ޚަރްޖް އައިލެންޑަށް ހަމަލާ ދީފި ނަމަ، ރައްދުގައި ވަރުގަދަ ހަމަލާ ތަކެއްދީ އެ ޤައުމެއްގެ ތެލުގެ ވަސީލަތްތައް ހަލާކު ކޮށްލާނެ ކަމުގެ އިންޒާރު އީރާން އިން ދީފި

އީރާންގެ ތެޔޮ އެކްސްޕޯޓު ކުރާ މައިގަނޑު މަރުކަޒު ހުންނަ ޚަރްޖް އައިލެންޑަށް ހަމަލާއެއް ދީފި ނަމަ، އެ ހަމަލާއެއް ދިން ޤައުމެއްގެ ތެލުގެ ވަސީލަތްތައް ހަލާކު ކޮށްލާނެ ކަމުގެ އިންޒާރު އީރާން އިން ދީފި އެވެ. 

އީރާންގެ ސިފައިންގެ ބާރު ތަކުގެ އިސް ތަރުޖަމާނު ބްރިގޭޑިއާ ޖެނަރަލް އަބޫލްފަޒްލް ޝެކާރްޗީ މިފަދަ އިންޒާރެއް ދެއްވާފައިވާއިރު، މިދިޔަ ދުވަސް ތަކުގައި އެމެރިކާ އިން ވަނީ ޚަރްޖް އައިލެންޑަށް ހަމަލާ ދޭނެ ކަމުގެ އިންޒާރު ދީފަ އެވެ. 

ހޯމަ ދުވަހު ޝެކާރްޗީ ވިދާޅުވީ، އެމެރިކާ އިން ޚަރްޖް ޖަޒީރަ އަށާއި، އެ ތަނުގެ ތެލުގެ ވަސީލަތް ތަކަށް ހަމަލާ ދިނުމުން، އީރާން އިން އޭގެ ރައްދުގައި ވަރުގަދަ އަދި ހަރުދަނާ ހަމަލާ ތަކެއް ދޭނެ ކަމަށެވެ. އެފަދަ ޙާލައެއްގައި ޚަރްޖް އައިލެންޑަށް ހަމަލާ ދިން ޤައުމުގެއްގައި ހުރި ތެޔޮ އަދި ގޭހުގެ ވަސީލަތް ތަކަށް އީރާންގެ ސިފައިންގެ ހުރިހާ ބާރު ތަކުން ހަމަލާ ދޭނެ ކަމަށް ވެސް އޭނާ ވަނީ ވިދާޅުވެފަ އެވެ. 

އީރާންގެ ސިފައިންގެ ބާރުތަކުން އަންގާ ހުރިހާ އެންގުން ތަކެއް ތަންފީޒު ކުރާ ކަމަށާއި، އިންޒާރު ދިން ތަން ތަނުގައި އަމަލީ ގޮތުން ފިޔަވަޅު އަޅާފައިވާ ކަމަށް ތަރުޖަމާނު ފާހަގަ ކުރެއްވި އެވެ. އީރާނުގެ ރައްޔިތުންގެ މަސްލަހަތު ރައްކާތެރި ކުރުމުގައި އެއްވެސް ހުރަހެއް ނޯންނާނެ ކަމަށް ވެސް އޭނާ ވަނީ ވިދާޅުވެފަ އެވެ. 

އެމެރިކާގެ ހަމަލާ ތަކުގެ މެދުވެރި އަކަށް، ނުވަތަ މަސްދަރަކަށް ވާން ބޭނުންވާ ޤައުމު ތަކުން ދަންނަން ޖެހޭނީ އެފަދަ ހަމަލާއެއް ދިނުމުން، އީރާން އިން ރައްދުގައި އެ ޤައުމެއްގެ ތެޔޮ އަދި ގޭހުގެ ވަސީލަތް ތަކަށް، އަލިފާން ކުރިމަތި ކުރާނެ ކަމަށް ޝެކާރްޗީ ވިދާޅުވި އެވެ. 

ޚަރްޖް އައިލެންޑަކީ އީރާންގެ ކަނޑުގެ ސަރަހައްދުން ގާތް ގަނޑަކަށް 19 މޭލު ބޭރުގައި އޮންނަ ކުޑަ ރަށަކަށް ވާއިރު، އީރާންގެ މައިގަނޑު ތެޔޮ އެކްސްޕޯޓު ކުރާ ޓާމިނަލްތައް ހަދާފައި ހުރީ އެތަނުގަ އެވެ. އީރާން އިން އެކްސްޕޯޓު ކުރާ ތެލުގެ 90 އިންސައްތަ ދައުރު ކުރަނީ އެ ރަށުންނެވެ. ފާއިތުވި އަހަރުގެ ތެރޭގައި އެ ތަނުން ވަނީ ގާތް ގަނޑަކަށް 1.7 މިލިއަން ބެރަލުގެ ތެޔޮ އެކްސްޕޯޓު ކޮށްފައި ކަމަށް ރިޕޯޓުތައް ބުނެ އެވެ. 

މިދިޔަ ހުކުރު ދުވަހު އެމެރިކާގެ ސެންޓްރަލް ކޮމާންޑް އިން ބުނީ ޚަރްޖް ރަށުގައި ހުރި އީރާންގެ ސިފައިންގެ ތަން ތަނަށް ކާމިޔާބު ހަމަލާ ތަކެއް ދީފައިވާ ކަމަށެވެ. އެމެރިކާާގެ ރައީސް ޑޮނަލްޑް ޓްރަމްޕް ވިދާޅުވީ، އެ ރަށުގައި ހުރި ސިފައިންގެ ތަންތަން ހަލާކު ކޮށްފައިވީ ނަމަވެސް، އިންސާނިއްޔަތުގެ ސަބަބުން ތެލުގެ ވަސީލަތް ތަަކަށްހަމަލާ ނުދީ ދޫކޮށްލި ކަމަށެވެ. ނަމަވެސް، ހޮރުމޯޒް ކަނޑު އޮޅީގެ ތެރެއިން ދަތުރު ކުރާ ބޯޓު ތަކަށް އީރާން އިން، ނުވަތަ އެހެން ފަރާތަކުން ވެސް ހުރަސްއަޅައިފި ނަމަ، ވަގުތުން އެ ނިންމުން ބަދަލު ކުރައްވާނެ ކަމަށް ވެސް ޓްރަމްޕް ވިދާޅުވި އެވެ. 

އީރާންގެ އޮފިޝަލުން ބުނެފައި ވަނީ ޚަރްޖް އައިލެންޑުގައި ހުރި ސިފައިންގެ ތަންތަނާއި، އެއާޕޯޓަށް ގެއްލުން ތަކެއް ލިބުނު ނަމަވެސް، އެއްވެސް މީހަކު މަރުވެފައި ނުވާ ކަމަށެވެ. އަދި ތެޔޮ އެކްސްޕޯޓު ކުރުން ހިމެނޭ ގޮތުން ވިޔަފާރީގެ މަސައްކަތްތައް ކުރިއަށްދާ ކަމަށް ބުނެފައިވެ އެވެ.