އީރާންގެ އިންޓެލިޖެންސް މިނިސްޓަރަށް ހަމަލާ ދީފައިވާ ކަމަށް އިޒްރޭލް އިން ބުނެފި

އީރާންގެ އިންޓެލިޖެންސް މިނިސްޓަރު އިސްމާއީލް ހަތީބަށް ހަމަލާ ދީފައިވާ ކަމަށް، އިޒްރޭލްގެ ޗެނަލް 12 އިން ރިޕޯޓު ކޮށްފި އެވެ. 

އެ ރިޕޯޓުގައި ބުނެފައި ވަނީ، އީރާންގެ އިންޓެލިޖެންސް މިނިސްޓަރަށް އަމާޒުކޮށް އިޒްރޭލް އިން ވައިގެ ހަމަލާއެއް ދީފައިވާ ކަމަށާއި، އެ ހަމަލާގެ ލަނޑު ދަނޑިތައް ބަލަމުން އަންނަ ކަމަށެވެ. އެ އޮޕަރޭޝަންގެ ނަތީޖާ ދެނެގަތުމަށް މިހާރު މަސައްކަތް ކުރަމުން އަންނަަ ކަމަށް ވެސް ބުނެފައިވެ އެވެ. 

އީރާންގެ އިންޓެލިޖެންސް މިނިސްޓަރަށް ހަމަލާ ދީފައިވާ ކަމަށް އިޒްރޭލް އިން ބުނެފައިވާއިރު، އެކަމާ ގުޅިގެން އީރާން އިން މިހާތަނަށް ވަކި އެއްޗެއް ބުނެފައި ނު ވެއެވެ. އަދި މި މައްސަލައިގައި އީރާންގެ އޮފިޝަލުންގެ ފަރާތުން އެއްވެސް ރަސްމީ ބަޔާނެއް ނެރެފައި ނުވެ އެވެ. 

އިޒްރޭލް އިން މި ހަމަލާ ދީފައިވާއިރު، އަންގާރަ ދުވަހު ދިން ހަމަލާ ތަކެއްގައި ވަނީ އީރާންގެ ސެކިއުރިޓީ ޗީފް އަލީ ލަރިޖާނީ އާއި، ބަސީޖް ފޯސްގެ ކޮމާންޑަރު ގޮލާމްރޭޒް ސުލައިމާނީ ވެސް އަވަހާރަ ކޮށްލައިފަ އެވެ. އެ ދެ ބޭފުޅުންނަށް ހަމަލާ ދިނުމަށް ފަހު، އިޒްރޭލް އިން ވަނީ އެކަން ވެސް ރަސްމީކޮށް އިއުލާން ކޮށްފަ އެވެ.