ކޮންމެ ޙާލަތެއް ދިމާވި ނަމަވެސް، ހަނގުރާމައިގެ ތެރެއަށް އިނގިރޭސިވިލާތުން ނުވަންނާނެ ކަމަށް ބޮޑު ވަޒީރު ސްޓާމާ ވިދާޅުވެއްޖެ

އެމެރިކާ އާއި އިޒްރޭލް އިން އީރާނާ ދެކޮޅަށް ކުރަމުން އަންނަ ހަނގުރާމައިގެ ތެރެއަށް އިނގިރޭސިވިލާތުން ނުވަންނާނެ ކަމަށް، އެ ޤައުމުގެ ބޮޑު ވަޒީރު ކިއާ ސްޓާމާ ވިދާޅުވެއްޖެ އެވެ.

ބޮޑު ވަޒީރު މިހެން ވިދާޅުވެފައި ވަނީ، އީރާންގެ ހަނގުރާމައާ ގުޅޭ ގޮތުން އެމަނިކުފާނުގެ ސޯޝަލް މީޑިއާގައި އާންމު ކުރެއްވި ވީޑިއޯއެއްގަ އެވެ. އާންމުންގެ ސުވާލު ތަކަަށް ޖަވާބު ދިނުމަށް ކުރިއަށް ގެންދިޔަ އެ ވީޑިއޯގައި، އިނގިރޭސިިވިލާތުން ހަނގުރާމައިގެ ތެރެއަށް ވަންނާނެތޯ މީހަކު ވަނީ ސުވާލު ކޮށްފަ އެވެ. 

އެ ސުވާލަށް ޖަވާބު ދެއްވަމުން ބޮޑު ވަޒީރު ސްޓާމާ ވިދާޅުވީ، ކޮންމެ ޙާލަތެއް މެދުވެރިވި ނަމަވެސް އެމެރިކާ އާއި އިޒްރޭލުން، އީރާންއާ ދެކޮޅަށް ކުރިއަށް ގެންދާ ހަނގުރާމައިގެ ތެރެއަށް އިނގިރޭސިވިލާތުން ނުވަންނާނެ ކަމަށެވެ. އެ ހަނގުރާމައިގެ ސަބަބުން މެދު އިރުމަތީގެ މަސްރަހު ވަރަށް ބޮޑަށް ގޯސްވެފައިވާއިރު، ބޮޑު ވަޒީރު ވިދާޅުވީ މެދު އިރުމަތީގެ ސަރަހައްދުގައި އިނގިރޭސިވިލާތުގެ އެތައް ހާސް ރައްޔިތުންނެއް ދިރި އުޅެމުން އަންނަ ކަމަށެވެ. 

މީގެ އިތުރުން ބޮޑު ވަޒީރު ވިދާޅުވީ ހަނގުރާާމައިގެ އެއްވެސް ބޭނުމަކަށް، އިނގިރޭސިވިލާތުގައި ހުރި އެމެރިކާގެ އަސްކަރީ ބޭސްތައް ބޭނުން ކުރުމުގެ ހުއްދަ ނުދެއްވާނެ ކަމަށެވެ. އެކަން ފާހަގަ ކުރައްވައި ބޮޑު ވަޒީރު ވިދާޅުވީ އިނގިރޭސިވިލާތުން ނިންމާނީ އެ ޤައުމުގެ ރައްޔިތުންނާއި، ޤައުމުގެ ރައްކާތެރި ކަމުގެ ނިންމުން ކަމަށެވެ. އަދި އިނގިރޭސިވިލާތުގެ މަތިންދާ ބޯޓު އުފުލާ މަނަވަރުތައް ވެސް ހަނގުރާމައިގެ ބޭނުމަށް ދޫ ނުކުރައްވާނެ ކަމަށް ބޮޑު ވަޒީރު ވަނީ ވިދާޅުވެފަ އެވެ. 

އެމެރިކާ އާއި އިނގިރޭސިވިލާތަކީ ޒަމާނުއްސުރެ ވެސް ގާތް އަދި އެކުވެރި ގުޅުމެއް އޮންނަ ދެ ޤައުމެވެ. ނަމަވެސް، މެދު އިރުމަތީގެ މަސްރަަހަށް ބުރޫ އަރާނެ ހަނގުރާމައެއްގައި ބައިވެރި ނުވާނެ ކަމަށް، ބޮޑު ވަޒީރު ސްޓާމާގެ ސަރުކާރުން ވަނީ ބުނެފަ އެވެ. އީރާނާ ދެކޮޅަށް ހަމަލާ ދިނުމަށް އިނގިރޭސިވިލާތުގައި ހުރި އެމެރިކާގެ ބޭސްތައް ބޭނުން ކުރުމުގެ ހުއްދަ އަށް އެދުނު ނަމަވެސް، އިނގިރޭސިވިލާތުގެ ސަރުކާރުން އެ ހުއްދަ ދީފައި ނުވެ އެވެ. އެކަމުގެ ސަބަބުން އެމެރިކާގެ ރައީސް ޑޮނަލްޑް ޓްރަމްޕް ވަނީ ބޮޑު ވަޒީރު ސްޓާމާ އަށް ވަރަށް ބޮޑަށް ފާޑު ވިދާޅުވެފަ އެވެ.