ކެރިކް އިރުޝާދު ދޭން ފެށިފަހުން، ފުރަތަމަ ފަހަރަށް ޔުނައިޓެޑު ބަލިވެއްޖެ

އިނގިރޭސި ޕްރިމިއާ ލީގުގައި ނިއުކާސަލް ޔުނައިޓެޑާ ދެކޮޅަށް ކުޅުނު މެޗުން ބަލިވެ، މެންޗެސްޓަރ ޔުނައިޓެޑުގެ ކޯޗުކަމާ މައިކަލް ކެރިކް ހަވާލުވި ފަހުން ފުރަތަމަ ބައްޔާ ކުރިމަތިލާން ޖެހިއްޖެ އެވެ. 

ނިއުކާސަލްގެ އަމިއްލަ ދަނޑުގައި ކުޅުނު މެޗުގައި އެ ޓީމުން ވަނީ 2-1 އިން ޔުނައިޓެޑު ބަލިކޮށްފަ އެވެ. މެޗުގައި ނިއުކާސަލް އިން ލީޑު ނަގާފައި ވަނިކޮށް، ޔުނައިޓެޑުން ނަތީޖާ ހަމަހަމަ ވެސް ކުރި އެވެ. ނަމަވެސް، ދެ ވަނަ ލަނޑެއް ޖަހައިގެން ނިއުކާސަލް ވަނީ މެޗުން މޮޅުވެފަ އެވެ.

މެޗުގެ ފުރަތަމަ ހާފުގެ އިތުރު ވަގުތުގައި ނިއުކާސަލް އަށް ލިބުނު ޕެނަލްޓީ ކާމިޔާބުކޮށް، އެ ޓީމަށް ލީޑު ނަގައިދިނީ އެންތަނީ ގޯޑަން އެވެ. އޭގެ ތިން މިނެޓު ފަހުން ޔުނައިޓެޑުގެ ކަސެމީރޯ ވަނީ ލަނޑު ޖަހައި އެ ޓީމަށް ނަތީޖާ ހަމަހަމަ ކޮށްދީފަ އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ ބްރޫނޯ ފެނާންޑޭޒް އެވެ. މެޗުގެ ދެ ވަނަ ހާފުގެ އެންމެ ފަހު ވަގުތުގައި ވިލިއަމް އޮސޫލާ ވަނީ ނިއުކާސަލްގެ ދެ ވަނަ ލަނޑު ޖަހައި އެ ޓީމު މެޗުން މޮޅު ކޮށްދީފަ އެވެ.

މިއީ ޔުނައިޓެޑުގެ ކޯޗުކަމާ ކެރިކް ހަވާލުވި ފަހުން އެ ޓީމު ބަލިވި ފުރަތަމަ މެޗެވެ. އޭނާގެ އިރުޝާދުގެ ދަށުން ކުޅުނު އަށް މެޗުގެ ތެރެއިން ހަ މެޗުން އެ ޓީމު ވަނީ މޮޅުވެފަ އެވެ. އެއް މެޗު އެއްވަރުވި އިރު، އެއް މެޗުން ވަނީ ބަލިވެފަ އެވެ. މެޗުން ބަލިވެ ޔުނައިޓެޑު ތިން ވަަނައިގައި އޮތީ މިހާތަނަށް ކުޅެފައިވާ 29 މެޗުން 51 ޕޮއިންޓާ އެކު އެވެ.