ޓްރަމްޕް ރުޅި ގަދަވެއްޖެ، ވިދާޅުވީ މެކްރޮން ވަރަށް އަވަހަށް އޮފީހުން ބޭރު ވާނެ ކަމަށް!

ހޮރްމޫޒް ކަނޑު އޮޅި ހުޅުވުމަށް އަސްކަރީ އެހީތެރިކަން ފޯރުކޮށްދިނުމަށް އެމެރިކާގެ ރައީސް ޑޮނަލްޑް ޓްރަމްޕް އެދިވަޑަައިގެންފައިވާއިރު، ފްރާންސް އިން އެކަމާ އިންކާރު ކުރުމުން ޓްރަމްޕް ވަރަށް ބޮޑަށް ރުޅި ގަދަ ވެއްޖެ އެވެ.

އެމެރިކާ އާއި އިޒްރޭލް އިން އީރާާންއާ ދެކޮޅަށް ފެށި ހަނގުރާމައިގެ ސަބަބުން، އީރާން އިން ވަނީ ހޮރްމޫޒް ކަނޑު އޮޅި ބަންދު ކޮށްފަ އެވެ. އެކަމުގެ ސަބަބުން ދުނިޔޭގެ ތެލުގެ ބާޒާރަށް ބޮޑު ލޮޅުމެއް އަރާފައިވާއިރު، ތެލުގެ އަގު ވަނީ އިންތިހާ އަށް މައްޗަށް އަރައިގެން ގޮސްފަ އެވެ. 

ޓްރަމްޕް ވަނީ ހޮރްމޫޒް ކަނޑު އޮޅި ހުޅުވުމުގެ މަސައްކަތުގައި އެކުވެރި ޤައުމު ތަކުގެ އެއްބާރުލުމަށް އެދިފަ އެވެ. އެގޮތުން އެމެރިކާއާ ގާތް ގުޅުމެއް އޮންނަ އިނގިރޭސިވިލާތާއި، ޖަޕާން އާއި، އޮސްޓްރޭލިއާ އަދި ފްރާންސް ފަދަ ޤައުމު ތަކުގެ އެހީތެރިކަމަށް ޓްރަމްޕް ވަނީ އެދިވަޑައިގެންފަ އެވެ. ނަމަވެސް އެ ޤައުމު ތަކުން ވަނީ އެކަމާ ދެކޮޅު ހަދައިފަ އެވެ. އޭގެ ތެރޭގައި ފްރާންސް ވެސް ހިމެނެ އެވެ.

އަންގާރަ ދުވަހު ވައިޓް ހައުސްގައި ނޫސްވެރިޔަކު ވަނީ ޓްރަމްޕްއާ އެ ސުވާލު އަމާޒު ކޮށްފަ އެވެ. އެގޮތުން ހޮރްމޫޒް ކަނޑު އޮޅި ހުޅުވުމުގެ އޮޕަރޭޝަންގައި ފްރާންސް އިން ބައިވެރި ނުވާނެ ކަމަށް މެކްރޮން ހާމަ ކޮށްފައިވާ ކަމަށް ނޫސްވެރިޔާ ސުވާލު ކުރި އެވެ. އެއާ އެކު އެންމެ ފުރަތަމަ ޓްރަމްޕް ވަނީ އެއީ ކާކު ވިދާޅުވި ވިދާޅުވުމެއްތޯ އައްސަވައިފަ އެވެ. ދެ ވަނަ ފަހަރަށް ނޫސްވެރިޔާ މެކްރޮންއޭ ދެންނެވުމުން، ކޯފާ އިސް ކުރައްވައި ޓްރަމްޕް ވިދާޅުވީ މެކްރޮން ވަރަށް އަވަހަށް އޮފީހުން ބޭރު ވާނެ ކަމަށެވެ.

މެކްރޮންގެ ނިންމެވުމާ މެދު ޓްރަމްޕް ހިތްހަމަ ނުޖެހުނުއިރު، ފްރާންސް އާއި އެމެރިކާ އަކީ ވަރަށް ގާތް ގުޅުމެއް އޮންނަ ދެ ޤައުމެވެ. ޚާއްޞަކޮށް ޓްރަމްޕްގެ ރިޔާސީ ފުރަތަމަ ދައުރުގައި އޭނާ ވަނީ މެކްރޮންއާ ގާތް ގުޅުމެއް ބާއްވަވައިފަ އެވެ. އޭގެ ފަހުން 2025 ވަނަ އަހަރު ވެރި ކަމުގެ ދެ ވަނަ ދައުރަކަށް ޓްރަމްޕް ވަޑައިގެން ފަހުން ވެސް، އޭނާ ވަނީ މެކްރޮންއާ ގާތް ގުޅުމެއް ބާއްވަވައިފަ އެވެ. ނަމަވެސް، މެދު އިރުމަތީގެ މިހާރުގެ ޙާލަތުގައި ހޮރްމޫޒް ކަނޑު އޮޅި ހުޅުވުމުގެ އޮޕަރޭޝަންގައި ބައިވެރި ނުވާން މެކްރޮން ވަނީ ނިންމަވައިފަ އެވެ.

މެކްރޮން ވަރަށް އަވަހަށް އޮފީހުން ބޭރު ވާނެ ކަމަށް ޓްރަމްޕް ވިދާޅުވިއިރު، އޭނާ އެ އިޝާރާތް ކުރެއްވީ މެކްރޮންގެ ރިޔާސީ ދައުރު ހަމަވުމަށެވެ. ދެ ވަނަ ދައުރަކަށް ފްރާންސްގެ ވެރިކަން ކުރައްވަމުން އަންނަ މެކްރޮންގެ ރިޔާސީ ދައުރު ހަމަވާނީ 2027 ވަަނަ އަހަރުގެ އޭޕްރީލް މަހު އެވެ. ފްރާންސްގެ ޤާނޫނުގައި އޮންނަ ގޮތުން، ދެ ދައުރު ވެރިކަން ކުރެއްވުމަށް ފަހު، އެ ބޭފުޅަކަށް އިތުރު ދައުރަކަށް ވާދަ ނުކުރެވޭނެ އެވެ.