މި ސަރުކާރަކީ އަގަލެއް ހުރި ސަރުކާރެއް ނަމަ އައްޑޫ ރައްޔިތުން ކައިރިއަށް ވޯޓު ހޯދަން ދާން ނުކެރޭނެ: ނިޒާރު
މި ސަރުކާރަށް ތިން އަހަރުވާން ކައިރިވާ އިރު އައްޑޫސިޓީގެ ތަރައްގީއަށް އެއްވެސް މަސައްކަތެއް ކޮށްދެވިފައި ނުވާތީ، ރައްޔިތުންގެ ގާތަށް ވޯޓު ހޯދަން ދާން ސަރުކާރަށް ކެރިގެން ނުވާނެ ކަމަށް މޭޔަރު އަލީ ނިޒާރު ވިދާޅުވި.
އައްޑޫގެ މޭޔަރ އަލީ ނިޒާރު | ރާއްޖެ އެމްވީ
މި ސަރުކާރަކީ އަގަލެއް ހުރި ސަރުކާރެއް ނަމަ އައްޑޫ ރައްޔިތުން ކައިރިއަށް ވޯޓު ހޯދަން ދާން ނުކެރޭނެ ކަމަށް އައްޑޫސިޓީގެ މޭޔަރ އަދި މޭޔަރ ކެނޑިޑޭޓް އަލީ ނިޒާރު ވިދާޅުވެއްޖެ އެވެ.
އޭނާ އެފަދައިން ވިދާޅުވީ އެމްޑިޕީގެ ހޭވައްލާ ތައްޔާރު ޖަލްސާގައި ވާހަކަދައްކަވަމުންނެވެ.
އައްޑޫ އަށްޓަކައި ކޮށްދެވުނު އެއްވެސް ކަމެއް ނެތްކަން ދުވާލުގެ އަލިކަން ފެންނަ ފަދައިން ސާފުކޮށް އެނގެން އޮތް ކަމަށް ނިޒާރު ވިދާޅުވި އެވެ. ސަރުކާރަށް 3 އަހަރު ވާން ކައިރި ވާއިރު އައްޑޫ އަށް އެއްވެސް ކުރިއެރުމެއް ނުލިބުމަކީ ބަލައިގަނެވޭ ކަމެއް ނޫން ކަމަށް ނިޒާރު ވިދާޅުވި އެވެ. ނިޒާރު ވިދާޅުވީ ނިމިދިޔަ ސަރުކާރުން ފަށާފައިވާ ކަންކަން ވެސް މި ސަރުކާރަށް ނުނިންމުނު ކަމަށެވެ. އެމްޑީޕީ ވެރިކަމުގައި އޮވެ ސަރުކާރު ކެނޑިޑޭޓުން ނެރުނީ ފަޚުރުވެރިކަމާއި އެކުގައި ކަމަށް އޭނާ ވިދާޅުވި އެވެ.
"ކުރިން ކައުންސިލް އިންތިޚާބުގައި ސަރުކާރާއި މެދު ކުރި ޝަކުވާ އަކީ މަގު ހަދަމުންދާތީ ގެއަށް ނުވަދެވޭ ވާހަކަ. 100 ކިލޯ މީޓަރުގެ މަގު ހިތަށް ގެންނަވާ ގަމުން ފަށައިގެން ހިތަދު އާއި ހަމަ އަށް ހަދާފައި އެއޮތީ. އެއީ ރަނގަޅު ފެންވަރަށް ހަދާފައި ހުރި ތަންތަން." އޭނާ ވިދާޅުވި އެވެ.
މި ސަރުކާރަކީ ފިކުރެއް، ވިސްނުމެއް އަދި ފަލްސަފާ އެއް ނެތް ބައެއް ކަމަށް ނިޒާރު ވަނީ ވިދާޅުވެފަ އެވެ. ނިޒާރު އިތުރަށް ވިދާޅުވީ ސަރުކާރަކުން ރައްޔިތުން ކައިރިއަށް ދާންވާނީ ރައްޔިތުންނަށް ބޭނުންވާ ފަދަ ކަންތައްތަކެއް ކޮށްދިނުމަށް ފަހުގައި ކަމަށެވެ. އެ ނޫން ހާލަތެއްގައި ސަރުކާރުގެ ކެނޑިޑޭޓުން ކަމަށް ބުނެ ޕްރޮމޯޓް ކުރުމަކީ މޮޔަ ކަމެއް ކަމަށް ވެސް އޭނާ ވިދާޅުވި އެވެ. އޭނާ ވަނީ ކުރިއަށް އޮތް ކައުންސިލް އިންތިޚާބުގައި އައްޑޫގެ ކުރިމަގަށްޓަކައި ވޯޓު ދޭން ވީ އެމްޑީޕީ އަށް ކަމަށް ވިދާޅުވެފަ އެވެ.
