ހަނގުރާމައިގެ ސަބަބުން ބައިނަލްއަގުވާމީ އެއާލައިންތަކުން މެދުއިރުމައްޗަށް ކުރާ ދަތުރުތައް މެދުކަނޑާލާފައި އޮތް އޮތުން ދަންމާލައިފި

މެދުއިރުމަތީގެ މަސްރަޙު ނުތަނަވަސްވެ، ވައިގެ ދަތުރުފަތުރަށް ބުރޫއަރަމުންދާތީ، ބައިނަލްއަގުވާމީ ގިނަ އެއާލައިންތަކަކުން އެ ސަރަހައްދުގެ އެކި މަންޒިލްތަކަށް ކުރާ ދަތުރުތައް މެދުކަނޑާލާފައި އޮތް އޮތުން އިތުރު މުއްދަތަކަށް ދަންމާލައިފިއެވެ. މީގެ ސަބަބުން އެއާލައިންތަކުން ދަނީ ޝެޑިއުލްތަކަށް ބަދަލުތައް ގެނެސް، މުހިންމު ރޫޓުތަކުގެ އޮޕަރޭޝަންތައް މަދުކުރަމުންނެވެ.

ދަތުރުތައް މެދުކަނޑާލާފައިވާ މުއްދަތު އެންމެ ފަހުން އިތުރުކުރުމުން ހާމަވަނީ، ހިނގަމުންދާ ހަމަނުޖެހުންތަކުގެ ސަބަބުން އުދުހުންތަކަށް ކުރާ ނޭދެވޭ އަސަރު ބޮޑުވަމުންދާ ކަމެވެ. ސަލާމަތީ ކަންބޮޑުވުންތަކާއި، ވައިގެ ސަރަހައްދުތައް ބަންދުކުރުމާއި، މެދުއިރުމަތީގެ މުހިންމު ކޮރިޑޯތަކުގައި އޮޕަރޭޝަންތައް ކުރިއަށްގެންދިއުމަށް ހުރި ނިޒާމީ ގޮންޖެހުންތަކާ ހުރެ އެއާލައިންތަކުން ދަނީ މެދުނުކެނޑި ޝެޑިއުލްތަކަށް ބަދަލުތައް ގެންނަމުންނެވެ.

މި މައްސަލަތަކުގެ ސަބަބުން ޔޫރަޕް، އުތުރު އެމެރިކާ އަދި އޭޝިއާ، މެދުއިރުމަތީގެ މައި ހަބްތަކާ ގުޅުވައިދޭ ރޫޓުތަކަށް ވަނީ އަސަރުކޮށްފައެވެ. ބައެއް އެއާލައިންތަކުން ދަތުރުތައް މުޅިން ހުއްޓާލާފައިވާއިރު، އަނެއްބައި އެއާލައިންތަކުން ދަނީ ވަރަށް މަދު ދަތުރުތަކެއް ކުރަމުންނެވެ.

ޔޫރަޕްގެ އެއާލައިންތައް

ދަތުރުތައް މެދުކަނޑާލި އެއާލައިންތަކުގެ ބޮޑު ބައެއް ހިއްސާކުރަނީ ޔޫރަޕްގެ އެއާލައިންތަކުންނެވެ. އެގޮތުން ބްރިޓިޝް އެއާވޭޒް އިން ދުބާއީ، އަބޫދާބީ، އައްމާން، ބަހްރައިން އަދި ތެލް އަވީވަށް ކުރާ ދަތުރުތައް މެއި މަހުގެ 31 ވަނަ ދުވަހުގެ ނިޔަލަށް މެދުކަނޑާލާފައިވާއިރު، ދޯހާއަށް ކުރާ ދަތުރުތައް އޭޕްރީލް 30 އާ ހަމައަށް ވަނީ ހުއްޓާލާފައެވެ.

ލުފްތަންސާ އެއާލައިނުން ދުބާއީ، އަބޫދާބީ، އައްމާން، ބެއިރޫތު އަދި އާބިލަށް ކުރާ ދަތުރުތައް މާރިޗު 28 އާ ހަމައަށް ވަނީ މެދުކަނޑާލާފައެވެ. އަދި ރިޔާޟަށް ކުރާ ދަތުރުތައް އޭޕްރީލް 5 އަށް، ތެލް އަވީވަށް ކުރާ ދަތުރުތައް އޭޕްރީލް 9 އަށް، އަދި ތެހެރާނަށް ކުރާ ދަތުރުތައް އޭޕްރީލް 30 އާ ހަމައަށް އެ އެއާލައިނުން ވަނީ ހުއްޓާލާފައެވެ.

ސަންއެކްސްޕްރެސް އެއާލައިނުން ދުބާއީ އާއި ބަހްރައިނަށް ކުރާ ދަތުރުތައް މާރިޗު 23 އާ ހަމައަށް ވަނީ މެދުކަނޑާލާފައެވެ.

ކޭ.އެލް.އެމް އެއާލައިނުން ދައްމާމް، ރިޔާޟް އަދި ދުބާއީއަށް ކުރާ ދަތުރުތައް މާރިޗު 28 އާ ހަމައަށް ހުއްޓާލާފައިވާއިރު، ތެލް އަވީވަށް ކުރާ ދަތުރުތައް އޭޕްރީލް 11 އާ ހަމައަށް ވަނީ މެދުކަނޑާލާފައެވެ.

ޔޫރޯވިންގްސް އެއާލައިނުން އައްމާނަށް ކުރާ ދަތުރުތައް މާރިޗު 22 އަށް، އާބިލަށް ކުރާ ދަތުރުތައް މާރިޗު 28 އަށް، ބެއިރޫތަށް ކުރާ ދަތުރުތައް މާރިޗު 29 އަށް، ތެލް އަވީވަށް ކުރާ ދަތުރުތައް އޭޕްރީލް 2 އަށް، އަދި އަބޫދާބީ އާއި ދުބާއީއަށް ކުރާ ދަތުރުތައް ޖޫން 27 އާ ހަމައަށް ވަނީ މެދުކަނޑާލާފައެވެ.

ސްވިސް އެއާލައިނުން ދުބާއީއަށް ކުރާ ދަތުރުތައް މާރިޗު 28 އަށް އަދި ތެލް އަވީވަށް ކުރާ ދަތުރުތައް އޭޕްރީލް 9 އާ ހަމައަށް ވަނީ ހުއްޓާލާފައެވެ. އެއާބޯލްޓިކް އެއާލައިނުން ދުބާއީއަށް ކުރާ ދަތުރުތައް އޮކްޓޫބަރު މަހުގެ ނިޔަލަށް ވަނީ މެދުކަނޑާލާފައެވެ.

އެމެރިކާގެ އެއާލައިންތައް

އެމެރިކާގެ އެއާލައިންތަކުން ވެސް ވަނީ އެ ސަރަހައްދުގެ ރޫޓުތަކަށް ބަދަލުތައް ގެނެސްފައެވެ. ޑެލްޓާ އެއާލައިންސްއިން ތެލް އަވީވަށް ކުރާ ދަތުރުތައް އޭޕްރީލް 30 އާ ހަމައަށް ވަނީ މެދުކަނޑާލާފައެވެ.

އެމެރިކަން އެއާލައިންސްއިން ތެލް އަވީވް، އަބޫދާބީ، އައްމާން، ބަހްރައިން، ދޯހާ، ދުބާއީ އަދި ލާނަކާއަށް ކުރާ ދަތުރުތައް މެއި 31 އާ ހަމައަށް ވަނީ ހުއްޓާލާފައެވެ.

ޔުނައިޓެޑް އެއާލައިންސްއިން ދުބާއީ އާއި ތެލް އަވީވަށް ކުރާ ދަތުރުތައް އޭޕްރީލް 19 އާ ހަމައަށް ވަނީ މެދުކަނޑާލާފައެވެ.

ޓާކިޝް އަދި ސަރަހައްދީ އެއާލައިންތައް

ޓާކިޝް އެއާލައިންސް އާއި ސަރަހައްދީ އެހެން އެއާލައިންތަކަށް ބަލާއިރު، ޓާކިޝް އެއާލައިންސްއިން އީރާން، އިރާގު، ސޫރިޔާ، ލުބުނާން، އުރުދުން، ގަތަރު، ޔުނައިޓެޑް އަރަބް އެމިރޭޓްސް، ކުވެއިތު އަދި ބަހްރައިނަށް ކުރާ ދަތުރުތައް މާރިޗު މަހުގެ ނިޔަލަށް ވަނީ މެދުކަނޑާލާފައެވެ.

އޮމާންގެ ސަލާމް އެއާލައިނުން އިރާގު، ލުބުނާން އަދި އީރާނަށް ކުރާ ދަތުރުތައް އޭޕްރީލް މަހާ ހަމައަށް ހުއްޓާލާފައިވާއިރު، ކުވެއިތު، ދޯހާ އަދި ދައްމާމަށް ކުރާ ދަތުރުތައް މާރިޗު 31 އާ ހަމައަށް ވަނީ މެދުކަނޑާލާފައެވެ.

އޮމާން އެއާލައިނުން ދުބާއީ، އައްމާން، ބަހްރައިން، ދޯހާ، ދައްމާމް، ކުވެއިތު، ކޯޕަންހޭގަން، ބަޣުދާދު އަދި ޚަސަބަށް ކުރާ ދަތުރުތައް މާރިޗު 31 އާ ހަމައަށް ވަނީ ހުއްޓާލާފައެވެ.

އޭޝިއާގެ އެއާލައިންތައް

އޭޝިއާގެ އެއާލައިންތަކުން ވެސް ވަނީ ރޫޓުތައް މެދުކަނޑާލިކަން އިޢުލާންކޮށްފައެވެ. ސިންގަޕޯ އެއާލައިންސްއިން ދުބާއީއަށް ކުރާ ދަތުރުތައް މާރިޗު 28 އަށް އަދި ޖިއްދާއަށް ކުރާ ދަތުރުތައް މާރިޗު 17 އާ ހަމައަށް ވަނީ މެދުކަނޑާލާފައެވެ.

ގަލްފްގެ އެއާލައިންތައް ކަމަށްވާ ގަތަރު އެއާވޭޒް އާއި އެމިރޭޓްސްއިން ބުނީ، އޭޕްރީލް މަހުގެ ނިޔަލަށް އާންމުކޮށް ކުރާ ދަތުރުތައް ވަރަށް ބޮޑަށް މަދުކޮށްގެން ކުރިއަށްގެންދާނެ ކަމަށެވެ.

ވައިގެ ދަތުރުފަތުރަށް މި ބުރޫތައް އަރާފައިވަނީ މެދުއިރުމަތީގައި ހިނގަމުންދާ ހަމަނުޖެހުންތަކާ ގުޅިގެން ސަލާމަތީ ނުރައްކާތައް ބޮޑުވެ، އޮޕަރޭޝަންތައް ކުރިއަށްގެންދިއުމަށް ދަތިތަކާ ކުރިމަތިވެފައިވާ ދަނޑިވަޅެއްގައެވެ. މި ހަމަނުޖެހުންތަކުގެ އަސަރު ހަކަތައިގެ ބާޒާރަށާއި، ކަނޑުގެ ދަތުރުފަތުރަށާއި އިންވެސްޓަރުންގެ އިތުބާރަށް ވެސް ވަނީ ކޮށްފައެވެ. އެއާލައިންތަކުން ޝެޑިއުލްތަކަށް ބަދަލު ގެނައުމުގައި ސަލާމަތީ ކަންބޮޑުވުންތަކާއި ވައިގެ ސަރަހައްދުގެ ހުރަސްތަކަށް ރިއާޔަތްކޮށްފައިވާއިރު، ދަތުރުތައް މެދުކަނޑާލާފައި އޮންނަ މުއްދަތު އިތުރުވުމުން ސަރަހައްދީ ދަތުރުފަތުރާއި ގުޅުންތަކަށް ވަނީ ބޮޑު ލޮޅުމެއް އަރާފައެވެ.

ފެބްރުއަރީ 28 އިން ފެށިގެން އެމެރިކާ އާއި އިޒްރޭލުން ގުޅިގެން އީރާނަށް ދެމުންދާ ހަމަލާތަކުގައި މިހާތަނަށް 1،300 އެއްހާ މީހުން ވަނީ މަރުވެފައެވެ. މީގެ ތެރޭގައި އީރާނުގެ ރޫހާނީ ލީޑަރު އަލީ ޚާމަނާއީ ވެސް ހިމެނިވަޑައިގަންނަވައެވެ.

މީގެ ރައްދުގައި އީރާނުން ވަނީ ޑްރޯން އާއި މިސައިލް ބޭނުންކޮށްގެން އިޒްރޭލް، އުރުދުން، އިރާގު އަދި އެމެރިކާގެ އަސްކަރީ މަރުކަޒުތައް ހުރި ގަލްފްގެ ގައުމުތަކަށް ހަމަލާދީފައެވެ. މި ހަމަލާތަކުގައި މީހުން މަރުވެ، އުމްރާނީ ވަސީލަތްތަކަށް ގެއްލުން ލިބިފައިވާއިރު، ދުނިޔޭގެ ބާޒާރުތަކަށާއި ވައިގެ ދަތުރުފަތުރަށް ވަނީ ބޮޑެތި ހުރަސްތަކެއް ކުރިމަތިވެފައެވެ.