ރެފަރެންޑަމްގައި ނޫނެކޭ ބުނަން ޖެހެނީ މިއީ އޮޅުވާލުމެއްގެ ތެރެއިން މި ސަރުކާރުން މުޅި ގާނޫނު އަސާސީ ބަދަލު ކުރުމަށް ފަށާ ރޭވުމަކަށް ވާތީ: މާރިޔާ
ލޯކަލް ކައުންސިލް އިންތިޚާބާ އެކު ބާއްވާ ރެފަރެންޑަމަކީ ގާނޫނުއަސާސީއަށް ބޮޑެތި ބަދަލުތަކެއް ގެނައުމަށް ސަރުކާރުން ފަށާ ނުރައްކާތެރި މަސައްކަތެއް ކަމަށް ކުރީގެ ޑިފެންސް މިނިސްޓަރު މާރިޔާ އަހްމަދު ދީދީ ވިދާޅުވެއްޖެ. ޚަރަދު ކުޑަކުރުމުގެ ނަމުގައި ދެ އިންތިޚާބު އެއްކުރަން އުޅެނީ މުޅި ނިޒާމު އޮޅުވާލުމަށް ކަމަށާއި، މިކަމަށް ރައްޔިތުން "ނޫނެކޭ" ބުނަންޖެހޭ ކަމަށް އޭނާ ފާހަގަކުރެއްވި. ސަރުކާރުގެ މި ނިންމުމަކީ ގާނޫނުއަސާސީއަށް ބޭނުންހާ ބަދަލެއް ގެނައުމަށް ހުޅުވައިލާ ދޮރަކަށް ވާތީ، މިއީ ރައްޔިތުން ކަންބޮޑުވާންޖެހޭ ކަމެއް ކަމަށްވެސް މާރިޔާ ވިދާޅުވި.
ރާއްޖެޓީވީން ގެނެސްދޭ ނޫނެކޭ ކެމްޕޭން ޕްރޮގްރާމް | ރާއްޖެއެމްވީ
ލޯކަލް ކައުންސިލް އިންތިޚާބާ އެކު ނަގާ ރެފަރެންޑަމްގައި ރައްޔިތުން ނޫނެކޭ ބުނަން ޖެހެނީ މި ވޯޓަކީ މި ސަރުކާރުން އޮޅުވާލުމެއްގެ ތެރެއިން މުޅި ގާނޫނު އަސާސީ އަށް ބަދަލު ގެނައުމަށް ރާވާފައިވާ ހީލަތްތެރި ރޭވުމެއް ކަމަށް ވާތީ ކަމަށް ކުރީގެ ޑިފެންސް މިނިސްޓަރު މާރިޔާ އަހްމަދު ދީދީ ވިދާޅުވެއްޖެ އެވެ.
ރާއްޖެޓީވީން ގެނެސްދޭ ނޫނެކޭ ކެމްޕޭން ޕްރޮގްރާމްގައި ވާހަކަދައްކަވަމުން މާރިޔާ ވިދާޅުވެފައިވަނީ މި ރެފަރެންޑަމް ވޯޓަކީ ވަރަށް ނުރައްކާތެރި، އަދި ބިރުވެރި ވޯޓެއް ކަމަށެވެ. ދެ އިންތިޚާބު އެއްކޮށްލުމަށް މި ސަރުކާރުން އުޅެނީ ޚަރަދު ކުޑަކުރަން ކަމަށް ބުނެ ގާނޫނު އަސާސީ އަށް ބަދަލު ގެނައުން މުހިއްމު ކަމަަށް ރައްޔިތުންނަށް ދައްކަން އުޅޭއިރު މިއީ އަދި ފެށުން ކަމަށް ބަންޑާރަ ނައިބު ވިދާޅުވާ ކަން މާރިޔާ ފާހަގަ ކުރެއްވި އެވެ.
މާރިޔާ ވިދާޅުވީ ކުރިގެ ރައީސް މައުމޫން އަބްދުލްގައްޔޫމް ވެސް ގާނޫނު އަސާސީ ބަދަލު ކުރައްވަން ވީމަ ގެންނެވީ އިސްލާހީ އެޖެންޑާ އެއް ކަމަށެވެ. އޭގައި މުޅި ހުރިހާ ވާހަކައެއް އޮތް ކަމަށާއި، މި ސަރުކާރުން މިކަން ކުރަނީ ޕީސް ބައި ޕީސް އުސޫލުން ކަމަށެވެ. މިއީ މިކަން ހިނގައިގެން ވާނެ ގޮތް ނޫން ކަމަށް މާރިޔާ ވިދާޅުވި އެވެ.
މި ފެށުނީ ކަމަށް ވާނަމަ އެބޭފުޅުންގެ ދުރު ރާސްތާ ވިސްނުމެއް އެބައޮތްތާ މުޅި ގާނޫނު އަސާސީ ބަދަލު ކުރުމަށް. ކީއްވެ ތޯ ބަންޑާރަ ނައިބު ވިދާޅުވާން ވީ ފެށުމެކޭ. ކީއްވެ ތޯ ފެށުުމުގެ ތެރެއިން ދެން ގެންނަން ބޭނުންވާ ސިލްސިލާ ބަދަލުތަކުގެ ވާހަކަ ވެސް ވިދާޅު ނުވީ. ދެން ސިއްރިއްޔާތުގަ މި ކުރުއްވަން އުޅުއްވާ ކަމަކީ ހަމަ ގައިމު ވެސް ރައްޔިތުން ވަރަށް ކަންބޮޑުވާން ޖެހޭނެ ކަމެއް. އެހެންވީމަ އަޅުގަނޑުމެން މި ބުނަނީ ނޫނެކޭ މިއަށް ވިދާޅުވާން.ކުރީގެ ޑިފެންސް މިނިސްޓަރު މާރިޔާ އަހްމަދު ދީދީ
މިއީ ފެށުން ކަމުގައި ވާނަމަ މި ސަރުކާރުން ގާނޫނު އަސާސީ ބަދަލު ކުރާނީ ކިހާ މިންވަރަކަށް ކަން ވެސް އަންޒާދާ ނުކުރެވޭ ކަމަށެވެ. ގާނޫނަށް ބަދަލު ގެންނަމުން ދާނެ ކަމަށް ސަރުކާރުން ތަކުރާރުކޮށް އިއުތިރާފު ވަމުންދާއިރު މި ރެފަރެންޑަމްގައި ނޫނެކޭ ނުބުނެއްޖެ ނަމަ މިފަދަ އެތައް ރެފަރެންޑަމް އެއް ނަގައި ގާނޫނު ބަދަލު ކުރަން ސަރުކާރުން މަސައްކަތް ކުރާނެ ކަމަށް ވެސް މާރިޔާ ވިދާޅުވި އެވެ.
އެހެން ކަމުން ރެފަރެންޑަމް އަށް ނޫނެކޭ ބުނަން ޖެހޭ ކަމަށް މާރިޔާ ތަކުރާރު ކޮށް ވިދާޅުވި އެވެ.
ހަގީގަތުގައި އެ ލިޔެވިފަ އޮތް އެއްޗަށް ވުރެ މާ ބިރުވެރި މަންޒަރެއް ފެންނަ ގޮތަށް މިބޭފުޅުން ހަމަ އިއުތިރާފު ވަމުން މި ދަނީ. ސާފުކޮށް އެބަ ވިދާޅުވޭ މިއީ ފެށުމެކޭ. ގާނޫނު އަސާސީ އަށް ކިތަންމެ ގިނަ ބަދަލެއް އަދި އަންނާނެ ކަމަށް އަޅުގަނޑުމެންނަށް އެބަ ލަފާކުރެވޭ. މިގޮތަށް އެންޓިސިޕޭޓް ކުރެވޭއިރު ހުރިހާ ބަދަލެއް ނުފެނި ކުއްލިއަކަށް ހަމަ އެންމެ އެއްޗަކަށް ރައްޔިތުން ގާތަށް ގޮސް އާނ އެކޭ ނޫނެކޭ ބުނާށޭ ބުނެފަ އޭގެ ތެރެއިން ދެން އެހެން ބައިވަރު އެހެން އެއްޗެހި ދުއްވާލަން، މިއީ ކަން ކުރަން ވާނެ ގޮތެއް ނޫން.ކުރީގެ ޑިފެންސް މިނިސްޓަރު މާރިޔާ އަހްމަދު ދީދީ
މާރިޔާ ވިދާޅުވީ މި ސަރުކާރުން ދެ އިންތިޚާބު އެއް ކުރަނީ ޚަރަދު ކުޑަކުރަން ނޫން ކަމަށެވެ. އަދި މިކަމަށް އާނ އެކޭ ރައްޔިތުން ބުނެއްޖެ ނަމަ މިއީ ގާނޫނު އަސާސީ މި ސަރުކާރުން ބޭނުން ގޮތަކަށް ބަދަލު ކުރުމަށް ކާމިޔާބު ކަމާއެކު ކުރާ ފުރަތަމަ ކަންތައް ކަމަށް ވެސް މާރިޔާ ވިދާޅުވި އެވެ.
