ލަރިޖާނީ އާއި ސުލައިމާނީ އަވަހާރަ ވެފައިވާކަން އީރާން އިން ކަށަވަރު ކޮށްދީފި
އައިއާރުޖީސީ އިން ބުނީ ލަރިޖާނީ އާއި އެހެން ބޭފުޅުން ޝަހީދު ކޮށްލި ކޮށްލުން ހަނދާން ނުނެތޭނެ ކަމަށް.
އީރާންގެ ސެކިއުރިޓީ ކައުންސިލްގެ ޗީފް ލަރިޖާނީ އާއި، ބަސީޖް ފޯސްގެ ކޮމާންޑަރު ސުލައިމާނީ | ރޮއިޓާސް
އީރާންގެ ސެކިއުރިޓީ ޗީފް އަލީ ލަރިޖާނީ އާއި، އީރާންގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ)ގެ ބަސީޖް ފޯސްގެ ކޮމާންޑަރު ގޮލާމްރޭޒް ސުލައިމާނީ އަވަހާރަވެފައިވާކަން ކަށަވަރު ކޮށްދީފި އެވެ.
އަންގާރަ ދުވަހު އިޒްރޭލް އިން ވަނީ ލަރިޖާނީ އާއި ސުލައިމާނީ އަަށް އަމާޒުކޮށް ހަމަލާ ދީ، އެ ދެ ބޭފުޅުން އަވަހާރަ ކޮށްލާފައިވާ ކަމަަށް އިއުލާން ކޮށްފަ އެވެ. އެކަން އިއުލާން ކުރީ އިޒްރޭލްގެ ޑިފެންސް މިނިސްޓަރު އިޒްރާއީލް ކާޓްޒް އެވެ.
އޭގެ އެތައް އިރު ތަކެއް ފަހުން އީރާން އިން ވަނީ ލަރިޖާނީ އާއި ސުލައިމާނީ އަވަހާރަ ވެފައިވާ ކަމަށް ހާމަ ކޮށްފަ އެވެ. އެގޮތުން އައިއާރުޖީސީ އިން ބުނީ، އެހެން ޝަހީދުންނެކޭ އެއް ފަދައިން ލަރިޖާނީގެ ހަނދާން ވެސް އަބަދަށް ހުންނާނެ ކަމަށެވެ. އަދި ލަރިޖާނީ އަކީ ހިތްވަރު ގަދަ އަދި ވިސްނުން ތޫނު ބޭފުޅެއްގެ ގޮތުގައި ވެސް ސިފަ ކޮށްފަ އެވެ.
އައިއާރުޖީސީ އިން ބުނީ ލަރިޖާނީ އާއި އެހެން ބޭފުޅުން ޝަހީދު ކޮށްލި ކޮށްލުން ހަނދާން ނުނެތޭނެ ކަމަށެވެ.
ލަރިޖާނީ އަކީ އީރާންގައި ވަރަށް ނުފޫޒު ގަދަ އަދި ޤަދަރުވެރި ބޭފުޅެކެވެ. ޚާއްޞަކޮށް އީރާންގެ އިސް ވެރިންނާއި، އަސްކަރިއްޔާގެ އޮފިސަރުން އަދި ރައްޔިތުން ވެސް އިންތިހާ އަށް އިޙުތިރާމް ކުރައްވާ ބޭފުޅެކެވެ.
މަސްދަރު: އަލް ޖަޒީރާ
