ތެލުގެ އަގުހެޔޮ ނުކޮށް ސަރުކާރުން މަޑުކުރަނީ ކައުންސިލް އިންތިހާބު ނިމެންދެން: އަމްރު

ތެލުގެ އަގުހެޔޮ ނުކޮށް ސަރުކާރުން މަޑުކުރަނީ ކުރިއަށް އޮތް ކައުންސިލް އިންތިހާބު ނިމެންދެން ކަމަށާއި، ސަރުކާރުން ކުރަމުންދާ ބޭކާރު ހަރަދުތައް ހުއްޓާނުލައި ރައްޔިތުން މި ހާލަތުން ސަލާމަތް ނުކުރެވޭނެ ކަމަށް އެސްޓީއޯގެ ކުރީގެ މެނޭޖިންގ ޑިރެކްޓަރ ހުސައިން އަމްރު ވިދާޅުވެއްޖެ އެވެ.

އަމްރު މިހެން ވިދާޅުވީ އިދިކޮޅު އެމްޑީޕީން ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުންނެވެ.

އަމްރު ވިދާޅުވީ ދުނިޔޭގެ ބާޒާރުގައި ސާފުނުކުރާ ތެޔޮ ފީފާއެއްގެ އަގު މިހާރު ހުރީ 110 ޑޮލަރަށްވުރެ މަތީގައި ކަމަށެވެ. ތެލުގެ އަގުން އެންމެ ޑޮލަރެއް ބޮޑުވިޔަސް، ރާއްޖެއަށް އެތެރެކުރާ ތެލަށް އެތައް މިލިއަން ރުފިޔާއެއް އިތުރަށް ހޭދަކުރަންޖެހޭކަން އޭނާ ފާހަގަކުރެއްވި އެވެ. އަދި ސަރުކާރުން ބޭއްވި ނޫސްވެރިންގެ ބައްދަލުވުމުގައި ތެލުގެ އަގާ ގުޅޭގޮތުން ނޫސްވެރިން ކުރި ސުވާލުތަކަށް ސީދާ ޖަވާބެއް ދީފައިނުވާތީ، އަމްރު ވަނީ އެކަން ހިނގާގޮތް ތަފްސީލުކޮށްދެއްވާފަ އެވެ.

ރާއްޖެއަށް ތެޔޮ އެތެރެކުރަނީ ކްރެޑިޓަށް ކަމަށާއި، ތެލަށް ފައިސާ ދެއްކުމަށް ގާތްގަނޑަކަށް ހަ މަސް ނުވަތަ އަށް މަސް ދުވަހުގެ މުއްދަތެއް ލިބޭ ކަމަށް އަމްރު ވިދާޅުވި އެވެ. އެހެންކަމުން މިހާރު ތެލުގެ ސަޕްލަޔަރުންނަށް ފައިސާ މި ދައްކަނީ މީގެ ހަ މަސް ކުރިން ބޭނުންކުރި ތެލަށް ކަމަށާއި، މިހާރު ގެންނަ ތެލަށް ފައިސާ ދައްކަންޖެހޭނީ އަށް މަސް ފަހުން ކަމަށް އޭނާ ވިދާޅުވި އެވެ. އެހެންކަމުން މި ވަގުތުން ވަގުތަށް ތެޔޮ އިންތިހާއަށް އަގުބޮޑުކުރުމަކީ ސަރުކާރުން ނަގަންޖެހޭ ފިޔަވަޅެއް ނޫން ކަމަށް އަމްރު ފާހަގަކުރެއްވި އެވެ.

އެހެންކަމުން، މި ވަގުތު އެންމެ މުހިންމު ކަމެއްގެ ގޮތުގައި ސަރުކާރުން ނަގަންޖެހޭ ފިޔަވަޅަކީ އިންތިހާއަށް ތެޔޮ އަގުބޮޑުކުރުމެއް ނޫން. އެ ތެޔޮ އަގުބޮޑު މި ކުރަނީ ފަހުން ދައްކަންޖެހޭ ތެލަށް ފައިސާ ހޯދުމަށްޓަކައި. އެހެންނަމަވެސް، ވަގުތުން އެހާ ބޮޑު އަދަދެއް އުފުލައިލީމާ ރައްޔިތުންނަށް ބޮޑެތި ތަކުލީފުތަކެއް އެބަ ދިމާވޭ. މަސްވެރިންނަށް ޑީސަލް ލީޓަރެއް 27 ރުފިޔާ 30 ރުފިޔާއަށް ޖެއްސުމުގެ މާނައެއް ނެތް. ހަމައެކަނި އަޅުގަނޑުމެންނަށް އެނގޭ އެންމެ ކަމެއް އޮތީ އެކަމުގައި ވާނީ. އެއީ ސަރުކާރަށް ލިބޭ އާމްދަނީ އިތުރުވެގެންދިޔުން. އެއީ އެ ދުވަހު ޕްރެސް ކޮންފަރެންސްގައި ވިދާޅުވީ، އެސް.ޓީ.އޯއަށް ލިބޭ ފައިދާއެއް ނެތޭ. އެ ފައިދާ މަދުކޮށްގެންނޭ އެކަން ކުރާނީ. އެހެންނަމަވެސް، އެސް.ޓީ.އޯއަށް އޭގެ ސަބަބުން މި ވަގުތު ލިބޭ ފައިދާ އިތުރުކޮށްފައި އެބައި ސަރުކާރަށް ނަގާ ވާހަކަ އެ ވިދާޅުވީ. 

އެސްޓީއޯގެ ކުރީގެ މެނޭޖިންގ ޑިރެކްޓަރ ހުސައިން އަމްރު

އަމްރު އިތުރަށް ވިދާޅުވީ ސަރުކާރުން މި ފައިސާ ނަގައިގެން ކުރަމުންދަނީ ބޭކާރު ހަރަދުތައް ކަމަށެވެ. ދުނިޔޭގެ އެހެން ގައުމުތަކުން މިފަދަ ހާލަތްތަކުގައި ފިޔަވަޅު އަޅަމުންދާއިރު، ރާއްޖޭގެ ސަރުކާރުން އެއްވެސް ކަމެއް ނުކޮށް އިންތިހާބާ ހަމައަށް މަޑުކޮށްގެން ތިބުމަކީ ނުރައްކާތެރި ކަމެއް ކަމަށް އޭނާ ސިފަކުރެއްވި އެވެ. ރައްޔިތުން އިގްތިސާދީ ގޮތުން ގެނބެމުންދާއިރު، ސަރުކާރުން މަސައްކަތް ކުރަނީ ހަމައެކަނި ސަރުކާރު ސަލާމަތްވާން ކަމަށާއި އެއީ ހެޔޮ ވެރިކަމެއް ކުރުން ނޫން ކަމަށް އަމްރު ވިދާޅުވި އެވެ.

ސަރުކާރުން ކުރާ ބޭކާރު ހަރަދުތަކާއި ކޮރަޕްޝަން ހުއްޓާލައިގެން ނޫނީ ރައްޔިތުން ސަލާމަތް ނުކުރެވޭނެ ކަމަށް ވިދާޅުވެ، މި ކަންކަން ވަގުތުން ވަގުތަށް އިސްލާހު ކުރުމަށް އަމްރު ވަނީ ސަރުކާރަށް ގޮވާލައްވާފަ އެވެ.