އީރާން ހަނގުރާމަ އިން ރަޝިޔާ އަށް ލުޔެއް ލިބޭނެ ކަމަށް ހީކުރުމަކީ ގޯހެއް: މެކްރޮން

އެމެރިކާާ އާއި އިޒްރޭލް އިން އީރާންއާ ދެކޮޅަށް ކުރިއަށް ގެންދާ ހަނގުރާމައިގެ ސަބަބުން މެދު އިރުމަތީގެ މަސްރަހު ގޯސްވެފައިވާއިރު، އެ ހަނގުރާމަ އިން ރަޝިޔާ އަށް ލުޔެއް ލިބޭނެ ކަމަށް ހީކުރާ ނަމަ، އެއީ ގޯސް ހިސާބެއް ކަމަށް ފްރާންސްގެ ރައީސް އިމަނުއެލް މެކްރޮން ވިދާޅުވެއްޖެ އެވެ. 

މެކްރޮން މިހެން ވިދާޅުވެފައި ވަނީ، ހަނގުރާމައިގެ ސަބަބުން ދުނިޔޭގެ ބާޒާރުގައި ތެލުގެ އަގު މައްޗަށް ދިޔުމުގެ ސަބަބުން، ތެލުގެ އަގު ހެޔޮ ކުރުމަށް ރަޝިޔާ އަށް މީގެ ކުރިން އަޅާފައިވާ ބައެއް ފިޔަވަޅުތައް ލުއި ކުރުމަށް އެމެރިކާ އިން ނިންމާފައި ވަނިކޮށެވެ. 

ހުކުރު ދުވަހު ޔޫކްރެއިންގެ ރައީސް ވޮލޮޑިމީރް ޒެލެންސްކީ އާއެކު ބޭއްވި ނޫސްވެރިންގެ ބައްދަލުވުމެއްގައި މެކްރޮން ވިދާޅުވީ، އީރާންގެ ހަނގުރާމަ އިން ލުއި ތަކެއް ލިބޭނެ ކަމަށް މިއަދު ރަޝިޔާ އަށް ޤަބޫލު ކުރެވިދާނެ ކަމަށެވެ. ނަމަވެސް، އެއީ ގޯސް ހިސާބެއް ކަމަށް މެކްރޮން ވަނީ ވިދާޅުވެފަ އެވެ. 

މެކްރޮން ވިދާޅުވީ މިދިޔަ ހަފުތާގެ ތެރޭގައި ކުރިއަށް ގެންދިޔަ ޖީ7 ޤައުމު ތަކުގެ ބައްދަލުވުމުގައި ވެސް، އެ މައްސަލަ މުހިންމު ގޮތެއްގައި ދިރާސާ ކޮށްފައިވާ ކަމަށެވެ. އެގޮތުން ދުނިޔޭގެ ބާޒާރުގައި ތެލުގެ އަގު މައްޗަށް ދިޔުމަކީ، ރަޝިޔާއާ ދެކޮޅަށް އަޅާފައިވާ ފިޔަވަޅުތައް އަލުން އުވާލުން ނުވަތަ ލުއި ކުރަން ޖެހޭ ކަމެއް ނޫން ކަމަށް ޤައުމު ތަކުން ޤަބޫލު ކޮށްފައިވާ ކަމަށް ޒެލެންސްކީ ވިދާޅުވި އެވެ. 

ފްރާންސްގެ ރިޔާސީ އޮފީހުން ބުނެފައި ވަނީ، މެކްރޮން އާއި ޒެލެންސްކީ ބައްދަލު ކުރެއްވުމުގެ އަސާސީ މަޤުސަދަކީ ރަޝިޔާ އަށް އަޅާފައިވާ ފިޔަވަޅުތައް އިތުރަށް ވަރުގަދަ ކުރުމަށް މަޝްވަރާ ކުރުން ކަމަށެވެ. ހުކުރު ދުވަހު ޒެލެންސްކީ ވަނީ ފްރާންސް އަށް ވަޑައިގެން މެކްރޮން ބައްދަލު ކުރައްވައި، ރަޝިޔާ އާއި ޔޫކްރެއިންގެ ހަނގުރާމައާ ގުޅޭ ގޮތުން މަޝްވަރާ ކުރައްވައިފަ އެވެ. 

ފްރާންސްގެ ރައީސް މެކްރޮން ވިދާޅުވީ ރަޝިޔާ އަށް އަޅާފައިވާ ފިޔަވަޅުތައް ދެމެހެއްޓުމަކީ ވަރަށް މުހިންމު ކަމެއް ކަމަށެވެ. އެކަން ކުރުމަށް ބައިނަލްއަޤުވާމީ ޤައުމު ތަކުން ގުޅިގެން މަސައްކަތް ކުރަން ޖެހޭ ކަމަށް ވެސް މެކްރޮން ވިދާޅުވި އެވެ. މެދު އިރުމަތީގެ ޙާލަތާ ގުޅިގެން ދުނިޔޭގެ ބާޒާރުގައި ތެލުގެ އަގު އުފުލިގެން ދިޔުމުން، ބައެއް ޤައުމު ތަކުން ރަޝިޔާ އަށް އަޅާފައިވާ ފިޔަވަޅުތައް ލުއި ކުރަން ފެށި ނަމަވެސް، ފްރާންސް އާއި ޔޫރަޕުގެ އެހެން ޤައުމު ތަކުން އެ ފިޔަވަޅުތައް ދެމެހެއްޓުމަށް މެކްރޮން ވަނީ ގޮވާލައްވައިފަ އެވެ.