އީރާނުގައި ކުރަމުންދާ ހަނގުރާމަ އަންނަ ޖޫން މަހުގެ ނިޔަލަށް ކުރިއަށްދާނަމަ، އިތުރު 45 މިލިއަން މީހުން ބަނޑުހައިހޫނުކަމުގެ ނުރައްކަލާ ކުރިމަތިލާންޖެހޭނެ: ޑަބްލިޔުއެފްޕީ
އީރާނުގެ ހަނގުރާމައާ ގުޅިގެން މުދާ އުފުލުމުގެ އަގުތައް ބޮޑުވެ، އަންނަ ޖޫން މަހުގެ ނިޔަލަށް އިތުރު 45 މިލިއަން މީހުން ބަނޑުހައިހޫނުކަމުގެ ނުރައްކަލަށް ހުށަހެޅިދާނެ ކަމަށް ޑަބްލިއުއެފްޕީން ވަނީ އިންޒާރުދީފައި. މި ހަމަލާތަކުގެ ސަބަބުން ދުނިޔޭގެ ބަނޑުހައިހޫނުކަން ރެކޯޑް މިންވަރަކަށް މައްޗަށް ދާނެ ކަމަށް ލަފާކުރެވޭއިރު، މުދާ އުފުލުމުގެ ޚަރަދު 18 އިންސައްތަ އުފުލުމަކީ އިންސާނީ އެހީ ފޯރުކޮށްދިނުމަށް އޮތް ބޮޑު ގޮންޖެހުމެއް. އެހީދޭ ޖަމިއްޔާތަކުގެ ބަޖެޓު ކުޑަވެފައިވާ ދަނޑިވަޅެއްގައި މިފަދަ އިތުރު ޚަރަދުތަކާ ކުރިމަތިލާންޖެހުމުން ދުނިޔޭގެ ހާލަތު އިތުރަށް ނާޒުކުވެގެންދާނެ ކަމަށް އެ ޖަމިއްޔާއިން ފާހަގަކުރޭ.
އިޒްރޭލުން ޣައްޒާ ހިސާރުކޮށް، މެދުކެނޑުމެއްނެތި ދެމުންދާ ހަމަލާތަކުގެ ސަބަބުން ކާބޯތަކެތި ހޯދުމަށް ދަތިވެފައިވާ ފަލަސްތީނުގެ ގިނަ އަދަދެއްގެ ރައްޔިތުންނާއި ކުޑަކުދިން، ޚައިރާތު ޖަމިއްޔާއަކުން ބަހާ ކެއުން ހޯދުމަށްޓަކައި ކިއޫގައި މަޑުކޮށްލައިގެން - ޖޫން 30، 2025. | ގެޓީ އިމޭޖަސް
އީރާނުގައި ކުރަމުންދާ ހަނގުރާމަ އަންނަ ޖޫން މަހުގެ ނިޔަލަށް ކުރިއަށްދާނަމަ، އިތުރު އެތައް މިލިއަން ބަޔަކު ބަނޑުހައިހޫނުކަމުގެ ނުރައްކަލާ ކުރިމަތިލާންޖެހޭނެ ކަމަށް ވޯލްޑް ފުޑް ޕްރޮގްރާމް (ޑަބްލިޔުއެފްޕީ) އިން އަންގާރަ ދުވަހު އާންމުކުރި ދިރާސާއަކުން ދައްކައިފިއެވެ.
މިދިޔަ ފެބްރުއަރީ މަހުގެ 26 ވަނަ ދުވަހު އެމެރިކާ އާއި އިޒްރޭލުން އީރާނަށް ދޭން ފެށި ހަމަލާތަކުގެ ސަބަބުން، އިންސާނީ އެހީ ފޯރުކޮށްދޭ މުހިންމު މަގުތައް ބަންދުވެ، ދުނިޔޭގެ އެންމެ ހާލުގައި ޖެހިފައިވާ ސަރަހައްދުތަކަށް ފޮނުވާ ކާބޯތަކެތީގެ ޝިޕްމަންޓްތައް ވަނީ މަޑުޖެހިފައެވެ. އީރާނުގެ ހަނގުރާމައިގެ ސަބަބުން އަންނަ ޖޫން މަހުގެ ނިޔަލަށް 45 މިލިއަން މީހުން ބަނޑުހައިހޫނުކަމުގެ ތެރެއަށް ވެއްޓިދާނެ ކަމަށް ޑަބްލިއުއެފްޕީން ބުނެއެވެ. ކާބޯތަކެއްޗާއި، ތެލާއި، މުދާ އުފުލުމުގެ އަގުތައް އުފުލުމުގެ ސަބަބުން އިތުރު 45 މިލިއަން މީހުން ބަނޑުހައިހޫނުކަމާ ކުރިމަތިލާންޖެހޭނެ ކަމަށް ލަފާކުރެވޭއިރު، މިއާއެކު ދުނިޔޭގައި ބަނޑުހައިހޫނުކަން ތަހައްމަލުކުރާ މީހުންގެ އަދަދު މިހާރު ހުރި ރެކޯޑް އަދަދު ކަމަށްވާ 319 މިލިއަނަށްވުރެ މައްޗަށް އަރާނެ ކަމަށް ޖެނީވާގައި ނޫސްވެރިންނާ ވާހަކަދައްކަވަމުން ޑަބްލިއުއެފްޕީގެ ޑެޕިއުޓީ އެގްޒެކެޓިވް ޑައިރެކްޓަރު ކާލް ސްކާއު ވިދާޅުވިއެވެ.
ކާލް ސްކާއު ވިދާޅުވީ، މީގެ ސަބަބުން ދުނިޔޭގެ ބަނޑުހައިހޫނުކަމުގެ މިންވަރު މިހާތަނަށް ރެކޯޑް ނުކުރެވޭހާ މަތީ މިންވަރަކަށް ދާނެ ކަމަށާއި، މިއީ ބިރުވެރި ނަތީޖާއެއް ކަމަށެވެ. އަދި މި ހަނގުރާމަ ފެށުމުގެ ކުރިންވެސް، ބަނޑުހައިހޫނުކަން ތަހައްމަލުކުރާ މީހުންގެ އަދަދަށާއި އެކަމުގެ ނުރައްކާތެރިކަމަށް ބަލާއިރު، ދުނިޔެ އޮތީ މީގެ ކުރިން ދުވަހަކުވެސް ކުރިމަތިނުވާ ފަދަ ނާޒުކު ފައްތަރެއްގައި ކަމަށް އޭނާ އިތުރަށް ވިދާޅުވިއެވެ.
ފެބްރުއަރީ 28 ގައި އެމެރިކާ އާއި އިޒްރޭލުން އީރާނަށް ހަމަލާދޭން ފެށި ފަހުން، މުދާ އުފުލުމުގެ ޚަރަދު 18 އިންސައްތަ އުފުލިފައިވާ ކަމަށާއި، ބައެއް އުޅަނދުތަކުގެ ދަތުރު ކުރާ މަގު ބަދަލުކުރަން ޖެހިފައިވާ ކަމަށް ސްކާއު ވިދާޅުވިއެވެ. މީގެ އިތުރުން، އެހީދޭ ގައުމުތަކުން ދިފާއީ ކަންކަމަށް ކުރާ ހޭދަ އިތުރުކުރުމާ ގުޅިގެން ޑަބްލިއުއެފްޕީގެ ބަޖެޓުން ބޮޑު ބައެއް އުނިކޮށްފައިވާ ދަނޑިވަޅެއްގައި، މިފަދަ އިތުރު ޚަރަދުތަކެއް ކުރަންޖެހުމަކީ ބޮޑު ގޮންޖެހުމެއް ކަމަށް އޭނާ ފާހަގަކުރެއްވިއެވެ.
