އަރާގްޗީގެ ވަރުގަދަ ރައްދެއް: އީރާންގައި އޮތީ ވަރުގަދަ ސިޔާސީ ނިޒާމެއް، ލީޑަރުން އަވަހާރަ ކޮށްލިޔަސް ފަހަތަށް ޖެހުމެއް ނެތް

އެމެރިކާ އާއި އިޒްރޭލްގެ ހަމަލާ ތަކުގައި އީރާންގެ އިސް ލީޑަރުން އަވަހާރަ ކުރަމުން ގެންދިޔަ ނަމަވެސް، އީރާނަކީ ވަރުގަދަ ސިޔާސީ ނިޒާމެއް އޮތް ޤައުމެއް ކަމަށާއި، އެއްވެސް ކަމެއްގައި ފަހަތަށް ޖެހުމެއް ނޯންނާނެ ކަމަށް އީރާންގެ ފޮރިން މިނިސްޓަރު އައްބާސް އަރާގްޗީ ވިދާޅުވެއްޖެ އެވެ.

އަރާގްޗީ މިހެން ވިދާޅުވެފައި ވަނީީ، އީރާނުގެ ސެކިއުރިޓީ ޗީފް އަލީ ލަރިޖާނީ އާއި، އީރާންގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ)ގެ ބަސީޖް ފޯސްގެ ކޮމާންޑަރު ގޮލާމްރޭޒް ސުލައިމާނީ އަވަހާރަ ކޮށްލާފައި ވަނިކޮށެވެ. އީރާން އިން ވަނީ މި ދެ ބޭފުޅުން ވެސް އަވަހާރަވެފައިވާކަން ކަށަވަރު ކޮށްދީފަ އެވެ. 

އަލް ޖަޒީރާ އަށް ދެއްވި އިންޓަވިޔުއެއްގައި އަރާގްޗީ ވިދާޅުވީ، އީރާންގެ އިސްވެރިންނާއި ލީޑަރުން އަވަހާރަ ވުމަކީ އީރާންގެ ސަރުކާރަށް އެއްވެސް ފަސް ޖެހުމެއް އަންނާނެ ކަމެއް ނޫންކަމުގައެވެ. އަރާގްޗީ ވިދާޅުވީ، އެމެރިކާ އާއި އިޒްރޭލް އަށް މި ނުކުތާ އަދި ވެސް ނުވިސްނޭ ކަމަށާއި، އެކަމާ ހައިރާާންވާ ކަމަށެވެ. 

އެގޮތުން އީރާނަކީ ވަރުގަދަ ސިޔާސީ ނިޒާމެއް އޮތް ޤައުމެއް ކަމަށާއި، ސިޔާސީ، އިޤްތިޞާދީ އަދި އިޖުތިމާއީ މުއައްސަސާތައް ވަރަށް ބާރުވެރިކޮށް ޤާއިމު ކޮށްފައިވާ ޤައުމެއް ކަމަށް ވެސް އަރާގްޗީ ވަނީ ވިދާޅުވެފަ އެވެ. އެއާ އެކު އަރާގްޗީ ވިދާޅުވީ، ކޮންމެ ފަރުދަކީ ވެސް ނުފޫޒެއް އޮންނަ ފަރުދެއް ކަމަށާއި، ކޮންމެ މީހަކު އެ މީހެއްގެ ދައުރު އަދާ ކުރާ ކަަމަށެވެ. 

ތަކުރާރުކޮށް އަރާގްޗީ ވިދާޅުވެފައި ވަނީ އީރާންގެ ސިޔާސީ ނިޒާމަކީ ވަރަށް ބާރުވެރި ނިޒާމެއް ކަމަށާއި، އެއް ފަރުދަކު ނެތިގެން ދިޔުމަކީ ެ ނިޒާމަށް އަސަރެއް ކުރާނެ ކަމެއް ނޫން ކަމަށެވެ. އަދި އެކަމުގެ ޔަޤީންކަން ވަރަށް ފުރިހަމަ އަށް ދެއްވާ ކަމަށް ވެސް އަރާގްޗީ ވިދާޅުވި އެވެ. 

އެމެރިކާ އާއި އިޒްރޭލްގެ ހަމަލާ ތަކުގައި އީރާންގެ އެންމެ މަތީ ވެރިޔާ އަދި ކުރީގެ ރޫހީ ލީޑަރު އާޔަތުﷲ އަލީ ޚާމަނާއީ ވަނީ އަވަހާރަ ކޮށްލައިފަ އެވެ. އޭގެ އިތުރުން އިސް ކޮމާންޑަރުން ތަކެއް ވެސް އަވަހާރަ ކޮށްލާފައިވާއިރު، ލަރިޖާނީ އާއި ސުލައިމާނީ އަވަހާރަ ކޮށްލާފައި ވަނީ އަންގާރަ ދުވަހު އެވެ.