މެދު އިރުމަތިން އެމެރިކާގެ ސިފައިން ބޭރުވާން ޖެހޭ، ސަލާމަތާއި ރައްކާތެރިކަން ހޯދާނީ ސަރަހައްދުގެ ޤައުމު ތަކުން: އީރާންގެ ޤާނޫނު ހަދާ މަޖިލީހުގެ ރައީސް

މެދު އިރުމަތީގެ ސަރަހައްދުގައި އެމެރިކާާގެ ސިފައިން ތިބެގެން ސަލާާމަތެއް ނޯންނާނެ ކަމަށާއި، އެ ސަރަހައްދުގެ ސަލާމަތާއި ރައްކާތެރިކަން ޤާއިމު ކުރަން ޖެހޭނީ ސަރަހައްދުގެ ޤައުމު ތަކުން ކަމަށް، އީރާންގެ ޤާނޫނު ހަދާ މަޖިލީހުގެ ރައީސް މުޙައްމަދު ބާގިރު ޣަލިބާފް ވިދާޅުވެއްޖެ އެވެ. 

ޤައުމީ ޓީވީ އަށް ދެއްވި ބަސްދީ ގަތުމެއްގައި ޣަލިބާފް ވިދާޅުވީ، މެދު އިރުމަތީގެ ނިޒާމު އަދި މޫނު މަތި ބަދަލުވާނެ ކަމަށެވެ. އެހެން ނަމަވެސް، އެއީ އެމެރިކާގެ ޕްލޭންތަކާ އެއްގޮތަށް ނޫން ކަމަށް ވެސް ޣަލިބާފް ވަނީ ވިދާޅުވެފަ އެވެ. 

މީގެ އިތުރުން ޣަލިބާފް ވިދާޅުވީ އެ ސަރަހައްދުގެ އިސްލާމީ ޤައުމުތަކުން، އެ ސަރަހައްދުގެ ނިޒާމު އަދި ރައްކާތެރިކަން ޤާއިމު ކުރާނެ ކަމަށެވެ. އިޤްތިޞާދީ ގޮތުން އަދި ސަލާމަތާ ގުޅޭ ގޮތުން އެ ސަރަހައްދުގެ ނިޒާމު ޤާއިމު ކުރުމުގައި، ސަރަހައްދުގެ ޤައުމު ތަކުން ބައިވެރި ވާނެ ކަމަށް ވެސް އޭނާ ވިދާޅުވި އެވެ. 

އެެއާ އެކު ޣަލިބާފް ވަނީ، މެދު އިރުމަތީގެ ސަރަހައްދުން އެމެރިކާގެ ސިފައިން ބޭރުވާން ޖެހޭ ކަމަށް ވިދާޅުވެފަ އެވެ. އެގޮތުން އެމެރިކާގެ ސިފައިން އެ ސަރަހައްދުގައި ޙަރަކާތްތެރި ވެގެން، އެ ސަރަހައްދުގެ ސަލާމަތާއި ރައްކާތެރި ކަމަށް އެއްވެސް ފައިދާއެއް ނުވާނެ ކަމަށް ވެސް ޣަލިބާފް ވަނީ ފާހަގަ ކުރައްވައިފަ އެވެ. 

މެދު އިރުމަތީގައި އެމެރިކާގެ ސިފައިންގެ ޙަރަކާތްތެރިކަމާ ގުޅިގެން، އެ ސަރަހައްދުގައި ދިގު މުއްދަތަކަށް ވަނީ ދަތިތަކާ ގޮން ޖެހުންތައް ކުރިމަތިވެފަ އެވެ. ޚާއްސަކޮށް އެ ސަރަހައްދުގެ ގިނަ ޤައުމު ތަަކަކުން، ސަރަހައްދުގައި އެމެރިކާގެ ސިފައިން ޙަރަކާތްތެރިވުމާ ދެކޮޅުކަން ފާހަގަ ކުރެވެ އެވެ. 

މީގެ ކުރިން ވެސް އީރާންގެ ވެރިން ވަނީ، އެ ސަރަހައްދުގައި އެމެރިކާގެ ސިފައިން ތިބުމަކީ އެ ސަރަހައްދުގެ ސަލާމަތާއި ރައްކާތެރި ކަމަށް ނޭދެވޭ އަސަރު ކުރާނެ ކަމެއް ކަމަށް ފާހަގަ ކޮށްފަ އެވެ. މެދު އިރުމަތީގެ ސަލާމަތާއި ރައްކާތެރިކަން ޤާއިމު ކުރުމުގައި، އެ ސަރަހައްދުގެ ޤައުމު ތަކުން ބައިވެރިވާން ޖެހޭ ކަމަށް އީރާން އިން އަބަދު ވެސް ބުނަމުން ގެންދެ އެވެ.