ހޮރްމޫޒް ކަނޑުއޮޅިއަށް މަނަވަރުތައް ފޮނުވުމަށް ޓްރަމްޕް ގޮވާލެއްވުމުން ގައުމުތަކުން ދިނީ ފިނި ޖަވާބެއް!

މެދުއިރުމަތީގައި ހިނގަމުންދާ ހަނގުރާމައިގެ ތެރޭގައި، އީރާނުން ބަންދުކޮށްފައިވާ ތެޔޮ އުފުލާ މުހިންމު މަގެއް ކަމަށްވާ ހޮރްމޫޒް ކަނޑުއޮޅިއަށް އެކި ގައުމުތަކުން މަނަވަރުތައް ފޮނުވުމަށް އެމެރިކާގެ ރައީސް ޑޮނަލްޑް ޓްރަމްޕް އެދިވަޑައިގަތުމާ ގުޅިގެން، ބައެއް ގައުމުތަކުން އެކަމާ ދެކޮޅު ހަދާފައިވާއިރު، އަނެއްބައި ގައުމުތަކުން ތިބީ ކަންކަން ވަމުންދާ ގޮތް ބެލުމުގައެވެ.

ރައީސް ޑޮނަލްޑް ޓްރަމްޕް ވިދާޅުވީ، ހޮރްމޫޒް ކަނޑުއޮޅިއަކީ އަމާން އަދި މިނިވަންކަމާއެކު ދަތުރުފަތުރު ކުރެވޭ ތަނަކަށް ހެދުމަށްޓަކައި، އެމެރިކާއިން އީރާނުގެ އައްސޭރިފަށަށާއި އެ ގައުމުގެ އުޅަނދުފަހަރަށް ބޮން އެޅުން ކުރިއަށް ގެންދާނެ ކަމަށެވެ. މީގެ އިތުރުން، އެ ސަރަހައްދަށް މަނަވަރުތައް ފޮނުވުމަށް އެހެން ގައުމުތަކަށް ވެސް ޓްރަމްޕް ވަނީ ގޮވާލައްވާފައެވެ.

މާރިޗު މަހުގެ 14 ވަނަ ދުވަހު "ޓްރުތް ސޯޝަލް" ގައި ކުރެއްވި ޕޯސްޓެއްގައި ޓްރަމްޕް ވިދާޅުވީ، އީރާނުން ކުރިމަތިކުރާ ހުރަސްތަކުގެ ސަބަބުން ގެއްލުންވާ ޗައިނާ، ފަރަންސޭސިވިލާތް، ޖަޕާން، ދެކުނު ކޮރެއާ އަދި އިނގިރޭސިވިލާތް ފަދަ ގައުމުތަކުން އެ ސަރަހައްދަށް މަނަވަރުތައް ފޮނުވާނެ ކަމަށް އުންމީދު ކުރައްވާ ކަމަށެވެ. އަދި އީރާނުގެ ބާރު ކަނޑުވާލާފައިވާތީ، އެ ކަނޑުއޮޅިއަކީ ދެން ނުރައްކަލެއް އޮތް ތަނަކަށް ނުވާނެ ކަމަށް ވެސް ޓްރަމްޕް ވިދާޅުވިއެވެ.

އެމެރިކާގެ ރައީސް ފަހުން އިންޒާރު ދެއްވި ގޮތުގައި، ހޮރްމޫޒް ކަނޑުއޮޅީގެ ސަލާމަތްތެރިކަން ކަށަވަރު ނުކުރެވިއްޖެނަމަ، އެއީ ނޭޓޯގެ މުސްތަގުބަލަށް އޮތް ވަރަށް ބޮޑު ނުރައްކަލެކެވެ.

ފެބްރުއަރީ 28 ވަނަ ދުވަހު އިޒްރޭލާއި އެމެރިކާއިން އީރާނަށް ހަމަލާދިން ފަހުން، އިންޑިއާ އާއި ޗައިނާ ފަދަ ގައުމުތަކަށް ތެޔޮ އުފުލާ މަދު އުޅަނދެއް ފިޔަވައި، އެހެން ހުރިހާ އުޅަނދަކަށް އީރާނުން ވަނީ އެ ކަނޑުއޮޅި ބަންދުކޮށްފައެވެ.

ދެ ހަފުތާއަށްވުރެ ގިނަ ދުވަސްވެފައިވާ މި ހަނގުރާމައިގެ ތެރޭގައި، އެ ކަނޑުއޮޅިން ދަތުރުކުރި މުދާ އުފުލާ ބައެއް އުޅަނދުތަކަށް "ގޮތް ނޭނގޭ ގޮތައް" ހަމަލާދީފައިވާއިރު، މި ހަމަލާތަކުގައި އެކަކު މަރުވެފައިވާ ކަމަށް ރިޕޯޓުތައް ބުނެއެވެ.

ދުނިޔޭގެ ބާޒާރަށް ސަޕްލައިކުރާ ތެލުގެ 20 އިންސައްތަ ދަތުރުކުރަނީ މި ކަނޑުއޮޅި މެދުވެރިކޮށެވެ. މި ހަމަނުޖެހުންތަކާ ގުޅިގެން ދުނިޔޭގެ ބާޒާރުގައި ތެލުގެ އަގު އުފުލިފައިވާއިރު، އޭޝިއާގެ ބައެއް ގައުމުތަކުން ދަނީ ތެޔޮ އިގްތިސާދު ކުރުމުގެ ފިޔަވަޅުތައް އަޅަމުންނެވެ.

އެމެރިކާގެ ކަނޑުގެ ސިފައިން މަނަވަރުތަކަށް ހިމާޔަތް ދީގެން ކަނޑުއޮޅިން ދަތުރުކުރެވިދާނެ ކަމަށް ޓްރަމްޕް ވިދާޅުވެފައިވެއެވެ. އެމެރިކާގެ އެނާޖީ ސެކްރެޓަރީގެ ރަސްމީ ސޯޝަލް މީޑިއާ އެކައުންޓުން އެމެރިކާގެ މަނަވަރެއް މިގޮތަށް ދަތުރުކޮށްފި ކަމަށް ބުނެ ކުރި ޕޯސްޓަކީ އޮޅުމަކުން ކުރެވުނު ޕޯސްޓެއް ކަމަށާއި، އަދި އެފަދަ ދަތުރެއް ކޮށްފައި ނުވާކަން ވަނީ ހާމަވެފައެވެ.

ޓްރަމްޕްގެ މި އެދިވަޑައިގަތުމަށް އެހެން ގައުމުތަކުން ދީފައިވާ ރައްދުތައް ތިރީގައި މިވަނީއެވެ.

ހޯމަ ދުވަހު ބޭއްވި ނޫސްވެރިންގެ ބައްދަލުވުމެއްގައި އިނގިރޭސި ބޮޑުވަޒީރު ސަރ ކިއަރ ސްޓާމަރ ވިދާޅުވީ، މިއީ އަމަލީ ގޮތުން ކުރެވިދާނެ ކަމެއްތޯ ދެނެގަތުމަށްޓަކައި އެމެރިކާ، ޔޫރަޕް އަދި ގަލްފުގެ ގައުމުތަކާއެކު މަޝްވަރާ ކުރަމުންދާ ކަމަށެވެ. ނަމަވެސް، އަދި ވަކި ގޮތެއް ނިންމާ ހިސާބަށް ނުދާ ކަމަށް އޭނާ ވިދާޅުވިއެވެ.

އާދީއްތަ ދުވަހު ބީބީސީން ކުރި ސުވާލަކަށް ޖަވާބު ދެއްވަމުން އިނގިރޭސި އެނާޖީ ސެކްރެޓަރީ އެޑް މިލިބޭންޑް ވިދާޅުވީ، ކަނޑުއޮޅި ހުޅުވުމަށް އެހީތެރިވެދޭނެ ހުރިހާ ގޮތްތަކެއް ބައިނަލްއަގުވާމީ ބައިވެރިންނާ ގުޅިގެން ބަލަމުންދާ ކަމަށެވެ.

އަސްކަރީ އޮޕަރޭޝަނުގެ ތަފްސީލު ދެއްވަން އިންކާރު ކުރައްވަމުން މިލިބޭންޑް ތަކުރާރުކޮށް ވިދާޅުވީ، ކަނޑުއޮޅި ހުޅުވުމަށް އޮތް އެންމެ ރަނގަޅު މަގަކީ މި ހަނގުރާމަ ހުއްޓާލުން ކަމަށެވެ.

ޖަރުމަނުވިލާތުގެ ސަރުކާރުގެ ތަރުޖަމާނަކު ވިދާޅުވީ، އީރާނާއެކު ކުރާ ހަނގުރާމައަކީ ނޭޓޯއާ އެއްވެސް ގުޅުމެއް އޮތް ކަމެއް ނޫން ކަމަށެވެ. އަދި އެ ގައުމުގެ ޑިފެންސް މިނިސްޓަރު ބޮރިސް ޕިސްޓޯރިއަސް ސުވާލު އުފެއްދަވަމުން ވިދާޅުވީ، އެމެރިކާގެ ވަރުގަދަ ކަނޑުގެ ސިފައިންނަށް ނުކުރެވޭ ކަމެއް ޔޫރަޕްގެ މަދު މަނަވަރުތަކަކުން އެކަން ކުރާނެ ކަމަށް ޓްރަމްޕް އުންމީދު ކުރައްވަނީ ކީއްވެގެންތޯއެވެ؟

"މިއީ އަހަރެމެންގެ ހަނގުރާމައެއް ނޫން. މިއީ އަހަރެމެން ފެށި ކަމެއްވެސް ނޫން،" ޕިސްޓޯރިއަސް ވިދާޅުވިއެވެ.

ފަރަންސޭސި ރައީސް އެމަނުއެލް މެކްރޯން މިދިޔަ ހަފުތާގައި ވިދާޅުވީ، އުޅަނދުފަހަރަށް ހިމާޔަތް ދިނުމަށާއި ދަތުރުފަތުރުގެ މިނިވަންކަން ކަށަވަރު ކުރުމަށްޓަކައި އިއްތިހާދެއް އެކުލަވާލުމަށް މަސައްކަތް ކުރައްވަމުންދާ ކަމަށެވެ.

ނަމަވެސް މެކްރޯން ވިދާޅުވީ، އެކަން ކުރެވޭނީ ހަނގުރާމައިގެ އެންމެ ނުރައްކާތެރި މަރުހަލާ ނިމުމުން ކަމަށެވެ. އޭގެ ދުވަސްކޮޅެއް ފަހުން އެ ގައުމުގެ ޑިފެންސް މިނިސްޓަރު ވިދާޅުވީ، ހޯރްމޫޒް ކަނޑުއޮޅިއަށް މަނަވަރުތައް ފޮނުވުމުގެ އެއްވެސް ރޭވުމެއް މިވަގުތު ނެތް ކަމަށެވެ.

މާރިޗު 14 ވަނަ ދުވަހު ފަރަންސޭސި ޚާރިޖީ ވުޒާރާއިން ބުނީ، އެ ގައުމުގެ މަނަވަރުތައް އަދިވެސް އޮތީ މެޑިޓެރޭނިއަން ކަނޑުގެ އިރުމަތީ ސަރަހައްދުގައި ކަމަށާއި، އެ މަނަވަރުތަކުގެ މަގްސަދަކީ ހަމައެކަނި ދިފާއީ މަސައްކަތް ކަމަށެވެ.

މަނަވަރު ފޮނުވުމަށް އެދިފައިވޭތޯ އާއި އެކަމަށް ދޭނީ ކޮން ޖަވާބެއްތޯ ހޯމަ ދުވަހު ނޫސްވެރިން ސުވާލު ކުރުމުން، ޗައިނާގެ ޚާރިޖީ ވުޒާރާގެ ތަރުޖަމާނު ލިން ޖިއާން ވިދާޅުވީ، އަސްކަރީ ހަމަލާތައް ވަގުތުން ހުއްޓާލުމަށާއި، މަސްރަހު އިތުރަށް ގޯސްވިޔަ ނުދިނުމަށް ޗައިނާއިން ތަކުރާރުކޮށް ގޮވާލާ ކަމަށެވެ.

ޖިއާން އިތުރަށް ވިދާޅުވީ، މަސްރަހު ފިނިކުރުމަށްޓަކައި ކަމާބެހޭ ފަރާތްތަކާއެކު ޗައިނާއިން މަޝްވަރާ ކުރަމުންދާ ކަމަށެވެ.

އާދީއްތަ ދުވަހު ދެކުނު ކޮރެއާގެ ޚާރިޖީ ވުޒާރާއިން ބީބީސީއަށް ބުނީ، ޓްރަމްޕްގެ ވާހަކަތަކަށް ވަރަށް ބޮޑަށް ސަމާލުކަން ދެމުންދާ ކަމަށާއި، ދެ ގައުމުގެ ދެމެދުގައި މަޝްވަރާކޮށް، ވަރަށް ބޮޑަށް ވިސްނުމަށްފަހު ގޮތެއް ނިންމާނެ ކަމަށެވެ.

"ދެކުނު ކޮރެއާ ސަރުކާރުން ދަނީ މެދުއިރުމަތީގެ މަސްރަހު ވަރަށް ގާތުން ބަލަމުން. އަދި ކޮރެއާގެ ރައްޔިތުންނާއި ތެޔޮ އުފުލާ މަގުތަކުގެ ސަލާމަތްތެރިކަން ކަށަވަރު ކުރުމަށް ކުރެވިދާނެ ކަންކަން ދަނީ ދިރާސާ ކުރަމުން،" އެ ވުޒާރާއިން ބުންޏެވެ.

ދެކުނު ކޮރެއާގެ ޑިފެންސް މިނިސްޓަރު އާން ގިއު-ބެކް އަންގާރަ ދުވަހު ޕާލަމެންޓުގައި ވިދާޅުވީ، ހޮރްމޫޒް ކަނޑުއޮޅިއަށް މަނަވަރެއް ފޮނުވާނަމަ ޕާލަމެންޓުގެ ހުއްދަ ބޭނުންވާނެ ކަމަށެވެ.

ޖަޕާނުގެ ބޮޑުވަޒީރު ސަނައޭ ޓަކައީޗީ ހޯމަ ދުވަހު ވިދާޅުވީ، މަނަވަރު ފޮނުވުމަށް އެދި ރަސްމީކޮށް އެއްވެސް ހުށަހެޅުމެއް ލިބިފައިނުވާ ކަމަށެވެ.

"ޖަޕާނު ސަރުކާރުން މިހާރު ދަނީ އަޅަންޖެހޭ ފިޔަވަޅުތައް ދިރާސާ ކުރަމުން. އެކަން ކުރާނީ ޖަޕާނުގެ ގާނޫނީ އޮނިގަނޑުގެ ތެރެއިން. ޖަޕާނުގެ އުޅަނދުފަހަރާއި ފަޅުވެރިންގެ ފުރާނަ ސަލާމަތް ކުރުމަށް ކުރެވޭނެ ކަންކަމާ މެދު އަޅުގަނޑުމެން ދަނީ ވިސްނަމުން،" ޓަކައީޗީ ވިދާޅުވިއެވެ.

ޓަކައީޗީ މާރޗް 19 ވަނަ ދުވަހު ވޮޝިންގޓަންގައި ޓްރަމްޕާ ބައްދަލުކުރެއްވުމަށް ވަނީ ހަމަޖެހިފައެވެ.

ޔޫރަޕްގެ އިއްތިހާދުގެ ޚާރިޖީ ސިޔާސަތާ ބެހޭ ވެރިޔާ ކާޖާ ކާލަސް ހޯމަ ދުވަހު ވިދާޅުވީ، އެ ސަރަހައްދުގައި މިހާރު ކުރިއަށްދާ ކަނޑުގެ މިޝަންގެ އުސޫލުތައް ބަދަލުކުރުމުގެ ޝައުގުވެރިކަމެއް މިވަގުތު ނެތް ކަމަށެވެ.

"ހޮރްމޫޒް ކަނޑުއޮޅީގެ ނުރައްކަލުގެ ތެރެއަށް އެއްވެސް ބަޔަކު އެ ގައުމެއްގެ ސިފައިން ފޮނުވާކަށް ބޭނުމެއް ނުވޭ،" ރޮއިޓާސް ނިއުސް އެޖެންސީއަށް ދެއްވި ބަސްދީގަތުމެއްގައި ކާލަސް ވިދާޅުވިއެވެ. އަދި ކަނޑުއޮޅި ހުޅުވުމަށްޓަކައި ޚާރިޖީ ގޮތުން ހައްލެއް ހޯދަންޖެހޭ ކަމަށްވެސް އޭނާ ވިދާޅުވިއެވެ.