އީރާނުގެ ގޭސް ފީލްޑަކަށް ދިން ހަމަލާއަކާ ގުޅިގެން ތެލާއި ގޭހުގެ އަގުތައް އުފުލިއްޖެ

އީރާނުގެ ގޭސް ފީލްޑަކަށް އިޒްރޭލުން ދިން ހަމަލާއަކާ ގުޅިގެން ތެލާއި ގޭހުގެ އަގުތައް އުފުލިއްޖެ އެވެ.

ދުނިޔޭގެ ބާޒާރުގައި ސާފުނުކުރާ ތެލުގެ އަގުތައް ދަނީ ހަލުވިކަމާއެކު މައްޗަށް އަރަމުން ކަމަށް އަލްޖަޒީރާ އިން ރިޕޯޓު ކޮށްފައިވެ އެވެ.

ދުނިޔޭގެ ބާޒާރުގައި ތެލުގެ އަގު މިންކުރާ މިންގަނޑެއް ކަމަށްވާ ބްރެންޓް ކުރޫޑްގެ އަގު ވަނީ 4.92 އިންސައްތަ މައްޗަށް ގޮސް، ފީފާއެއްގެ އަގު 108.51 ޑޮލަރަށް އުފުލިފައެވެ.

މީގެ އިތުރުން އެމެރިކާގެ ސާފުނުކުރާ ތެލުގެ އަގު ވަނީ 1.86 އިންސައްތަ މައްޗަށް ގޮސް، ފީފާއެއްގެ އަގު 98 ޑޮލަރަށް އަރާފައެވެ.

ތެލުގެ އަގުތަކަށް މި ބަދަލު އައިސްފައިވަނީ އީރާނުގެ ޕާސް ގޭސް ފީލްޑަށް ދިން ހަމަލާއަކާ ގުޅިގެންނެވެ. އެ ހަމަލާއަށްފަހު، ސައުދީ އަރަބިއްޔާ، ޔުނައިޓެޑް އެރަބް އެމިރޭޓްސް (ޔޫއޭއީ) އަދި ގަތަރުގެ ތެލާއި ގޭހުގެ ވަސީލަތްތަކަށް ހަމަލާދޭނެ ކަމުގެ އިންޒާރު އީރާނުގެ ވެރިރަށް ތެހެރާނުން ވަނީ ދީފައެވެ.

މި ހަމަނުޖެހުންތަކާ ގުޅިގެން ވިލާތުގެ ގައުމުތަކުގައި ގޭސް ވިއްކާ އަގުވެސް ވަނީ 6.6 އިންސައްތަ މައްޗަށް ގޮސްފައެވެ. މިއާއެކު މެގަވޮޓް އަވަރ އަކަށް ޖެހޭ އަގު ވަނީ ގާތްގަނޑަކަށް 55 ޔޫރޯ (ގާތްގަނޑަކަށް 63 ޑޮލަރު) އަށް އުފުލިފައެވެ.