ލަރިޖާނީ އަށް އަމާޒުކޮށް ހަމަލާދީ އަވަހާރަ ކޮށްލާފައިވާ ކަމަށް، އިޒްރޭލްގެ ޑިފެންސް މިނިސްޓަރު ވިދާޅުވެއްޖެ

އީރާންގެ ސެކިއުރިޓީ ޗީފް އަލީ ލަރިޖާނީ އަށް އަމާޒުކޮށް އިޒްރޭލްގެ އަސްކަރިއްޔާ އިން ހަމަލާ ދީފައިވާ ކަމަށް، އެ ޤައުމުގެ ދައުލަތުގެ މީޑިއާ އިން ބުނެފި އެވެ. 

އިޒްރޭލްގެ ދައުލަތުގެ މީޑިއާ އިން އަންގާރަ ދުވަހު ބުނެފައި ވަނީ، އިޒްރޭލްގެ އަސްކަރިއްޔާ އިން ލަރިޖާނީ އަށް އަމާޒުކޮށް ހަމަލާ ދީފައިވާ ކަަމަށެވެ. ނަމަވެސް، އެ ހަމަލާ ތަކުގައި ލަރިޖާނީ އަވަހާރަވެފައިވާ ކަމެއް، ނުވަތަ ލަރިޖާނީ އަށް އަނިޔާވެފައިވާ ކަމެއް ޔަޤީން ނުވާ ކަމަށް ވެސް ފާހަގަ ކޮށްފައިވެ އެވެ. އޭގެ ފަހުން އިޒްރޭލްގެ ޑިފެންސް މިނިސްޓަރު، އިޒްރާއީލް ކާޓްޒް ވިދާޅުވެފައި ވަނީ ލަރިޖާނީ އަވަހާރަ ކޮށްލާފައިވާ ކަމަށެވެ. 

އިޒްރޭލްގެ މި ރިޕޯޓާ ގުޅިގެން އީރާން އިން މިހާތަނަށް ވަކި އެއްޗެއް ބުނެފައި ނުވެ އެވެ. 

މިދިޔަ ހުކުރު ދުވަހު ލަރިޖާނީ ވަނީ އީރާންގެ ވެރި ރަށް ތެހެރާންގައި އޮތް ބޮޑު އެއްވުމެއްގައި ބައިވެރިވެ ވަޑައިގެންފަ އެވެ. އާންމުންގެ ތެރޭގައި ލަރިޖާނީ އުޅުއްވި މަންޒަރު ފެނިފައިވާއިރު، އީރާންގެ އެހެން އިސްވެރިން ވެސް ފެނިފައިވެ އެވެ. މިދިޔަ ހަފުތާގެ ތެރޭގައި ލަރިޖާނީ ވަނީ އެމެރިކާގެ ރައީސް ޑޮނަލްޑް ޓްރަމްޕަށް އިންޒާރު ދެއްވައި ވާހަކަ ދައްކަވައިފަ އެވެ. 

އެމެރިކާ އާއި އިޒްރޭލް އިން އީރާނާ ދެކޮޅަށް ދޭން ފެށި ހަމަލާ ތަކުގައި އެ ޤައުމުގެ ކުރީގެ ރޫހީ ލީޑަރު އާޔަތުﷲ އަލީ ޚާމަނާއީ ވަނީ އަވާހަރަ ކޮށްލައިފަ އެވެ.