ލަރިޖާނީގެ އެކައުންޓުން ލިޔުމެއް ޕޯސްޓު ކޮށްފި، އީރާންގެ ރަސްމީ ބަހެއް ނެތް

އީރާންގެ ސެކިއުރިޓީ ޗީފް އަލީ ލަރިޖާނީ އަވަހާރަ ކޮށްލާފައިވާ ކަމަށް އިޒްރޭލުން ބުނެފައި ވަނިކޮށް، ލަރިޖާނީގެ ސޯޝަލް މީޑިއާ އެކައުންޓުން ލިޔުމެއް ޕޯސްޓު ކުރައްވައިފި އެވެ. 

ލަރިޖާނީގެ އެކްސް އެކައުންޓުގައި މި ލިޔުން ޕޯސްޓު ކުރައްވާފައިވާއިރު، އީރާންގެ ސަރުކާރާ ގުޅުން ހުރި މީޑިއާ ތަކުން ވެސް ވަނީ މި ނޯޓު ހިއްސާ ކޮށްފަ އެވެ. އަތުން ލިޔުއްވާފައިވާ އެ ނޯޓުގައި ވިދާޅުވެފައި ވަނީ، އެމެރިކާގެ ހަމަލާ ތަކުގައި އީރާންގެ ކަނޑުގެ ސިފައިން ތަކެއް އަވަހާރަވެފައިވާ ކަަމަށެވެ.  އަދި އެ މީހުންގެ ހަނދާން އަބަދު ވެސް ކުރާނެ ކަމަށާއި، އެ މީހުންގެ ހިތްވަރުގެ ސަބަބުން އީރާންގެ އަސްކަރިއްޔާ އަށް އިތުރު ހިތްވަރެއް ލިބޭނެ ކަމަށް ވެސް ލިޔުއްވާފައިވެ އެވެ. 

މީޑިއާ ރިޕޯޓުތައް ބުނާ ގޮތުގައި އެމެރިކާގެ ހަމަލާ ތަކުގައި އަވަހާރަވީ މީހުންގެ ޖަނާޒާ އަންގާރަ ދުވަހު އީރާންގައި ކުރިއަށް ގެންދިޔުމަށް ވަނީ ނިންމައިފަ އެވެ.  

އިޒްރޭލްގެ ޑިފެންސް މިނިސްޓަރުގެ އިތުރުން، އަސްކަރިއްޔާ އިން ވެސް ވަނީ ލަރިޖާނީ އަވަހާރަ ވެފައިވާ ކަމަށް ބުނެފަ އެވެ. ނަމަވެސް، މިހާތަނަށް އީރާންގެ އެއްވެސް ރަސްމީ އިދާރާ އަކުން އެކަމާ ގުޅޭ ގޮތުން އެއްޗެއް ބުނެފައި ނުވެ އެވެ. އެހެންވެ، ލަރިޖާނީ ދުނިޔޭގައި ހުންނެވި ކަމާ މެދު ސުވާލު އުފެދިފައިވާ ކަމަށް މީޑިއާ ތަކުގައި ބުނެފައިވެ އެވެ. 

ލަރިޖާނީ އަކީ އީރާންގެ ސަލާމަތީ ދާއިރާގައި އިސް ދައުރެއް އަދާ ކުރައްވާ އަދި ވަރަށް ނުފޫޒު ގަދަ ބޭފުޅެކެވެ. ބައެއް މީޑިއާ ތަކުގައި ބުނެފައި ވަނީ، ލަރިޖާނީގެ ސޯޝަލް މީޑިއާ އެކައުންޓުން މި ލިޔުން ހިއްސާ ކޮށްފައިވާއިރު، އޭނާ ދުނިޔޭގައި ހުންނެވުމުގެ ފުރުސަތު ވެސް އޮތް ކަަމަށެވެ.