ހޮރުމޯޒް ކަނޑުއޮޅިން ދަތުރު ކުރާ އުޅަނދު ތަކަށް އަސްކަރީ މަނަވަރު ތަކުގެ ހިމާޔަތް ދިން ނަމަވެސް، 100 އިންސައްތަ ރައްކާތެރިކަން ނެތް ކަމަށް ބުނެފި

ހޮރުމޯޒް ކަނޑު އޮޅިން ދަތުރު ކުރާ އުޅަނދު ފަހަރަށް އަސްކަރީ މަނަވަރު ތަކުގެ ހިމާޔަތް ދިން ނަމަވެސް، އެ އުޅަނދު ތަކުގެ ސަލާމަތާއި ރައްކާތެރިކަން 100 އިންސައްތަ އަށް ކަށަވަރުކޮށް ނުދެވޭނެ ކަމަށް، އިންޓަނޭޝަނަލް މެރިޓައިމް އޯގަނައިޒޭޝަން (އައިއެމްއޯ)ގެ ސެކްރެޓަރީ ޖެނަރަލް އާސެނިއޯ ޑޮމިންގޭޒް ވިދާޅުވެއްޖެ އެވެ. 

ފައިނޭންޝަލް ޓައިމްސް ނޫހަށް ދެއްވި އިންޓަވިޔުއެއްގައި ޑޮމިންގޭޒް ވިދާޅުވީ، ކަނޑު އޮޅި ހުޅުވާލުމަށްޓަކައި އަސްކަރީ އެހީތެރިކަން ހޯދުމަކީ ދާއިމީ، ނުވަތަ ދެމެހެއްޓެނިވި ޙައްލެއް ނޫން ކަމަށެވެ. 

ދުނިޔޭގައި ބޭނުން ކުރާ ތެލާއި، ސާފު ކުރި ގޭހުގެ 20 އިންސައްތަ އުފުލާ މުހިންމު މަގަކަށް ހޮރުމޯޒް ކަނޑު އޮޅި ވެފައިވާއިރު، މި ސަރަހައްދުގެ މަސްލަހަތު ގޯސްވެ، ދަތުރު ފަތުރުތައް ހުއްޓުމަކަށް އައުމާ ގުޅިގެން ދުނިޔޭގެ ބާޒާރުގައި ހަކަތައިގެ އަގު ވަނީ އުފުލިފަ އެވެ. މީގެ އިތުރުން މުދާ އުފުލާ ކުންފުނި ތަކުން މިހާރު ދަނީ މުދާ ސަޕްލައި ކުރުމުގައި ބޮޑެތި ގޮންޖެހުންތަކާ ކުރިމަތިލަމުންނެވެ. އޭގެ ތެރޭގައި އުޅަނދު ފަހަރުގެ މިސްރާބު ބަދަލު ކުރުމާއި، އެއްގަމު މަގުން މުދާ އުފުލަން ކުރަން ޖެހޭ ޚަރަދު ބޮޑުވުމުގެ އިތުރުން، އަވަހަށް ހަލާކުވާ ޒާތުގެ މުދާ ރައްކާތެރިކަމާ އެކު ފޯރުކޮށްދިނުމަށް ކުރާ މަސައްކަތްތައް ހިމެނެ އެވެ.

މެދު އިރުމަތީގައި ހިނގަމުންދާ ހަމަ ނުޖެހުންތަކާ ގުޅޭ ގޮތުން ވާހަކަ ދައްކަވަމުން ޑޮމިންގޭޒް ވިދާޅުވީ، ކަނޑު ދަތުރު ފަތުރާ އެއްވެސް ގުޅުމެއް ނެތް މައްސަލަ ތަކެއްގެ ސަބަބުން، އެ ދާއިރާ އަށް ބޮޑެތި ގެއްލުން ތަކެއް ލިބެމުން އަންނަ ކަމަށެވެ. އަދި ގަލްފު ސަރަހައްދުގައި ތާށިވެފައިވާ އުޅަނދު ފަހަރުގައި ތިބި ފަޅުވެރިންގެ ކާބޯ ތަކެއްޗާއި އެހެނިހެން ސާމާނު ހުސްވަމުން ދާތީ، އެކަމުގެ ކަންބޮޑުވުން އައިއެމްއޯގައި އެބައޮތް ކަމަށް ވެސް ޑޮމިންގޭޒް ވިދާޅުވި އެވެ. 

މި މައްސަލަ ތަކަށް މަޝްވަރާ ކުރުމަށްޓަކައި އައިއެމްއޯ ކައުންސިލްގެ ޚާއްސަ ބައްދަލުވުމެއްގެ މި ހަފުތާގެ ބުދަ، އަދި ބުރާސްފަތި ދުވަހު ލަންޑަންގައި ހުންނަ އެ އިދާރާގެ މައި މަރުކަޒުގައި ބޭއްވުމަށް ވަނީ ތާވަލު ކޮށްފަ އެވެ. މި ބައްދަލުވުމުގައި މެދު އިރުމަތީގެ ހަމަ ނުޖެހުން ތަކުގެ ސަބަބުން، ކަނޑު ދަތުރު ފަތުރަށާއި، ފަޅުވެރިންނަށް ކުރިމަތި ވަމުންދާ ނޭދެވޭ އަސަރުތަކާ މެދު ފުޅާ ދާއިރާއެއްގައި މަޝްވަރާ ކުރެވޭނެ އެވެ. 

އައިއެމްއޯގެ އިސްވެރިޔާ ވަނީ އުޅަނދު ފަހަރު ބަލަހައްޓާ ފަރަތް ތަކުން، ފަޅުވެރިންނާއި، އުޅަނދު ފަހަރު ނުރައްކަލުގެ ތެރެއަށް ހުށަނޭޅުމަށް އިލްތިމާސް ކުރައްވައިފަ އެވެ. މި ދަނޑި ވަޅުގައި ހޮރުމޯޒް ކަނޑު އޮޅިން ދަތުރު ކުރާ ތެޔޮ ޓޭންކަރު ތަަކަށް ހިމާޔަތް ދިނުމަށް އަސްކަރީ މަނަވަރުތައް ފޮނުވުމަށް އެމެރިކާގެ ރައީސް ޑޮނަލްޑް ޓްރަމްޕް އެދިފައިވާ އެދުމަށް ހުޅަނގުގެ ޤައުމު ތަކުން ދެކޮޅު ހެދުމުން، އެ ޤައުމު ތަކަށްވެސް ޑޮމިންގޭޒް ވަނީ ފާޑު ވިދާޅުވެފަ އެވެ.