އަރަބި ތިން ގައުމެއްގައި ހުރި ހަކަތަ އުފައްދާ މުހިންމު މަރުކަޒުތަކުގެ ކައިރީގައި ދިރިއުޅޭ މީހުން ވަގުތުން އެ ސަރަހައްދުތައް ދޫކޮށް ދިއުމަށް އީރާނުން އަމުރުކޮށްފި

އީރާނުގެ ދެކުނުގައި ހުރި ގޭސް އުފައްދާ މަރުކަޒުތަކަކަށް ދިން ހަމަލާތަކާ ގުޅިގެން، ފާރިސީ ކަނޑުއޮޅީގެ އަރަބި ތިން ގައުމެއްގައި ހުރި ހަކަތަ އުފައްދާ މުހިންމު މަރުކަޒުތަކުގެ ކައިރީގައި ދިރިއުޅޭ މީހުން ވަގުތުން އެ ސަރަހައްދުތަކުން ދިއުމަށް އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރް.ޖީ.ސީ) އިން އަމުރުކޮށްފިއެވެ.

އައި.އާރް.ޖީ.ސީ އިން ނެރުނު އިންޒާރުގައި ބުނެފައިވަނީ ސައުދީ އަރަބިއްޔާ، ގަތަރު އަދި ޔުނައިޓެޑް އަރަބް އެމިރޭޓްސް (ޔޫ.އޭ.އީ) ގައި ހުރި ފަސް ކޮމްޕްލެކްސްއަކާއި، ދެ ރިފައިނަރީއަކާއި، ދެ ޕެޓްރޯކެމިކަލް ކޮމްޕްލެކްސްގެ އިތުރުން ގޭސް ފީލްޑެއް މިހާރު ވެފައިވަނީ އީރާނުން ބަދަލުހިފުމުގެ ގޮތުން ހަމަލާދޭނެ ސައްހަ އަމާޒުފަތްތަކަކަށް ކަމަށެވެ.

މި މަރުކަޒުތަކުގެ ކައިރީގައި ދިރިއުޅޭ ރައްޔިތުންނާއި، އެ ގައުމުތަކުގައި ވަޒަންވެރިވެފައިވާ މީހުންނާއި، އެ ތަންތަނުގައި މަސައްކަތްކުރާ މުވައްޒަފުންގެ ފުރާނަ ސަލާމަތްކުރުމަށްޓަކައި، އެ ސަރަހައްދުތަކުން ވަގުތުން ދިއުމަށް އައި.އާރް.ޖީ.ސީ އިން ވަނީ އިލްތިމާސްކޮށްފައެވެ.

މި އިންޒާރުގައި ބަޔާންކޮށްފައިވާ މަރުކަޒުތަކުގެ ތެރޭގައި ސައުދީ އަރަބިއްޔާގެ ސޭމްރެފް ރިފައިނަރީއާއި ޖުބައިލް ޕެޓްރޯކެމިކަލް ކޮމްޕްލެކްސް، ޔޫ.އޭ.އީގެ އަލް-ހުސްން ގޭސް ފީލްޑް، އަދި ގަތަރުގެ އަލް-މަސައިދު ހޯލްޑިންގް އެންޑް ޕެޓްރޯކެމިކަލް ކޮމްޕްލެކްސްގެ އިތުރުން ރަސް ލައްފާން ރިފައިނަރީގެ ފޭސް 1 އަދި 2 ހިމެނެއެވެ.

ފެބްރުއަރީ 28 ވަނަ ދުވަހު އެމެރިކާއާއި އިޒްރޭލުން ހަމަލާދޭން ފެށީއްސުރެ، އީރާނުގެ ހަކަތަ އުފައްދާ މުހިންމު މަރުކަޒުތަކަށް ދޭ ކޮންމެ ހަމަލާއަކީ ރަތް ރޮނގު ހުރަސްކުރުން ކަމަށް އީރާނުން ވަނީ އިންޒާރުދީފައެވެ. އަދި އެމެރިކާއާ ގުޅުން އޮންނަ ފާރިސީ ކަނޑުއޮޅީގެ ގައުމުތަކުގެ ތެޔޮ އަދި ގޭސް އުފައްދާ ތަންތަނަށް ބަދަލުހިފުމުގެ ހަމަލާދޭނެ ކަމުގެ ވައުދުވެސް އީރާނުން ވަނީ ވެފައެވެ.

އީރާނުގެ އޮއިލް މިނިސްޓްރީގެ އޮފިޝަލުން ބުދަ ދުވަހު ވިދާޅުވީ، އެމެރިކާއާއި އިޒްރޭލުގެ ވައިގެ ހަމަލާތައް އަމާޒުވެފައިވަނީ އީރާނުގެ އައްސޭރިފަށުގެ ރަށެއް ކަމަށްވާ އަސަލޫޔޭގައި ހުރި ރިފައިނަރީތަކުގެ ބައެއް ބައިތަކަށް ކަމަށެވެ. އަސަލޫޔޭއަކީ އީރާނާއި ގަތަރުގެ ކަނޑުގެ ބޯޑަރުގައި އޮންނަ، ދުނިޔޭގެ އެންމެ ބޮޑު ގޭސް ފީލްޑް ކަމަށްވާ ސައުތު ޕާސް އިން ނަގާ ގޭހުގެ ބޮޑު ބައެއް ސާފުކުރާ ރަށެވެ.

އައި.އާރް.ޖީ.ސީގެ ބަޔާނުގައި އިތުރަށް ބުނެފައިވަނީ، ފާރިސީ ކަނޑުއޮޅީގެ އަރަބި ގައުމުތަކުގެ ވެރިން އީރާނުގެ އިންޒާރުތަކަށް ފަރުވާކުޑަކޮށް، "ބީރު ކަންފަތެއް" ދެމުންދާ ކަމަށާއި، އެ ބޭފުޅުން ނިންމަވާ ނިންމެވުންތަކަކީ އެ ގައުމުތަކުގެ ރައްޔިތުންގެ އިހުސާސްތައް ރަމްޒުކޮށްދޭ ނިންމެވުންތަކެއް ނޫން ކަމަށެވެ.

"އެހެންކަމުން، މި ނިންމުންތަކުގެ ސަބަބުން ކުރިމަތިވާނެ ހުރިހާ ނަތީޖާއެއްގެ ފުރިހަމަ ޒިންމާ އެ ބޭފުޅުން އުފުއްލަވަން ޖެހޭނެއެވެ." އީރާނުން ބުނެފައިވެއެވެ.