ސައުދީ އަރަބިއްޔާގެ ވެރިރަށުން ބާރުގަދަ ދެ ގޮވުމެއްގެ އަޑު އިވިއްޖެ، ގަތަރުގެ އެލްއެންޖީ މަރުކަޒު އީރާނުގެ އިންޒާރާއެކު ހުސްކުރަން ފަށައިފި

އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރް.ޖީ.ސީ) އިން ދެމުންދާ އިންޒާރުތަކަކީ ނުހަނު ސީރިއަސް މައްސަލައެއްގެ ގޮތުގައި ގަލްފް ސަރަހައްދުގެ ގައުމުތަކުން ބަލައި، ފިޔަވަޅުތައް އަޅަން ފަށައިފި އެވެ.

އަލް ޖަޒީރާ އިން ރިޕޯޓު ކުރި ގޮތުގައި މިކަމުގެ ސީރިއަސްކަން ހާމަވާ އެއް ސަބަބަކީ، ދުނިޔޭގެ އެންމެ ބޮޑު އެލް.އެން.ޖީ (ލިކުއިފައިޑް ނެޗުރަލް ގޭސް) އުފައްދާ މަރުކަޒު ކަމަށްވާ ގަތަރުގެ ރަސް ލައްފާން މިހާރު ހުސްކުރަމުންދާ ކަމުގެ ރިޕޯޓްތައް ލިބެމުންދިއުމެވެ.

މި ހަމަނުޖެހުންތަކުގެ ކުރީކޮޅު، މިދިޔަ މާރިޗު މަހުގެ 2 ވަނަ ދުވަހު ވެސް އެ މަރުކަޒަށް ހަމަލާތަކެއް އަމާޒުވެފައިވެއެވެ. އެ މަރުކަޒުގެ ވެރިފަރާތް ކަމަށްވާ ގަތަރު އެނާޖީން އޭރު ބުނެފައިވަނީ، އެ ތަނުގެ އުފެއްދުންތެރިކަން ވަގުތީ ގޮތުން މެދުކަނޑާލުމަށް ނިންމާފައިވާ ކަމަށެވެ.

މި ފިޔަވަޅުތަކަކީ ގަތަރާއި، ޔުނައިޓެޑް އެރަބް އެމިރޭޓްސް (ޔޫ.އޭ.އީ) އަދި ސައުދީ އަރަބިއްޔާގެ ހަކަތަ އުފައްދާ ވަސީލަތްތަކަށް އަސްކަރީ ހަމަލާދޭނެ ކަމަށް ބުނެ އީރާނުން ދީފައިވާ އިންޒާރުތަކާ ގުޅިގެން އަޅަމުންދާ ފިޔަވަޅުތަކެއް ކަމަށް އަލް ޖަޒީރާ އިން ބުނެފައިވެ އެވެ.

ބުދަ ދުވަހު އީރާނުން ނެރުނު އިންޒާރުގައި ބުނެފައިވަނީ، ވަކި ޚާއްޞަ ސަރަހައްދުތަކެއްގައި ދިރިއުޅޭ މީހުންނާއި މަސައްކަތްތެރިންގެ ސަލާމަތާއި ރައްކާތެރިކަމަށްޓަކައި އެ ސަރަހައްދުތަކުން މީހުން ހުސްކުރަން ޖެހޭ ކަމަށެވެ.

މީގެ އިތުރުން، ސައުދީ އަރަބިއްޔާގެ ވެރިރަށް ރިޔާޟުން ބާރުގަދަ ދެ ގޮވުމެއްގެ އަޑު އިވިފައިވާ ކަމުގެ ރިޕޯޓްތައް ބުދަ ދުވަހުގެ ރޭ ވަނީ ލިބެން ފަށާފައި ކަމަށް ވެސް އަލްޖަޒީރާ އިން ރިޕޯޓު ކޮށްފައިވެ އެވެ.

މިއާއެކު، ވައިގެ މަގުން ދީފާނެ ހަމަލާއެއްގެ ނުރައްކާ އޮތް ކަމުގެ އިންޒާރު، ރިޔާޟްގައި ދިރިއުޅޭ ރައްޔިތުންނަށް ވަނީ ދީފައެވެ.