ދޫނި ޕާޓީ އިން ކުރިހާ ވެސް ކަމަކީ ވެރި މީހާ އެކަނި ވާދަކުރައްވާ ބިންގާ އެޅުމުގެ މުބާރާތެއް މުޅި ރާއްޖޭގައި ބޭއްވުން: ދީދީ
އެމްޑީޕީން ބޭއްވި ޖަލްސާއެއްގައި ވާހަކަދައްކަވަމުން މަރަދޫ ދާއިރާގެ މެންބަރު އަޙްމަދު ދީދީ ވިދާޅުވީ، ސަރުކާރުން ގިނަ މަޝްރޫއުތަކެއްގެ ބިންގާ އެޅި ނަމަވެސް އެއްވެސް މަސައްކަތެއް ނުނިމޭ ކަމަށް. އަދި ކައުންސިލްތަކުން އެއްބާރުލުން ނުދޭ ކަމަށް ބުނެ ސަރުކާރުން ދައްކަނީ ބަހަނާ ކަމަށް ވިދާޅުވި.
ރައްޔިތުންގެ މަޖިލީހުގެ މަރަދޫ ދާއިރާގެ މެންބަރު އަޙްމަދު ދީދީ | ރާއްޖެ އެމްވީ
ދޫނި ޕާޓީ އިން ކުރިހާ ވެސް ކަމަކީ ވެރި މީހާ އެކަނި ވާދަކުރައްވާ ބިންގާ އެޅުމުގެ މުބާރާތެއް މުޅި ރާއްޖޭގައި ބޭއްވުން ކަމަށް ރައްޔިތުންގެ މަޖިލީހުގެ މަރަދޫ ދާއިރާގެ މެންބަރު އަޙްމަދު ދީދީ ވިދާޅުވެއްޖެ އެވެ.
ދީދީ އެފަދައިން ވިދާޅުވީ އެމްޑީޕީގެ ހޭވައްލާ ތައްޔާރު ޖަލްސާގައި ވާހަކަދައްކަވަމުންނެވެ.
ދީދީ ވަނީ ނިމިދިޔަ އަހަރުގެ ތެރޭގައި ސަރުކާރުން އެތައް ތަނެއްގައި ބިންގާ އަޅާފައިވާ ކަން ފާހަގަކުރައްވާފަ އެވެ. އެކަން ކުރުވާފައި ވަނީ މަޖިލީހުގެ ޕީއެންސީ އަށް ނިސްބަތްވެވަޑައިގަންނަވާ މެމްބަރުން ރައީސް ޑރ.މުހައްމަދު މުއިއްޒު އަށް އޮޅުވާލައްވައިގެން ކަމަށް ދީދީ ވިދާޅުވި އެވެ. ނަމަވެސް މި އަހަރު ކައުންސިލް އިންތިޚާބާއި ހަމަ އަށް އައި އިރު އެއިން އެއްވެސް ކަމެއް ނުނިމުމުން އާއްމުންގެ ކައިރިއަށް ދާން ސަރުކާރަށް ނުކެރިފައި ވާ ކަމަށް ދީދީ ވަނީ ވިދާޅުވެފަ އެވެ.
"16 ޕްރޮޖެކްޓް ސޮއެ ކުރި. އެ ވީތަނެއް ވެސް އެނގޭ މީހަކު ހަރާމޭ ހުރިއްްޔާ. ދެން މި ބުނަނީ ކައުންސިލުން އެއްބާރުލުމެއް ނުދެއޭ. އެއްބާރުލުން ނުދެއޭ މި ބުނަނީ ސުވާލުކުރާތީ. އައްޑޫގެ ރައްޔިތުންނަށް ވާ ފައިދާ އާއި މެދު ސުވާލު ކުރާތީ." ދީދީ ވިދާޅުވި އެވެ.
މީގެ އިތުރުން ދޫންޏަށް ވޯޓުދޭން ޖެހޭ ކަމަށް ޕީއެންސީ އިން ބުނަމުން ދާއިރު ޕީއެންސީ ފިކުރަކީ ބަދަލުވަމުން އައިސްފައިވާ އެއްޗެއްކަން ދީދީ ވަނީ ފާހަގަކުރައްވާފަ އެވެ. އެގޮތުން ޑީއާރްޕީ އިން ޕީޕީއެމް އިން އެ ފިކުރު ބަދަލުވަމުން އައި ކަން ފާހަގަކުރައްވާ ދީދީ ވަނީ އެ ފިކުރަކީ އެއް ޕާޓީ އެއްގެ ގޮތުގައި ތިބެވޭ ބައެއް ނޫން ކަމަށް ފާހަގަކުރައްވާފަ އެވެ. އަދި ދޫންޏަށް ވޯޓު ދިނުމަށް ޕީއެންސީ އިން އެދެމުން ދަނީ އެމްޑީޕީ އިން ތިލަފަތަށް ވޯޓު ދިނުމަށް އެދެމުން ދާތީ އެ އާއި ވާދަ އަށް އެއްޗެކޭ ބުނުމުގެ ގޮތުން ކަމަށް ވެސް އޭނާ ވަނީ ސިފަކުރައްވާފަ އެވެ.
"މި ދޫނީގެ ހަގީގަތަކީ މިއީ ފަން ރިޔަލެއްގައި އައިސް ބަޅު ރުކެއްގައި ޖައްސާފައި ހުރި ދޫންޏެއް. އުދުއްސައިގެން އައިސް ދޫންޏެއްގެ ސިފައިގައި މި ފެންނަނީ. އެމްޑީޕީގެ ފެށުނީއްސުރެ ރަމްޒަކީ ތިލަފަތް. އޭގެ ރަމްޒަކީ ހަމަހަމަކަން." ދީދީ ވިދާޅުވި އެވެ.
ޕީއެންސީ އިން ބުނާ ދޫންޏަކީ ފިޔަ ކޮށާފައިވާ އެއްޗެއް ކަމަށް ދީދީ ވަނީ ވިދާޅުވެފަ އެވެ.
