ލަރިޖާނީ އަވަހާރަ ކޮށްލުން ރަޝިޔާ އިން ހަރުކަށި އިބާރާތުން ކުށްވެރި ކޮށްފި

އިޒްރޭލް އިން ދިން ހަމަލާ ތަކެއްގައި އީރާންގެ ސެކިއުރިޓީ ޗީފް އަލީ ލަރިޖާނީ އަވަހާރަ ކޮށްލާފައިވާއިރު، ރަޝިޔާ އިން އެކަން ހަރުކަށި އިބާރާތުން ކުށްވެރި ކޮށްފަ އެވެ. 

ރަޝިޔާގެ ރިޔާސީ ގަނޑުވަރު ކްރެމްލިންގެ ތަރުޖަމާނު ޑިމިޓްރީ ޕެސްކޮވް ވިދާޅުވީ، އީރާންގެ އެންމެ މަތީ ވެރިޔާ އާޔަތުﷲ އަލީ ޚާމަނާއީ އަށް ފަހު، އެ ޤައުމުގެ ސެކިއުރިޓީ ޗީފް ލަރިޖާނީ އަވަހާރަ ކޮށްލުން ރަޝިޔާ އިން ވަރަށް ބޮޑަށް ކުށްވެރި ކުރާ ކަަމަށެވެ. އަދި އީރާންގެ އިސްވެރިންނަށް އަމާޒުކޮށް އެމެރިކާ އާއި އިޒްރޭލް އިން ދެމުން އަންނަ ހަމަލާތައް ވެސް ރަޝިޔާ އިން ކުށްވެރި ކޮށްފައިވެ އެވެ. 

ނޫސްވެރިންނާ ވާހަކަ ދައްކަވަމުން ޕެސްކޮވް ވިދާޅުވީ، މިނިވަން މުސްތަޤިއްލު ޤައުމުގެ އިސްވެރިންނަށް ގެއްލުން ދިނުން، ނުވަތަ އަވަހާރަ ކޮށްލުމަށް ހިންގާ އެއްވެސް އަމަލެއް ރަޝިޔާ އިން ބަލައި ނުގަންނާނެ ކަމަށެވެ. އަދި އީރާންގެ އިތުރުން، އެހެން ޤައުމު ތަކުގެ އިސްވެރިންނަށް އަމާޒުކޮށް ހިންގާ ލާއިންސާނީ އަމަލުތައް އެންމެ ހަރުކަށި އިބާރާތުން ކުށްވެރި ކުރާ ކަމަށް ވެސް އޭނާ ވަނީ ވިދާޅުވެފަ އެވެ. 

ރަޝިޔާ އަކީ އީރާންއާ ގާތް ގުޅުމެއް ބާއްވަމުން އަންނަ ޤައުމެކެވެ. ރަޝިޔާ އިން ވަނީ، އެމެރިކާ އާއި އިޒްރޭލް އިން އީރާން އަށް ދެމުން އަންނަ ހަމަލާތައް ވަގުތުން ހުއްޓާލުމަށް ވެސް ގޮވާލައިފަ އެވެ. އެމެރިކާ އާއި އިޒްރޭލް އިން އީރާން އަށް ދޭން ފެށި ހަމަލާ ތަކާއި، ޚާމަނާއީ އަވަހާރަ ކޮށްލުން އެންމެ ފުރަތަމަ ކުށްވެރި ކުރެއްވި އެއް ބޭފުޅަކީ ވެސް ރަޝިޔާގެ ރައީސް ވްލަޑިމިއަރ ޕުޓިން އެވެ. 

މީގެ އިތުރުން ވޯލް ސްޓްރީޓް ޖާނަލް އިން އަންގާރަ ދުވަހު ކޮށްފައިވާ ރިޕޯޓެއްގައި ބުނެފައި ވަނީ، ރަޝިޔާ އިން ދަނީ އީރާންއާ އެކު އޮންނަ އަސްކަރީ އަދި ޖާސޫސޫ ގުޅުން އިތުރަށް ވަރުގަދަ ކުރަމުން ކަމަށެވެ. އެގޮތުން މެދު އިރުމަތީގައި ތިބި އެމެރިކާގެ ސިފައިންނަށް އަމާޒުކޮށް ހަމަލާ ދިނުމަށް އެހީތެރިވުމުގެ ގޮތުން، ރަޝިޔާ އިން އީރާން އަށް ސެޓެލައިޓް ފޮޓޯ ތަކާއި، ކުރިއަރާފައިވާ ޑްރޯން ޓެކްނޮލޮޖީ ފޯރު ކޮށްދެމުންދާ ކަމަށް ވެސް އެ ނޫހުގައި ވަނީ ބުނެފަ އެވެ. 

އެ ރިޕޯޓާ ގުޅޭ ގޮތުން ސުވާލު ކުރުމުން ޕެސްކޮވް ވިދާޅުވީ، އެއީ ހަގީގަތާ ޚިލާފު އަދި ކަނޑަ އެޅިގެން ދޮގު ޚަބަރު ތަކެއް ކަމަށެވެ. މިހާރު ހިނގަމުންދާ ހަނގުރާމައާ ގުޅިގެން ފެތުރެމުންދާ ގިނަ ޚަބަރު ތަކަކީ ހަގީގަތެއް ނެތް މައުލޫމާތު ތަކެއް ކަމަށާއި، އެފަދަ ކޮންމެ ވާހަކަ އަކަށް ރަސްމީކޮށް ޖަވާބު ދިނުމަކީ މުހިންމު ކަމެއްގެ ގޮތުގައި ނުދެކޭ ކަމަށް ވެސް ޕެސްކޮޮވް ވިދާޅުވި އެވެ.