް ހޯދުމަށާއި، ލުބުނާންގެ އިސްތިޤުލާލު ދެމެހެއްޓުމަށްޓަކައި ލުބުނާންގެ ކަމާ ބެހޭ ފަރާތް ތަކުން ވެފައިވާ ވައުދުތައް ތަންފީޒު ކުރުމަށް ފުރުސަތު ދިިނުމުގެ ގޮތުން، ހަނގުރާމަ ހުއްޓާލުމުގެ މަޝްވަރާތައް ފެށުމަށް ލިބިފައިވާ ފުރުސަތުގެ ބޭނުން ހިފުމަށް މެކްރޮން ވަނީ އިޒްރޭލް އަށް ގޮވާލައްވައިފަ އެވެ. 

މީގެ އިތުރުން އިޒްރޭލް އިން ލުބުނާން އަށް ދެމުން އަންނަ ހަމަލާތައް ހުއްޓާލުމަށާއި، ހިޒްބުﷲ ޖަމާއަތުން ހިންގަމުން އަންނަ ހަނގުރާމަވެރި އަމަލުތައް ހުއްޓާލުމަށް ވެސް ފްރާންސްގެ ރައީސް މެކްރޮން ވަނީ ބާރު އަޅުއްވައިފަ އެވެ. މަޝްވަރާގެ މޭޒަށް ދިޔުމަކީ މިވަގުތު މަސްލަހަތު ޤާއިމު ކުރުމަށް އޮތް އެންމެ މުހިންމު މަގު ކަމަށް ވެސް މެކްރޮން ވަނީ ފާހަގަ ކުރައްވައިފަ އެވެ. 

ލުބުނާންގެ ޙާލަތާ ގުޅޭ ގޮތުން މެކްރޮން އިތުރަށް ވިދާޅުވީ، ބޮޑު ހައިޖާނު ގަނޑެއްގެ ތެރެއަށް ލުބުނާން ވެއްޓިގެން ދިޔަ ނުދިނުމަށްޓަކައި ކުރެވެން ހުރި ހުރިހާ މަސައްކަތެއް ކުރަން ޖެހޭ ކަމަށެވެ. އަދި އެ ޤައުމުގެ ހަމަޖެހުމަކީ މުޅި ސަރަހައްދުގެ ސަލާމަތާ ގުޅިފައިވާ ކަމެއް ކަމަށް ވެސް މެކްރޮން ވަނީ ވިދާޅުވެފަ އެވެ. 

ފްރާންސް އަކީ ތާރީޚީ ގޮތުން ލުބުނާންއާ ގާތް ގުޅުމެއް ބާއްވާ ޤައުމަކަށް ވާއިރު، މި މައްސަލައިގެ މެދުވެރިއެއްގެ ދައުރު އަދާ ކުރުމަށް ފްރާންސް އިން ދަނީ ބައިނަލްއަޤުވާމީ މައިދާނުގައި ގިނަ މަސައްކަތް ތަކެއް ކުރަމުންނެވެ. ފްރާންސްގެ ރައީސް މެކްރޮންގެ މި ހުށަހެޅުމަކީ ސަރަހައްދީ ހަމަނުޖެހުންތައް ކުޑަކޮށް، ސުލްޙަ ޤާއިމު ކުރުމަށް އެޅޭ މުހިންމު ފިޔަވަޅެއްގެ ގޮތުގައި މަސްރަހު ދިރާސާ ކުރާ ފަރާތްތަކުން ދެކެ އެވެ.