ކުރިން އެމެރިކާ އަށް ތާއީދު ކުރެއްވި ޖަރުމަނުގެ ވެރިޔާ މިހާރު ވިދާޅުވަނީ އީރާނަށް ބޮން އެޅުމަކީ އެ ގައުމުގެ ވެރިކަން ބަދަލުކުރުމަށް އެހީތެރިވެދޭނެ ކަމެއް ނޫން ކަމަށް

އީރާނަށް ބޮން އެޅުމަކީ އެ ގައުމުގެ ވެރިކަން ބަދަލުކުރުމަށް އެހީތެރިވެދޭނެ ކަމެއް ނޫން ކަމަށް ވިދާޅުވެ، ޖަރުމަނުގެ ޗާންސެލަރު ފްރީޑްރިކް މާރޒް އެމެރިކާއަށް އިންޒާރު ދެއްވައިފިއެވެ. އަދި މި ހަނގުރާމައިން އަރައިގަންނާނެ ގޮތެއް އެމެރިކާގެ ކިބައިގައި ނެތް ކަމަށް ވިދާޅުވެ އޭނާ ވަނީ ފާޑުވިދާޅުވެފައެވެ.

ނިމިދިޔަ މަހުގެ ފަހުކޮޅު އެމެރިކާ އާއި އިޒްރޭލުން އެއްވެސް އުުދުވާނަކާ ނުލައި އީރާނަށް ދޭން ފެށި ހަމަލާތަކާ ގުޅިގެން، ފެށުމުގައި މާރްޒް ހުންނެވީ ވޮޝިންޓަނަށް ތާއީދުކުރައްވައިގެންނެވެ. އެ ދުވަސްވަރު އޭނާ ވިދާޅުވެފައިވަނީ މި ހަމަނުޖެހުމުގެ ޒިންމާ އުފުލަންޖެހޭނީ ތެހެރާންގެ ލީޑަޝިޕުން ކަމަށާއި، "މުއްލާގެ ރެޖީމް" ވީހާވެސް އަވަހަކަށް ނިމުމަކަށް އައުމަކީ މި ހަނގުރާމަ އަވަހަށް ނިމޭނެ މަގު ކަމަށެވެ.

ހޯމަ ދުވަހު ބޭއްވި ނޫސްވެރިންގެ ބައްދަލުވުމެއްގައި މާރޒް ވަނީ އީރާނުގެ ވެރިކަން ބަދަލުކުރުމަށް ގޮވާލައްވާފައެވެ. އެހެންނަމަވެސް، އަސްކަރީ ބާރުގެ ބޭނުންކޮށްގެން އެކަން ކާމިޔާބުވާނެ ކަމަށް ގަބޫލުނުކުރައްވާ ކަމަށް އޭނާ ވިދާޅުވިއެވެ.

މާރޒް ވިދާޅުވީ، އީރާނުގެ މިހާރުގެ ސަރުކާރުގެ ބަދަލުގައި ޑިމޮކްރަޓިކް އުސޫލުން އިންތިޚާބުކޮށްފައިވާ ސަރުކާރެއް އަންނަންޖެހޭ ކަމަށެވެ. ނަމަވެސް ބޮން އަޅައިގެން އެފަދަ ސަރުކާރެއް އުފެއްދުމަށް ކުރާ މަސައްކަތް ނާކާމިޔާބުވުމުގެ ފުރުސަތު ބޮޑު ކަމަށް އޭނާ ފާހަގަކުރެއްވިއެވެ.

މީގެއިތުރުން، ތެޔޮ އުފުލާ މައި މަގެއް ކަމަށްވާ ހޮރްމޫޒް ކަނޑުއޮޅި ބަންދުވުމާ ގުޅިގެން ތެލުގެ އަގު 50 އިންސައްތައާ ގާތްކުރާ މިންވަރަކަށް އުފުލި، ފީފާއެއްގެ އަގު 100 ޑޮލަރަށްވުރެ މައްޗަށް ގޮސްފައިވީ ނަމަވެސް، އެ ސަރަހައްދުގެ ސަލާމަތީ ކަންކަން ބެލެހެއްޓުމުގައި ޖަރުމަނުން ބައިވެރިނުވާނެ ކަމަށް އޭނާ ވިދާޅުވިއެވެ.

މާރޒް ވިދާޅުވީ، ގާނޫނީ ގޮތުން ބަލާއިރު އދ. ނުވަތަ އީޔޫ ނުވަތަ ނޭޓޯގެ އެފަދަ މެންޑޭޓެއް ޖަރުމަނަށް ލިބިފައި ނެތް ކަމަށެވެ. އަދި މި ހަނގުރާމައަކީ ނޭޓޯއާ ގުޅުންހުރި ކަމެއް ނޫން ކަމަށްވެސް އޭނާ ވިދާޅުވިއެވެ.

މެދުއިރުމަތީގެ ބައިވެރިންނަށް ހުރި ނުރައްކާތަކަށް އިޝާރާތް ކުރައްވައި މާރޒް އިތުރަށް ވިދާޅުވީ، މި ސަރަހައްދު "ދާއިމީ ހަނގުރާމައެއްގެ" ތެރެއަށް ވެއްޓިގެން ދިޔަދީގެން ނުވާނެ ކަމަށެވެ. އަދި ހަނގުރާމަ ހުއްޓާލާނެ އެއްވެސް ރޭވުމެއް ވޮޝިންޓަނުގެ އަތުގައި ނެތް ކަމަށް ވިދާޅުވެ އޭނާ ވަނީ ފާޑުވިދާޅުވެފައެވެ. އޭނާ ފާހަގަކުރެއްވި ގޮތުގައި، މި އަސްކަރީ އޮޕަރޭޝަން ކާމިޔާބު ކުރާނެ ގޮތުގެ އެއްވެސް ތަސައްވުރެއް މިހާތަނަށް އެނގިފައެއް ނެތެވެ. އެހެންކަމުން ވީހާވެސް އަވަހަކަށް މި ހަނގުރާމަ ނިމުމަކަށް ގެންނަންޖެހޭ ކަމަށް އޭނާ ވިދާޅުވިއެވެ.

މުހައްލިލުން ދެކޭގޮތުގައި، ޖަރުމަނުގެ ޗާންސެލަރގެ ވިސްނުމަށް މި ބަދަލު އައީ، މިއީ ދިގުދެމިގެންދާ ހަނގުރާމައެއްގެ ސަބަބުން ކުރިމަތިވެދާނެ އިގްތިސާދީ ނުރައްކާތަކާ ގުޅިގެން އީޔޫ އާއި ކޯލިޝަންގެ ފަރާތުން އަންނަ ޕްރެޝަރުގެ ނަތީޖާގެ ސަބަބުންނެވެ. ހާއްސަކޮށް ހަކަތައަށް ބަރޯސާވާ ޖަރުމަނުގެ ސިނާއީ ދާއިރާއަށް ތެލުގެ އަގު އުފުލުމުން ބޮޑެތި ގެއްލުންތަކެއް ލިބޭނެއެވެ. މީގެއިތުރުން، މި ހަނގުރާމައިގެ ސަބަބުން ރެފިއުޖީންގެ އާ ކާރިސާ އެއް އުފެދިއްޖެނަމަ، އީރާނުގެ ގިނަ އަދަދެއްގެ މީހުން ދިރިއުޅޭ ޖަރުމަނަކީ އެކަމުގެ އަސަރު އެންމެ ބޮޑަށް ކުރާނެ އެއް ގައުމެވެ.

މާރޒް މިފަދަ މޭރުމަކުން ވާހަކަދައްކަވާފައި މިވަނީ، ހޮރްމޫޒް ކަނޑުއޮޅި މެދުވެރިކޮށް ތެޔޮ ލިބޭ ގައުމުތަކުން، ހާއްސަކޮށް ޔޫރަޕުގެ ނޭޓޯ މެންބަރުން، އެ ސަރަހައްދުގެ ކަނޑުގެ ދަތުރުފަތުރުގެ ރައްކާތެރިކަން ކަށަވަރުކުރުމަށް މަނަވަރުތައް ފޮނުވުމަށް އެމެރިކާގެ ރައީސް ޑޮނަލްޑް ޓްރަމްޕް ގޮވާލައްވާފައިވާ ދަނޑިވަޅެއްގައެވެ. އާދީއްތަ ދުވަހު ފައިނޭންޝަލް ޓައިމްސްއަށް ދެއްވި އިންޓަވިއުއެއްގައި ޓްރަމްޕް ވިދާޅުވީ، ޔޫރަޕުގެ ގައުމުތަކުން އެމީހުންގެ އަމިއްލަ ހަކަތަ ސަޕްލައި ކުރާ މަގުތައް ބެލެހެއްޓުމަކީ އެންމެ އައުލާކަން ބޮޑު ގޮތް ކަމަށެވެ. އަދި އެކަމަށް އިންކާރުކޮށްފިނަމަ އެ ގައުމުތަކަށް އޮތީ "ވަރަށް ގޯސް މުސްތަގުބަލެއް" ކަމަށް ވިދާޅުވެ އޭނާ ވަނީ އިންޒާރު ދެއްވާފައެވެ.

އެހެންނަމަވެސް، ރަތްކަނޑުގައި ޔަމަނުގެ ހޫތީން ދޭ ހަމަލާތަކުން އުޅަނދުފަހަރު ހިމާޔަތްކުރުމަށް 2024 ވަނަ އަހަރު އުފެއްދި މިޝަންގެ ދާއިރާ، ހޮރްމޫޒް ކަނޑުއޮޅިއަށް ފުޅާނުކުރުމަށް ޔޫރަޕުގެ ގައުމުތަކުން ހޯމަ ދުވަހު ވަނީ ނިންމާފައެވެ.

އީޔޫގެ ފޮރިން އެފެއާޒް ކައުންސިލްގެ ބައްދަލުވުމަށްފަހު ނޫސްވެރިންނާ ވާހަކަދައްކަވަމުން ޚާރިޖީ ސިޔާސަތާބެހޭ ވެރިޔާ ކާޖާ ކާލަސް ވިދާޅުވީ، މި އޮޕަރޭޝަން ވަރުގަދަ ކުރުމުގެ ޝައުގުވެރިކަން އެބަހުރި ކަމަށާއި، ނަމަވެސް މިވަގުތަށް އޮޕަރޭޝަންގެ މެންޑޭޓް ބަދަލުކުރުމުގެ ވިސްނުމެއް ނެތް ކަމަށެވެ.

ފަރަންސޭސިވިލާތް، ޖަޕާން، އޮސްޓްރޭލިއާ އަދި ގްރީސްއިން ވަނީ ވަކިވަކިން ބަޔާންތައް ނެރެ، ޓްރަމްޕްގެ ގޮވާލުމަށް އިންކާރުކޮށްފައެވެ. އެ ގައުމުތަކުން ބުނެފައިވަނީ ހޮރްމޫޒް ކަނޑުއޮޅިއަށް މަނަވަރު ފޮނުވުމުގެ އެއްވެސް ވިސްނުމެއް ނެތް ކަމަށެވެ. އިނގިރޭސިވިލާތުން ބުނެފައިވަނީ އޮތް ފުރުސަތުތައް ދިރާސާކުރަމުންދާ ކަމަށާއި، ނަމަވެސް ފުޅާ ދާއިރާއެއްގައި ކުރިއަށްދާ މި ހަނގުރާމައިގެ ތެރެއަށް އެ ގައުމު ނުވަންނާނެ ކަމަށެވެ.