އީރާން އަށް ދޭ ހަމަލާތައް މެކްރޮން ކުށްވެރި ނުކުރާތީ، އަރާގްޗީ ފާޑު ވިދާޅުވެއްޖެ

އެމެރިކާ އާއި އިޒްރޭލް އިން އީރާން އަށް ދެމުން ގެންދާ ހަމަލާތަކާ ގުޅިގެން، ފްރާންސްގެ ރައީސް އިމަނުއެލް މެކްރޮން ހަނު ހުންނަވާތީ، އީރާންގެ ފޮރިން މިނިސްޓަރު އައްބާސް އަރާގްޗީ ފާޑު ވިދާޅުވެއްޖެ އެވެ.

އަރާގްޗީ މިހެން ވިދާޅުވެފައި ވަނީ، މެކްރޮންގެ އޭނާގެ ސޯޝަލް މީޑިއާ އެކައުންޓުގައި ކުރައްވާފައިވާ ޕޯސްޓަކަށް ރައްދު ދެއްވަމުންނެވެ، މެކްރޮން ކުރެއްވި ޕޯސްޓުގައި ވިދާޅުވެފައި ވަނީ، ޤަތަރުގެ އަމީރު އަދި އެމެރިކާގެ ރައީސް ޑޮނަލްޑް ޓްރަމްޕްއާ ވާހަކަ ދައްކަވައި، މަޝްވަރާ ކުރައްވާފައިވާ ކަމަށެވެ. 

ޤަތަރުގެ ގޭސް މަރުކަޒަކަށް އަމާޒުކޮށް އީރާން އިން ދިން ހަމަލާއާ ގުޅިގެން މެކްރޮން ވިދާޅުވީ، ހަކަތައިގެ ވަސީލަތްތައް ހިމެނޭހެން، އާންމު އިންފްރާސްޓްރަކްޗާ އަށް އަމާޒުކޮށް ދެމުން އަންނަ ހަމަލާތައް ހުއްޓާލުމަށް ގޮވާލައްވާ ކަމަށެވެ.

އެ ޕޯސްޓައް ރައްދު ދެއްވައި އަރާގްޗީ ކުރެއްވި ޕޯސްްޓެއްގައި ވިދާޅުވީ، އީރާންގައި ހުރި ގޭސް ފެސިލިޓީ ތަކަށް ދިން ހަމަލާ ތަކުގެ ސަބަބުން، އެތައް މިލިއަން ބަޔަކު ނުރައްކާތެރި ވިހަ ގޭހަށް ހުށަހެޅިގެން ދިޔައިރު ވެސް، ފްރާންސްގެ ރައީސް މެކްރޮން ހުންނެވީ ހަނު ކަމަށެވެ. ނަމަވެސް، އީރާން އަށް ދިން ހަމަލާ ތަކުގެ ރައްދުގައި އީރާން އިން ދިން ހަމަލާތަކާ މެދު މެކްރޮން ކަންބޮޑުވެ ވަޑައިގެންނެވި ކަމަށް އަރާގްޗީ ފާހަގަ ކުރެއްވި އެވެ. 

މެކްރޮންގެ އަމަލުތަކާ މެދު ވަރަށް ބޮޑަށް ހިތާމަ ކުރައްވާ ކަމަށް ވެސް އަރާގްޗީ ވިދާޅުވެފައިވެ އެވެ. އެ ޕޯސްޓުގައި އަރާގްޗީ ވަނީ ހުޅަނގުގެ ޤައުމު ތަކުން ގެން ގުޅޭ ދެ ފުށް ދެ ގޮތް ސިޔާސަތަށް އިޝާރާތް ކުރައްވައިފަ އެވެ. އެގޮތުން އެއީ އެމެރިކާ އާއި އިޒްރޭލް އިން އީރާން އަށް ދެމުން އަންނަ ހަމަލާތައް އެއްވެސް ބަޔަަކަށް ގޯސް ނުވާއިރު، އެެ ހަމަލާ ތަކުގެ ރައްދުގައި އީރާން އިން ދެމުން އަންނަ ހަމަލާތައް ގޯސްވާ ކަމަަށެވެ.

މެކްރޮން އަށް ރައްދު ދެއްވައި އަރާގްޗީ ކުރެއްވި ޕޯސްޓުގައި ވިދާޅުވީ، އިޒްރޭލް އާއި އެމެރިކާގެ އުދުވާންތަކާ މެދު ބައިނަލްއަޤުވާމީ މުޖުތަމައުން އަދި ޚާއްސަކޮށް ވިލާތުގެ ޤައުމު ތަކުން ހަނު ތިބުމަކީ ބަލައި ގަނެވޭނެ ކަމެއް ނޫން ކަމަށެވެ. ސަރަހައްދީ މަސްލަހަތު ގޯސްވަމުންދާ މި ދަނޑިވަޅުގައި، ހަމަލާތައް ހުއްޓުވުމަށް ވަކި ފަރާތަކަށް ނުޖެހި މަސައްކަތް ކުރުމަށް ވެސް އީރާން އިން ގޮވާލާފައިވެ އެވެ.