އީރާންގެ އިސްވެރިން އަވަހާރަ ކޮށްލިއިރު، އދ.ގެ ސެކިއުރިޓީ ކައުންސިލް ހަނު އޮންނާތީ ފާޑު ކިޔައިފި

އީރާންގެ އިސް އޮފިޝަލުން ތަކެއް އަވަހާރަ ކޮށްލަމުން އަންނައިރު ވެސް، އދ.ގެ ސެކިއުރިޓީ ކައުންސިލުން އެއްވެސް ފިޔަވަޅެއް ނާޅައި، ހަނު އޮންނާތީ އެ ޤައުމުގެ ފާޑު ކިޔުން ސެކިއުރިޓީ ކައުންސިލަށް އަމާޒު ކޮށްފި އެވެ. 

އީރާންގެ އެންމެ މަތީ ވެރިޔާ އަދި ކުރީގެ ރޫހީ ލީޑަރު އާޔަތުﷲ އަލީ ޚާމަނާއީ އާއި، އިސް ކޮމާންޑަރުންގެ އިތުރުން، ސެކިއުރިޓީ ޗީފް އަލީ ލަރިޖާނީ ވެސް ވަނީ އަވަހާރަ ކޮށްލައިފަ އެވެ. އެކަމާ ގުޅިގެން އީރާން އިން އދ އަށް ފޮނުވި ސިޓީއެއްގައި ވަނީ ވަރަށް ބޮޑަށް ފާޑު ކިޔައިފަ އެވެ. 

އީރާން އިން އދ އަށް ކަނޑަ އަޅުއްވާފައި ހުންނަވާ ސަފީރު އާމިރު ސައީދު އިރަވާނީ ސޮއި ކުރައްވައި، ސަލާމަތީ މަޖިލީހަށް ފޮނުވި ސިޓީފައި އޭނާ ބުނެފައި ވަނީ، އީރާންގެ އިސްވެރިން އަވަހާރަ ކުރަމުން ގެންދާއިރު ވެސް، ސަލާމަތީ މަޖިލީހުގެ އެއްޗެއް ނުބުނެ އޮތުމަކީ ބަލައި ގަނެވޭނެ ކަމެއް ނޫން ކަމަށެވެ. 

މީގެ އިތުރުން އިރަވާނީ ވިދާޅުވީ، ސަލާމަތީ މަޖިލީހުން މިފަދަ އަމަލުތަކާ ދެކޮޅަށް ފިޔަވަޅު ނާޅައި އޮތުމަކީ، އީރާންގެ އިސްވެރިންނާއި އޮފިޝަލުންނަށް އަމާޒުކޮށް އިޒްރޭލް އިން ދެމުންދާ ހަމަލާ ތަކަށް ލިބޭ އިތުރު ހިތްވަރެއް ކަށެވެ. އދަި މިފަދަ ލާއިންސާނީ އަމަލުތައް ހުއްޓުވުމަށް ބައިނަލްއަޤުވާމީ މުޖުތަމައުން މަސައްކަތް ކުރަން ޖެހޭ ކަމަަށް ވެސް އެ ސިޓީގައި ފާހަގަ ކުރައްވާފައިވެ އެވެ. 

ސިޓީގައި އިރަވާނީ ވިދާޅުވެފައި ވަނީ، އިސްވެރިން އަވަހާރަ ކޮށްލުމުގެ ހަމަލާތައް ހުއްޓުމެއް ނެތި ކުރިއަށް ދާ ނަމަ، އެއީ އާންމު ކަމަަކަށް ވެގެން ހިނގައިދާނެ ކަމުގެ ބިރު ވަރަށް ބޮޑަށް އޮތް ކަމަށެވެ. އަދި އެ ނުރައްކާތެރި ސިޔާސަތު ދުނިޔޭގެ އެހެން ޤައުމު ތަކަށް ފެތުރިގެން ދިޔުމުގެ ފުރުސަތު އޮތް ކަމަށް ވެސް ވަނީ ވިދާޅުވެފަ އެވެ. 

އީރާން އިން އދ.ގެ ސަލާމަތީ މަޖިލީހަށް ނުރުހުން އަމާޒުކޮށްފައިވާއިރު، އެމެރިކާ އާއި އިޒްރޭލް އިން އީރާންއާ ދެކޮޅަށް ކުރިއަށް ގެންދާ ހަނގުރާމައިގައި ސަލާމަތީ މަޖިލީހުން މިހާތަނަށް އެއްވެސް އެއްޗެއް ބުނެފައި ނުވެ އެވެ. ނަމަވެސް، އެމެރިކާ އާއި އިޒްރޭލްގެ ހަމަލާ ތަކުގެ ރައްދުގައި އީރާން އިން ދެމުން އަންނަ ހަމަލާތައް ސަލާމަތީ މަޖިލީހުން ވަނީ ކުށްވެރި ކޮށްފަ އެވެ.