ރައްޔިތު މީހާގެ ބާރު އޮންނަނީ ވޯޓުގައި، އިންތިޚާބު މަދުކުރުމަކީ ރައްޔިތު މީހާގެ ބާރު އަތުލައިގަތުން: ޝާހިދު

ރައްޔިތު މީހާގެ ބާރު އޮންނަނީ ވޯޓުގައި ކަމަށާއި، އިންތިޚާބު މަދުކުރުމަކީ ރައްޔިތު މީހާގެ ބާރު އަތުލައިގަތުން ކަމަށް އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެ އެވެ.

އެމަނިކުފާނު އެފަދައިން ވިދާޅުވީ، ރާއްޖެޓީވީގެ ނޫނެކޭ ޕްރޮގްރާމްގައި ވާހަކަދައްކަވަމުންނެވެ.

ރައްޔިތު މީހާގެ ބާރު އޮންނަނީ، ވޯޓުތައް އޮންނާތީ ކަމަށް ސިފަކުރައްވައި ވާހަކަދައްކަވަމުން، ދޮރުން ދޮރަށް ހިނގުމާއި ރައްޔިތުންގެ ކައިރި އަށް ވެރި މީހާ ދިއުމުގެ ސަގާފަތެއް އޮތީ ވޯޓެއް އޮންނާތީ ކަމަށް ޝާހިދު ވަނީ ވިދާޅުވެފަ އެވެ. ރައްޔިތުންގެ ކައިރިއަށް ގޮސް ރައްޔިތުންގެ އަޑު އެހުމަކީ މި ސަރުކާރުގެ ޘަޤާފަތެއް ނޫން ކަމަށް ވެސް ޝާހިދު ވަނީ ވިދާޅުވެފަ އެވެ. 

ކުރިއަށް އޮތް ކައުންސިލް އިންތިޚާބަށް ޕީއެންސީގެ މާލޭގެ ކެމްޕެއިންގައި ރައީސް ޑރ. މުހައްމަދު މުއިއްޒު ބައިވެރިވެވަޑައިގަންނަވާ ކަމަށާއި، ނަމަ ވެސް އަތޮޅު ތެރެއަށް ކެމްޕެއިން އާއި ގުޅިގެން ވަޑައިނުގަންނަވާ ކަމަށް ވިދާޅުވެފަ އެވެ. އެއީ ރައްޔިތުން ސުވާލުކޮށްލަން ޖެހޭ ކަމެއް ކަމަށް ޝާހިދު ވަނީ ވިދާޅުވެފަ އެވެ. ރަށްތަކުގެ ހާލަތު ބަލާލުމަކީ ސަރުކާރަށް މުހިންމު ކަމެއް ނޫންކަން މިކަމުން ވެސް އެނގޭ ކަމަށް ޝާހިދު ވިދާޅުވި އެވެ.

"ރައީސުލްޖުމްހޫރިއްޔާ ލޯކަލް ކައުންސިލް އިންތިޚާބުގައި މާލޭގައި އެބަ ކެމްޕެއިން ކުރައްވާ. ދޮރުން ދޮރަށް އެބަ ހިންގަވާ. އެކަމަކު އެއްވެސް ރަށަކަށް ވަޑައި ނުގަންނަވާ. ސާފުކޮށް އެ ވިދާޅުވީ އަތޮޅު ތެރޭގައި ތިބި ރައްޔިތުންނާއި ތިމަންނަމެންނަކާއި ގުޅުމެއް ނެތޭ." ޝާހިދު ވިދާޅުވި އެވެ.

ރެފަރެންޑަމްގައި ދެ އިންތިޚާބު އެއްކޮށްލަން ވޯޓު ދީފި ނަމަ އެއީ ރައްޔިތުން ނިކަމެތި ކޮށްލި ނަމަވެސް އެންމެ ރަނގަޅު ކަމަށް ބުނެ ރައީސް އަށް ދެވޭ މެސެޖެއް ކަމަށް ޝާހިދު ވިދާޅުވި އެވެ. ޝާހިދު ވިދާޅުވީ ރައްޔިތުންގެ ބާރު ނަގަހައްޓަން ބޭނުން ނަމަ ކުރިއަށް އޮތް ރެފަރެންޑަމްގައި ރިޔާސީ އިންތިޚާބާއި މަޖިލިސް އިންތިޚާބު އެއްކޮށްލަން ނޫނެކޭ ބުނަން ޖެހޭ ކަމަށެވެ.