ލަރިޖާނީގެ ޖަނާޒާ ބުދަ ދުވަހު، އީރާން އިން ބަދަލު ހިފާނެ

އިޒްރޭލްގެ ހަމަލާ ތަކުގައި އަވަހާރަ ވެފައިވާ އީރާންގެ ސެކިއުރިޓީ ޗީފް އަލީ ލަރިޖާނީގެ ޖަނާޒާ ބުދަ ދުވަހު ބާއްވަން ނިންމާފައިވާއިރު، އީރާން އިން އެކަމުގެ ބަދަކު ހިފާނެ ކަމުގެ އިންޒާރު ދީފި އެވެ. 

ލަރިޖާނީ އަށް އަމާޒުކޮށް ހަމަލާ ދީ، އަވަހާރަ ކޮށްލާފައިވާ ކަމަށް އިޒްރޭލް އިން ހާމަ ކުރީ އަންގާރަ ދުވަހު އެވެ. އޭގެ ފަހުން އީރާން އިން ވެސް ވަނީ، ލަރިޖާނީ އަވަހާރާވެފައިވާ ކަމަށް އިއުލާން ކޮށްފަ އެވެ. ލަރިޖާނީ އަކީ އީރާންގެ އަސްކަރިއްޔާގެ ތެރޭގައި ވެސް ވަރަށް ނުފޫޒު ގަދަ ބޭފުޅެކެވެ. 

ލަރިޖާނީ އަވަހާރަ ކޮށްލާފައިވާއިރު، ރައްދުގައި އީރާން އިން ވަނީ އިޒްރޭލް އަށް ވަރުގަދަ ހަމަލާ ތަކެއް ދީފަ އެވެ. އީރާން އިން ދިން މިސައިލް ހަމަލާ ތަކެއްގައި، އިޒްރޭލްގެ ވެރި ރަށް ތެލް އަވީވްގައި ދެ މީހަކު މަރުވެފައިވާ ކަމަށް ބުނެފައިވެ އެވެ. މީގެ އިތުރުން މެދު އިރުމަތީގެ ސަރަހައްދުގައި ހުރި އެމެރިކާގެ އަމާޒު ތަަކަށް ވެސް އީރާން އިން ހަމަލާ ދީފައިވެ އެވެ. 

އީރާންގެ ފާރިސް ނިއުސް އާއި ތަސްނީމް ނިއުސް އެޖެންސީ އިން ބުނެފައިވާ ގޮތުގައި، އިޒްރޭލް އިން އަވަހާރަ ކޮށްލި އީރާންގެ ސެކިއުރިޓީ ޗީފް ލަރިޖާނީ އާއި، އައިއާރުޖީސީގެ ބަސީޖް ފޯސްގެ ކޮމާންޑަރު ގޮލާމްރޭޒް ސުލައިމާނީގެ ޖަނާޒާ ބުދަ ދުވަހު ބޭއްވުމަށް ވަނީ ހަމަޖެހިފަ އެވެ. ސުލައިމާނީ ވެސް އަވަހާރަ ކޮށްލާފައި ވަނީ އަންގާރަ ދުވަހު އެވެ. 

އީރާންގެ ސިފައިންގެ އިސް ވެރިޔާ، އާމިރު ހާތިމް ވިދާޅުވީ ސުޕްރީމް ނެޝަނަލް ސެކިއުރިޓީ ކައުންސިލްގެ ސެކްރެޓަރީ އަވަހާރަ ކޮށްލުމުގެ ޖަވާބުގައި، އީރާން އިން ދޭނީ ހަރުކަށި އަދި ހިތާމަވެރި ރައްދެއްގެ ގޮތުގައި ކަމަށެވެ. އީރާން އިން އެކަމުގެ ބަދަލު ނުހިފައި ދޫ ނުކުރާނެ ކަމަށާއި، ދުޝްމަނުންނަށް ރައްދު ދިނުމަކީ ވާޖިބެއް ކަމަށް އޭނާ ވަނީ ވިދާޅުވެފަ އެވެ. 

އިޒްރޭލް އިން ލަރިޖާނީ އަވަހާރަ ކޮށްލާފައިވާއިރު، އެމެރިކާ އާއި އިޒްރޭލް އިން އެންމެ ފުރަތަމަ ދިން ހަމަލާ ތަކުގައި އީރާންގެ ކުރީގެ ރޫހީ ލީޑަރު އާޔަތުﷲ އަލީ ޚާމަނާއީ ވެސް ވަނީ އަވަހާރަވެފަ އެވެ. އީރާން އިން ޚާމަނާއިގެ ޖަނާޒާ ކުރިއަށް ގެންދަން ނިންމި ނަމަވެސް، ފަހުން ވަނީ އެކަން ފަސް ކޮށްފަ އެވެ.