ތެލުގެ އަގު މައްޗަށް ސިޔާސީ މަގާމުތައް އިތުރު، އިންތިހާބުގެ ފަހުން ވާނީ ކިހިނެއް؟

އެމެރިކާއާއި އިސްރާއީލުން އީރާނާ ދެކޮޅަށް ފެށި ހަނގުރާމައިގެ ކޮޅެއް މެދެއް އަދި ފެންނާކަށް ނެތެވެ. އެހަނގުރާމަ ދިގުލާނީ ކިހާވަރަކަށް ކަމެއް އަންދާޒާ ކުރަންވެސް ދައްޗެވެ. އެކަމަކު އެހަނގުރާމައިން ސާފުވާ އެއްކަމެއް އެބައޮތެވެ. އެކަމާ ގުޅިގެން ދުނިޔޭގެ ބާޒާރުގައި ތެލުގެ އަގު އުފުލިފައިވާ ކަމެވެ. އަދި އިތުރަށް އުފުލޭނޭ ކަމުގެ ބިރު ބޮޑުކަމެވެ. ތެޔޮ ނުލިބިދާނެ ކަމުގެ ކަންބޮޑުވުން ވެސް އިންތިހާއެވެ. ނުވަތަ ތެޔޮލިބުމުގައި ދަތިތަކަކާ ކުރިމަތިލާން ޖެހުމަކީ ކައިރި ކަމެކެވެ.

ސަރުކާރުން ވިދާޅުވަމުން ގެންދެވީ ތެލަށް އަދި ނުޖެހޭނެ ކަމަށެވެ. ތެޔޮ ލިބުމުގައި އަދި ދަތިތަކެއް ނެތްކަމަށެވެ. އެހެން ބުނިތާ ފުރިހަމަ 24 ގަޑިއިރުވެސް ނުވެއެވެ. ބޮޑުތަނުން އެކީ އެއްފަހަރާ އެކުރީ ތެލުގެ އަގު ބޮޑެވެ. އޭގެ މާގިނަ ދުވަހެއް ނުވެ އަނެއްކާވެސް އެގެނެއީ އެސްޓީއޯ އިން ވިޔަފާރި ވެރިންނަށް ވިއްކާ ތެލުގެ އަގަށް ބަދަލެވެ. ލީޓަރަކުން 10.70 ރުފިޔާ ބޮޑުކުރީއެވެ. އޭގެ އަސަރުކުރީ ރަށްރަށަށެވެ. 28 ރުފިޔާ 29 އަށްވެސް ތެލުގެ އަގު ރަށްރަށުގައި އުފުލުނީއެވެ. މިފްކޯއިން މަސްވެރިންނަށް އަގުހެޔޮކޮށް ވިއްކަމުން ގެންދާ ޑީސަލް ވިއްކުން ވެސް ހުއްޓާލިއެވެ.

ތެލަކީ އެހެން ހުރިހާ ކަމަކާ ގުޅުންހުރި އެއްޗެކެވެ. ޚިދުމަތާ ތަކެތީގެ އަގު ކަނޑައެޅޭ އެންމެ ބޮޑު އެކައްޗަކީ ތެލެވެ. ނަތީޖާއެއްގެ ގޮތުން އޭގެ އަސަރު ކުރަން ފެށިއެވެ. ތަކެތީގެ އަގު އެދަނީ އިންތިހާއަށް ބޮޑުވަމުންނެވެ. ފެރީތަކުން އެމީހުންގެ ފެރީ ދަތުރުގެ އަގު ބޮޑުތަނުން ބޮޑުކޮށްފިއެވެ. އެނޫން ގޮތެއް ނެތިގެން އެންސިސްއިން މަސްވެރިންނަށް ހިލޭ ދޫކުރަމުންދިޔަ އައިސްކޮޅު ދޫކުރުން ވެސް ހުއްޓާލީއެވެ.

ތެލުގެއަގަށް ބަދަލު އައީ ކޮންމެހެން ސަރުކާރުން ކުރަންފެށި ކަމަކުން އެކަންޏޭ ބުނާކަށް ނެތީމެވެ. އެކަމަކު މައްސަލައަކީ ސަރުކާރުން ދެން އަޅާ ފިޔަވަޅުތަކެވެ. ދުނިޔޭގެ އެހެން ގައުމުތަކުން ބޮޑެތި ހަރުދަނާ ފިޔަވަޅުތައް އަޅަމުންދާއިރު، ރާއްޖެއިން އެކަމަށް މާބޮޑު އަޅާލުމެއް އޮތްތަނެއް ނުފެނުމެވެ. އެއާ ޚިލާފަށް ނަގައިގެން އުޅޭ ރާޅާމެދު މާބޮޑަށް ވިސްނާތީއެއް ނުފެނެއެވެ. އޭގެ ބަދަލުގައި ރައީސް މުއިއްޒު އާއި މުޅި ސަރުކާރު ވަތަށް ފައިބައިގެން އެކުރައްވާ މަސައްކަތަކީ ކުރިއަށް އޮތް ލޯކަލް ކައުންސިލް އިންތިޚާބާއި، ދެ އިންތިޚާބު އެއްކޮށްލުމަށް ނަގާ ފެންނަ ނުފެންނަ ވޯޓު ކާމިޔާބު ކުރުމުގެ މަސައްކަތެވެ. އެކަމަށްޓަކައި ސިޔާސީ އެތައް ވަޒީފާއެއް އެދަނީ ބަހަމުންނެވެ. ސަރުކާރުގެ ޚަރަދު ކުޑަކުރުމުގެ ކުޑަވެސް ކަމެއް ކުރާތީއެއް ނުފެނެއެވެ. އޭގެ ބަދަލުގައި ރައްޔިތުންގެ ލޯމައްޗަށް ފެންނަނީ އިންތިހާ ދަރަޖައިގެ އިސްރާފްތައް ކުރާ މަންޒަރެވެ. ވަގުތާ ނުބައްދަލު ކަންކަން ކުރަމުންދާތަނެވެ.

ކޮންމެއަކަސް އުފެދޭ ސުވާލަކީ މިގޮތުގައި ހިފަހައްޓާލެވޭނީ ކިހާ ދުވަހެއް ވަންދެން ބާވައެވެ. ވިޔަފާރި ވެރިންނަށް ވިއްކާ ތެލުން 10.70 ރުފިޔާ ބޮޑުކުރިކުރުމާއެކު މާލޭގެ ޝެޑުތަކުން ވިއްކާ ތެލުގެ އަގުވެސް އުފުލޭނޭ ކަމުގެ ވާހަކަ އާއްމުން ދެއްކި ނަމަވެސް އަދި އެ ބަދަލެއް ނުގެނެއެވެ. އެތެރެ ކޮއިލުން ބޭރުވާ ވާހަކަ ތަކުންނާއި ސިޔާސީ މާހިރުން ބުނާ ގޮތުންނަމަ ސަރުކާރުގެ އަސްލު ފިޔަވަޅު ފެންނާނީ ކުރިއަށް އޮތް ވޯޓުގެ ފަހުންނެވެ. ވޯޓަށް އަސަރުކޮށްފާނެތީ މިވަގުތު އިތުރު ފިޔަވަޅެއް ނާޅާ ސަރުކާރުން މަޑުޖައްސާލަނީއެވެ. އެކަމަކު އިންތިޚާބަށް ފަހު ތެލުގެ އަގު އިތުރަށް ބޮޑުކުރުމަކީ ނުވުމަށް ވުރެ ވުން ކައިރި ކަމެކެވެ. އަދި ދޭނެ ކަމަށްބުނެ ކެންޕޭނުގައި ގެންގުޅޭ ކުދިންގެ ވަޒީފާތައް ހަމަޖެހުމަކީ ކައިރިކަމެއް ނޫނެވެ. ހަމަ އެހެންމެ މިހާރު ދެމުންދާ ވަޒީފާތައް މަދުކޮށް މިހާރު އައްޔަންކުރެވޭ ބައެއް ސިޔާސީ މީހުންގެ ވަޒީފާ ގެއްލުމަކީ ދުރުކަމެއް ނޫނެވެ. މިކަމުގައި ރައްޔިތުންނަށް އޮތީ ބަލަން ތިބުމެވެ؟