30 އަހަރު ވެރިކަމުގެ ތެރޭގައި ރައްޔިތުން ސިޔާސީ ވާހަކަ ދައްކަން ފެށުމުން އަލިފާން ރޯވާ އުސޫލުން މިހާރު ވެސް ދަނީ އަލިފާނުގެ ހާދިސާ ހިނގަމުން: މާޒް
މާޒް ވިދާޅުވީ އިންތިޚާބުތައް އެއްކޮށްލުމަށް ސަރުކާރުން ހުށަހަޅާފައިވާ ރެފަރަންޑަމަކީ މަޖިލިސް މެންބަރުންގެ ގޮނޑި ގެއްލުވާލުމަށް ހިންގާ އޮޅުވާލުމެއް ކަމަށް. މާލޭގައި ހިނގަމުންދާ އަލިފާނުގެ ހާދިސާތަކަކީ ސިޔާސީ ކަންކަމަށް އޮންނަ ސަމާލުކަން އަނބުރާލުމަށް ކުރާ ކަމެއްގެ ގޮތުގައި އޭނާ ސިފަކުރެއްވި. އެހެންކަމުން، ސަރުކާރުން ކުރިއަށްގެންދާ މި ވޯޓަށް ރައްޔިތުން "ނޫނެކޭ" ބުނުމަށް އޭނާ ވަނީ ގޮވާލައްވާފައި.
އެމްޑީޕީގެ ޕކަޕް ޖަލްސާގަ އެ ޕާޓީގެ ގައުމީ މަޖިލީހުގެ މެމްބަރު އަހުމަދު ސަލީމް ވާހަކަ ދައްކަވަނީ. | ރާއްޖެއެމްވީ
30 އަހަރު ވެރިކަމުގެ ތެރޭގައި ރައްޔިތުން ނުކުމެ ސިޔާސީ ވާހަކަ ދައްކަން ފެށުމުން ދިމަދިމާލުގައި އަލިފާން ރޯވާ އުސޫލުން މިހާރު ވެސް އަލިފާން ރޯވަމުންދާ ކަަމަށާއި، ރައްޔިތުންނަށް މި ވާނުވާ އެނގެން ޖެހޭ ކަމަށް އެމްޑީޕީގެ ގައުމީ މަޖިލީހުގެ މެމްބަރު އަހުމަދު ސަލީމް (މާޒް ސަލީމް) ވިދާޅުވެއްޖެ އެވެ.
ބުރާސްފަތި ދުވަހު އެމްޑީޕީން ކުރިއަށް ގެންދިޔަ ޕިކަޕް ޖަލްސާގައި މާޒް ވިދާޅުވީ ލޯކަލް ކައުންސިލް އިންތިޚާބާ ދިމާކޮށް ނަގާ ރެފަރަންޑަމްއަކީ ރައްޔިތުންގެ މަޖިލީހުގެ މެންބަރުންގެ ގޮނޑި ނަގާލުމަށް ސަރުކާރުން ހިންގާ ހިޔާނަތްތެރި އަމަލެއް ކަމަށާއި، މި ވޯޓަށް ރައްޔިތުން ނޫނެކޭ ބުނަން ޖެހޭ ކަމަށެވެ.
އެހެން ދަމުންގޮސް މިހާރު މި އޮތީ ސީދާ ފެންނަ ނުފެންނަ ވޯޓެއް. ރައްޔިތުންގެ ކުރިމައްޗަށް ގެނެސްފަ. ހަގީގަތުގައި މީގައި މި ބުނަނީ، ރައްޔިތުންގެ މަޖިލީހުގައި ތިބި 93 މެންބަރުގެ ގޮނޑިގެއްލޭ ވާހަކަ މީގައި މި އޮތީ ބަޔާންކޮށްފައި. އެކަމަކު ރައްޔިތުންގެ ކުރިމައްޗަށް ގެނެއްސަ އޮތް ކަރުދާސްކޮޅުގައި މި އޮންނަނީ، ދެ އިންތިޚާބު އެއްކުރާ ވާހަކަ. މިވަރަށް ދޮގުހަދައި، މަކަރުހަދައި އޮޅުވާލަނީ. މި ގެނައި ބަދަލުން މި ގެއްލެނީ ރައްޔިތުންގެ މަޖިލީހުގެ 93 މެންބަރުގެ ގޮނޑި ކުލިއަކަށް މި ގެއްލެނީ. މި ކާކަށްތޯ މިކަން ކުރެވޭނީ؟ ރައްޔިތުންގެ މަޖިލީހުގެ އެއް މަޖިލީހުގެ ދައުރު ކުރުކޮށް، އަނެއް މަޖިލީހުގެ ދައުރު ދަންމާލުމަށް މަސައްކަތް މި ކުރަނީ.އެމްޑީޕީ ގައުމީ މަޖިލީހުގެ މެމްބަރު އަހުމަދު ސަލީމް
މީގެ އިތުރުން މާޒް ވަނީ މިފަހުން މާލެސިޓީގައި ހިނގަމުންދާ އަލިފާނުގެ ހާދިސާތަކާ ގުޅޭގޮތުން ވެސް ވާހަކަ ދައްކަވާފަ އެވެ.
މާޒް ވިދާޅުވީ 30 އަހަރު ވެރިކަމުގެ ތެރޭގައި ރައްޔިތުން ނުކުމެ ސިޔާސީ ވާހަކަ ދައްކަން ފެށުމުން ދިމަދިމާލުގައި އަލިފާން ރޯވާ ކަމަށާއި، މިއަދު ވެރިކަމުގައި ތިއްބެވީ އެ ފިކުރުގެ ބޭފުޅުން ކަމަށެވެ. މިއީ ރައްޔިތުން ސިޔާސީ މަސައްކަތުގައި އުޅެން ފެށުމުން ފޯކަސް އަނބުރާލުމަށް ކުރާ ކަމެއް ކަމަށް އޭނާ ވިދާޅުވި އެވެ.
ނަމަވެސް މިއަދު ހާލަތު ބަދަލުވެފައިވާ ކަމަށާއި، ލޯކަލް ކައުންސިލް އިންތިޚާބާ ދިމާކޮށް ސަރުކާރުން މި ނަގާ ރެފަރަންޑަމްގައި ވާނުވާ ރައްޔިތުންނަށް އެނގޭ ކަމަށް އޭނާ ވިދާޅުވި އެވެ.
ކުރީގައި 30 އަހަރު ވެރިކަމުގެ ތެރޭގައި ރައްޔިތުން ނުކުމެ ސިޔާސީ ވާހަކަ ދައްކަން ފެށީމާ ދިމަދިމާލުގައި އަލިފާން ރޯވޭ. އޭރުގައިވެސް އެކަން ހިނގާ. އެކި ދިމަދިމާލުގައި ރޯވަމުންދޭ. އޭރުގައިވެސް އެކަން ހިނގާ ގޮތް އެއީ. އެހެންވީމާ، މިހާރު ވެރިކަމުގައި މި ތިބީ މި ފިކުރުގެ މީހުން، މި މީހުންނޭ އެނގޭނެ ވަރަށް ރަނގަޅަށް ރައްޔިތުންގެ ފޯކަސް ގެއްލުވައިލާނީ ކޮން ގޮތަކަށް ހަދައިގެންކަން އެއީ މި ކުރާ ކަމަކީ. އެހެންވީމާ، ވަރަށް ސާފުކޮށް އަޅުގަނޑުމެންނަށް އެބަފެނޭ އަޅުގަނޑު މި ދެންނެވި، ރައްޔިތުންގެ މަޖިލީހުގެ 93 މެންބަރުންގެ ގޮނޑި ގެއްލުވާލުމަށްޓަކައި ހަދާފައި އޮތް ގާނޫނެކޭ ރައްޔިތުންގެ ކުރިމައްޗަށް ގެނެއްސަ މި އޮތީ.އެމްޑީޕީ ގައުމީ މަޖިލީހުގެ މެމްބަރު އަހުމަދު ސަލީމް
މާޒް މިހެން ވިދާޅުވިއިރު، 18 މާރޗް 2026 ގައި މާލޭގެ ގަލޮޅު މޯޗަރީ ކައިރިގައި ހުރި ގުދަނެއްގައި އަލިފާން ރޯވެ އަނދާފައިވެ އެވެ. އެދުވަހުގެ ރޭ މާލޭގެ އިއްޒުއްދީން މަގާއި ފުލޫނިޔާ މަގު ގުޅުނު ކަންމަތީގައި ހުރި ގަސްކާނާ އާއި ކެމިކަލް ހުރި ގުދަނެއްގައި ރޯވެ އަނދާ ބޮޑެތި ގެއްލުން ތަކެއް ލިބިފައިވެ އެވެ. އަދި މި ހާދިސާގެ ޚާއްސަ ތަހުގީގެއް ވެސް ފުލުހުން ވަނީ ފަށާފަ އެވެ.
