އެމްޑީޕީ ޕިކަޕް ޖަލްސާ: "ޚަރަދު ކުޑަކުރަން ކުރަން ބޭނުން ކަމަކީ ރައްޔިތުންގެ އަޑު ނޭހުން. ސަރުކާރުން މަހެއްގެ މައްޗަށް 54 މިލިއަން ރުފިޔާ ހޭދަކުރޭ"
20 މާރިޗު 2026 | ހުކުރު 02:50ޚަރަދު ކުޑަކުރުމުގެ ނަމުގައި ރިޔާސީ އިންތިޚާބާއި މަޖިލިސް އިންތިޚާބު އެއްކޮށްލުމަށް ސަރުކާރުން ކުރާ މަސައްކަތަކީ ބަލައިގަނެވޭނެ ކަމެއް ނޫން ކަމަށް އެމްޑީޕީގެ ރައީސް އަބްދުﷲ ޝާހިދު ވިދާޅުވި. ސަރުކާރުގެ އިސްރާފު ބޮޑުވެފައިވާ އިރު، މި ވޯޓަކީ މަޖިލީހުގެ ދައުރު ކުރުކުރުމަށް ކުރާ މަސައްކަތެއް ކަމަށާއި، އެހެންކަމުން މިކަމާ މެދު ރައްޔިތުން "ނޫނެކޭ" ބުނަން ޖެހޭ ކަމަށް ޝާހިދު ފާހަގަކުރެއްވި.
އެމްޑީޕީގެ ރައީސް އަބްދުﷲ ޝާހިދު އެމްޑީޕީގެ ޕިކަޕް ޖަސްލާގައި ވާހަކަދައްކަވަނީ. | ރާއްޖެ އެމްވީ
ޚަރަދު ކުޑަކުރަން ކުރަން ބޭނުން ކަމަކީ ރައްޔިތުންގެ އަޑު ނޭހުން ކަމަށާއި ސަރުކާރުން މިހާރު ވެސް މަހެއްގެ މައްޗަށް 54 މިލިއަން ރުފިޔާ ހޭދަކުރާ ކަމަށް އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެ އެވެ.
ޝާހިދު މިފަދައިން ވިދާޅުވީ އެމްޑީޕީގެ ޕިކަޕް ޖަލްސާގައި ވާހަކަދައްކަވަމުންނެވެ.
ޝާހިދު ވިދާޅުވީ ރިޔާސީ އިންތިޚާބާއި މަޖިލިސް އިންތިޚާބު އެއްކޮށްލަނީ ޚަރަދު ކުޑަ ކުރުމަށް ކަމަށް ސަރުކާރުން ބުނުމަކީ ބަލައިގަނެވޭ އުޒުރެއް ނޫން ކަމަށެވެ. ރައްޔިތުންނަށް ބޭނުންވާ ކަންކަމުގައި ފިޔަވާ އެހެން ހުރިހާ ކަމެއްގައި ސަރުކާރުގެ ޚަރަދުތައް އިންތިހާ އަށް ބޮޑުކަން ޝާހިދު ފާހަގަކުރެއްވި އެވެ. ދެ އިންތިޚާބު އެއްކޮށްލުމަށް ނަގާ ވޯޓުގައި ވޯޓު ދޭން ވީ ރައްޔިތުންގެ މަސްލަހަތާއި މެދު ވިސްނުމަށް ފަހުގައި ކަަމަށާއި އެ ވޯޓަކީ ސިޔާސީ ފިކުރު އެއްކިބާ ކުރުމަށް ފަހު ދޭން ޖެހޭ ވޯޓެއް ކަަމަށް ޝާހިދު ވަނީ ވިދާޅުވެފަ އެވެ. މި ސަރުކާރުން 120 ބިލިއަން ރުފިޔާ ފުރަތަމަ ދެ އަހަރުގެ ތެރޭގައި ޚަރަދު ކުރި އިރު ސަރުކާރަށް ރާއްޖެ އަށްޓަކައި ކޮށްދެވުނު އެއްވެސް ކަމެއް ނެތް ކަމަށް ޝާހިދު ވިދާޅުވި އެވެ. ރާއްޖޭގެ ހުރިހާ ރަށަކަށް ބެލިޔަސް ބިންގާ އެޅުން ނޫން ކަމެއް ސަރުކާރަށް ކޮށް ނުދެވޭ ކަމަށް ޝާހިދު ވިދާޅުވި އެވެ.
"ހަގީގަތުގައި މި ވޯޓަކީ މަޖިލީހުގެ ދައުރު ކުރު ކުރާނީތޯ ނުވަތަ ނޫންތޯ ނަގާ ވޯޓެއް. ކޮންމެ ކަމެއް ވޯޓު ކަރުދާހުގައި އޮތަސް މި ބުނަން ޖެހެނީ އާއެކޭ ނޫނީ ނޫނެކޭ. ސުވާލު ހުށަހެޅީ ސަރުކާރުން. ސަރުކާރުން ކަން ކޮށްފައިވާ ގޮތަށް ބަލާ ރައްޔިތުން ދޭ ޖަވާބަކީ ނޫނެކޭ ކަމަށް ވުމަކީ މިކަން ވާނެ ގޮތް." ޝާހިދު ވިދާޅުވި އެވެ.
އެ ޖަލްސާގައި ވާހަކަދައްކަވަމުން ރައްޔިތުންގެ މަޖިލީހުގެ މަކުނުދޫ ދާއިރާގެ ކުރީގެ މެމްބަރު މުހައްމަދު ރާއި ވަނީ ސަރުކާރުން ފެންނަ ނުފެންނަ ވޯޓު ނަގަނީ އޮޅުވާލަން ކަމަށް ވިދާޅުވެފަ އެވެ. އަދި އިންތިޚާބަށް ފައިސާ ހޯދުމަށް ކޮރަޕްޝަނަށް މަގުފަހިވާ ގޮތަށް ކަންތައްތައް ކުރަމުންދާ ކަމަށް އޭނާ ވިދާޅުވި އެވެ . އެގޮތުން ގަވާއިދާއި ޚިލާފަށް ރާއްޖެ އަށް އެތެރެކޮށްފައިވާ ދުންފަތް، ކަސްޓަމްސް އިން ހިފަހައްޓާފައި ވަނިކޮށް އެ ތަކެތި ދޫކޮށްލާފައިވާ ކަމަށް އޭނާ ވަނީ ވިދާޅުވެފަ އެވެ. މީގެ އިތުރުން ރައްޔިތުންގެ މަޖިލީހުގެ ދައުރު ކުރުކޮށްލުމަށް ސަރުކާރުން ކުރަމުންދާ މަސައްކަތަކީ ރައީސް އަށް ވެސް ލިބިފައި ނެތް ބާރެއް ބޭނުން ކުރުން ކަމަށް އޭނާ ވިދާޅުވި އެވެ. ފެށުނީއްސުރެ ރައީސް ޑރ. މުހައްމަދު މުއިއްޒު ގެންދަވަނީ ރައްޔިތުންނަށް ދޮގުހައްދަވައި އޮޅުވާލައްވަމުން ކަމަށް ރާއި ވަނީ ވިދާޅުވެފަ އެވެ.
