އިތުރު ހުއްދައެއް ހޯދުމަކާ ނުލައި، އީރާންގެ އިސްވެރިންނަށް ހަމަލާ ދިނުމަށް އިޒްރޭލްގެ އަސްކަރިއްޔާ އަށް އަންގައިފި

އެމެރިކާ އާއި އިޒްރޭލް އިން އީރާންއާ ދެކޮޅަށް ކުރިއަށް ގެންދާ ހަނގުރާމައިގައި، އިތުރު އެއްވެސް ހުއްދައެއް ހޯދުމުކާ ނުލައި، އީރާންގެ އިސްވެރިންނަށް ހަމަލާ ދިނުމުގެ ފުރިހަމަ ހުއްދަ އިޒްރޭލްގެ އަސްކަރިއްޔާ އަށް ދީފައިވާ ކަމަށް އެ ޤައުމުގެ ޑިފެންސް މިނިސްޓަރު އިޒްރާއީލް ކާޓްޒް ވިދާޅުވެއްޖެ އެވެ.

އިޒްރޭލް އިން މި ނިންމުން ނިންމާފައި ވަނީ، އީރާންގެ އިސްވެރިންނަށް އަމާޒުކޮށް އިޒްރޭލް އިން ހަމަލާ ތަކެއް ދެމުން އަންނާތީ، އޭގެ ރައްދުގައި އީރާން އިން ވެސް ވަރުގަދަ ހަމަލާ ތަކެއް ދެމުން އަންނަ ވަގުތެއްގަ އެވެ. 

އިޒްރޭލްގެ ޑިފެންސް މިނިސްޓަރު ކާޓްޒް ހާމަ ކުރެއްވި ގޮތުގައި، އީރާންގެ ސަރުކާރާއި، އެ ޤައުމުގެ އަސްކަރިއްޔާގެ އިސް މަގާމު ތަކުގައި ތިއްބެވި ބޭފުޅުންނަށް އަމާޒުކޮށް ހަމަލާ ދިނުމުގެ އިޚްތިޔާރު އިޒްރޭލްގެ އަސްކަރިއްޔާ އަށް ދިނުމަށް އެ ޤައުމުގެ ބޮޑު ވަޒީރު ބެންޖަމިން ނަތަންޔާހޫ ވަނީ ނިންމަވައިފަ އެވެ. މި ނިންމުމާ އެކު، ކޮންމެ ފަހަރަކު ވަކި ވަކިން ސަރުކާރުގެ ހުއްދަ ހޯދުމަކާ ނުލައި، އަމާޒު ކުރެވޭ އީރާންގެ އޮފިޝަލުން އަވަހާރަ ކޮށްލުމުގެ ފުރުސަތު އިޒްރޭލްގެ އަސްކަރިއްޔާ އަށް އޮންނާނެ އެވެ. 

މީގެ ކުރިން އިޒްރޭލް އިން ބޭރު ޤައުމު ތަކުގެ އިސްވެރިންނަށް އަމާޒުކޮށް ހިންގާ މިފަދަ އޮޕަރޭޝަން ތަކަކީ ސަރުކާރުގެ އެންމެ މަތީ ފަންތިން ވަކި ވަކިން ހުއްދަ ތަކެއް ހޯދައިގެން ކުރިއަށް ގެންދާ ކަމެކެވެ. ނަމަވެސް، އައު ސިޔާސަތުގެ ދަށުން މި އިޖުރާއަތްތައް އުނި ކޮށްފައިވާ ކަމަށް ވަނީ ބުނެފަ އެވެ. މިއީ އީރާންގެ އަސްކަރީ ޤާބިލުކަން ކުޑަ ކުރުމަށް އިޒްރޭލް އިން ނިންމާފައިވާ ނިންމުމެއް ކަމަށް ބުނެފައިވެ އެވެ. 

ފާއިތުވި ދުވަސް ތަކުގައި އިޒްރޭލް އިން ވަނީ އީރާންގެ ސެކިއުރިޓީ ޗީފް އަލީ ލަރިޖާނީ އާއި، އައިއާރުޖީސީގެ ބަސީޖް ފޯސްގެ ކޮމާންޑަރު ގޮލާމްރޭޒް ސުލައިމާނީ އަވަހާރަ ކޮށްލައިފަ އެވެ. މި ދެ ބޭފުޅުން ވެސް އަވަހާރަ ކޮށްލާފައި ވަނީ، އެ ބޭފުޅުންނަށް އަމާޒުކޮށް އިޒްރޭލް އިން ދިން ޓާގެޓު ހަމަލާތަކެއްގަ އެވެ.