ކުރިއަށް އޮތް މަދުވެގެން ތިން ހަފުތާއަށް އީރާނަށް ހަމަލާ ދިނުން ކުރިއަށް ގެންދިއުމުގެ ތަފްސީލީ ރޭވުންތަކެއް އެބަހުރި ކަމަށް އިޒްރޭލުން ބުނެފި

އިޒްރޭލުން އީރާނުގެ އެކި ސަރަހައްދުތަކަށް ވަރުގަދަ ހަމަލާތަކެއް ދެމުންދާއިރު، ކުރިއަށް އޮތް މަދުވެގެން ތިން ހަފުތާއަށް ހަނގުރާމަ ކުރިއަށް ގެންދިއުމުގެ ތަފްސީލީ ރޭވުންތަކެއް އެބަހުރި ކަމަށް އެ ގައުމުން ހޯމަ ދުވަހު ބުނެފިއެވެ. 

އެމެރިކާ އާއި އިޒްރޭލުން އީރާނާ ދެކޮޅަށް ކުރަމުންދާ ހަނގުރާމައަށް މިހާރު ތިން ހަފުތާ ވެފައިވާއިރު، މި ހަނގުރާމަ ނިމޭނެ ވަކި ތާރީޚެއް އަދި ނޭނގެއެވެ. މި ހަނގުރާމައިގެ ސަބަބުން ދުނިޔޭގެ ތެލާއި ކައްކާ ގޭހުގެ 20 އިންސައްތަ އުފުލާ މުހިންމު މަގު ކަމަށްވާ ހޯރްމޫޒް ކަނޑުއޮޅި ބަންދުވެ، ތެލުގެ އަގު އުފުލި، ދުނިޔޭގެ ބާޒާރުގައި ތަކެތީގެ އަގުތައް އަނެއްކާވެސް އިންތިހާއަށް އުފުލިދާނެ ކަމުގެ ބިރު ވަނީ ބޮޑުވެފައެވެ.

އެމެރިކާގެ ރައީސް ޑޮނަލްޑް ޓްރަމްޕް އާދީއްތަ ދުވަހު ވަނީ، ކަނޑުދަތުރުފަތުރުގެ މި މުހިންމު މަގު އަލުން ހުޅުވުމަށް އެހީތެރިވުމަށް ގައުމުތަކުގެ ކޯލިޝަނެއް އުފެއްދުމަށް ގޮވާލައްވާފައެވެ. އަދި ވޮޝިންޓަނަށް އެހީތެރިވުމަށް ނޭޓޯގެ މެންބަރު ގައުމުތަކުން ފަސްޖެހޭނަމަ، އެ އިއްތިހާދަށް ކުރިމަތިވާނީ "ވަރަށް ގޯސް" މުސްތަގުބަލެއް ކަމަށް ވިދާޅުވެ ޓްރަމްޕް ވަނީ އިންޒާރު ދެއްވާފައެވެ.

ހޯމަ ދުވަހު ބޭއްވި ނޫސްވެރިންގެ ބައްދަލުވުމެއްގައި އިޒްރޭލު އަސްކަރިއްޔާގެ ތަރުޖަމާނު ނަދާވް ޝޯޝާނީ ބުނީ، ކުރިއަށް އޮތް ތިން ހަފުތާއަށް އީރާނާ ދެކޮޅަށް ކުރިއަށްގެންދާނެ އަސްކަރީ އޮޕަރޭޝަންތަކުގެ ތަފްސީލީ ރޭވުންތައް އެބަހުރި ކަމަށާއި، އޭގެ ފަހުން ވެސް ކުރިއަށްދާނެ އިތުރު ޕްލޭންތަކެއް އެކުލަވާލާފައިވާ ކަމަށެވެ.

އިޒްރޭލުގެ އަސްކަރިއްޔާއިން ބުނާ ގޮތުގައި އެ ގައުމުގެ އަމާޒަކީ އީރާނުގެ ބެލިސްޓިކް މިސައިލް އޮނިގަނޑާއި، ނިއުކްލިއާ މަރުކަޒުތަކާއި، ސަލާމަތީ ނިޒާމަށް ހަމަލާދީ، އިޒްރޭލަށް ނުރައްކާ ކުރުމުގެ ގާބިލުކަން އީރާނުގެ ކިބައިން ނައްތާލުމެވެ.

"އަހަރެމެން ބޭނުންވަނީ މި ސަރުކާރަކީ ވީހާވެސް ބަލިކަށި ބައެއްކަން ކަށަވަރުކުރަން. އަދި އެމީހުންގެ ސަލާމަތީ ބާރުތަކުގެ ހުރިހާ ގޮފިތަކަކާއި ހުރިހާ ގާބިލުކަމެއް ނައްތާލަން،" ޝޯޝާނީ ބުނެފައިވެ އެވެ.

110،000 އަށްވުރެ ގިނަ ރިޒާވް ސިފައިން ނެރެފައިވާ އިޒްރޭލު އަސްކަރިއްޔާއިން ބުނީ، އީރާނުގެ އެތެރޭގައި ހަމަލާދޭންޖެހޭ އެތައް ހާސް އަމާޒެއް އަދިވެސް އެބަހުރި ކަމަށެވެ.

އީރާނުގެ ސެމީ އޮފިޝަލް ސްޓޫޑަންޓް ނިއުސް ނެޓްވޯކުން ރިޕޯޓްކޮށްފައިވާ ގޮތުގައި، ތެހެރާނުން ހަނގުރާމަ ހުއްޓާލުމަށް އެދިފައި ނުވާނެ ކަމަށާއި، އެމެރިކާއާއެކު އެއްވެސް މެސެޖެއް ބަދަލުކޮށްފައި ނުވާނެ ކަމަށް އީރާނުގެ ޚާރިޖީ ވަޒީރު އައްބާސް އަރާގްޗީ ހޯމަ ދުވަހު ވަނީ ވިދާޅުވެފައެވެ.

އަންގާރަ ވިލޭރޭ އިޒްރޭލުގައި، އީރާނުން ފޮނުވާލި މިސައިލްތަކުގެ ސަބަބުން އިންޒާރުދޭ ސައިރަންގެ އަޑު ވަނީ ގުގުމާލާފައެވެ.

އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރު.ޖީ.ސީ) އިން ނެރުނު ބަޔާނެއްގައި ބުނީ، ތެލް އަވީވްގެ ސަރަހައްދުތަކަށް ހަމަލާދީފައިވާ ކަމަށާއި، އޭގެ ތެރޭގައި ވައިގެ މަގުން ތެޔޮ އެޅުމަށް ބޭނުންކުރާ މަރުކަޒުތައް ހިމެނޭ ކަމަށެވެ.

ދުނިޔޭގެ އެންމެ ބާރުބޮޑު އެއް އެއާޕޯޓް ކަމަށްވާ ދުބާއީ އިންޓަނޭޝަނަލް އެއާޕޯޓުގެ ފްލައިޓްތައް ވަނީ އެތައް ގަޑިއިރަކަށް މެދުކަނޑާލާފައެވެ. އެއީ އެއާޕޯޓާ ކައިރީގައި ހުރި ތެޔޮ ރައްކާކުރާ މަރުކަޒަކަށް ޑްރޯން ހަމަލާއެއްދީ، އޭގެ ސަބަބުން އުޑުމައްޗަށް ކަޅު ދުންތައް އަރަން ފެށުމާ ގުޅިގެންނެވެ. ދުބާއީގެ ކަމާބެހޭ ފަރާތްތަކުން ބުނީ އަލިފާންގަނޑު މިހާރު ކޮންޓްރޯލް ކޮށްފައިވާ ކަމަށެވެ.

ސައުދީ އަރަބިއްޔާގެ އިރުމަތީ ސަރަހައްދުން އެއް ގަޑިއިރު ތެރޭގައި 34 ޑްރޯން ހުއްޓުވާފައިވާ ކަމަށް އެ ގައުމުގެ ދައުލަތުގެ މީޑިއާއިން ބުނެފައިވެއެވެ. މި ދެ ހާދިސާގައި ވެސް އެއްވެސް މީހަކަށް އަނިޔާއެއް ލިބިފައެއް ނުވެއެވެ.

އަނެއްކޮޅުން ހޯމަ ދުވަހު ތެލުގެ އަގު ވަނީ އުފުލިފައެވެ. ބްރެންޓް ކްރޫޑް ތެޔޮ ފީފާއެއްގެ އަގު 1 އިންސައްތައަށް ވުރެ މައްޗަށް ގޮސް، 104.50 ޑޮލަރަށް ވަނީ އަރާފައެވެ. 

އާދީއްތަ ދުވަހު ފްލޮރިޑާއިން ވޮޝިންޓަނަށް އެއާ ފޯސް ވަންގައި ދަތުރުކުރައްވަމުން ޓްރަމްޕް ވިދާޅުވީ، ގަލްފުގެ ތެލަށް ބޮޑަށް ބަރޯސާވާ ގައުމުތަކުން ހޯރްމޫޒް ކަނޑުއޮޅި ހިމާޔަތްކުރުމަށް އެހީތެރިވާންޖެހޭނެ ކަމަށެވެ.

ޓްރަމްޕް ގެ ގޮވާލުމަށް ތަރުހީބެއް ނުލިބުނު

ހަފުތާ ބަންދުގައި ސޯޝަލް މީޑިއާގައި ކުރެއްވި ޕޯސްޓެއްގައި ޓްރަމްޕް ވިދާޅުވީ ޗައިނާ، ފްރާންސް، ޖަޕާން، ދެކުނު ކޮރެއާ އަދި އިނގިރޭސިވިލާތް ފަދަ ގައުމުތަކުން މިކަމުގައި ބައިވެރިވާނެ ކަމަށް އުންމީދު ކުރައްވާ ކަމަށެވެ.

އިނގިރޭސި ބޮޑުވަޒީރު ކިއަރ ސްޓާމަރ ހޯމަ ދުވަހު ވިދާޅުވީ، އީރާނާއެކު ކުރާ ހަނގުރާމައެއްގެ ތެރެއަށް އިނގިރޭސިވިލާތް ނުވަންނާނެ ކަމަށެވެ. 

ޖަޕާނުން ބުނީ ޓްރަމްޕްގެ ގޮވާލުމަށް އިޖާބަދިނުމުގެ ގޮތުން އަސްކަރީ މަނަވަރުތައް ފޮނުވުމުގެ އެއްވެސް ރޭވުމެއް ނެތް ކަމަށެވެ. އަދި އީރާނުގެ ހަމަލާތަކުން ޔޫއޭއީ ދިފާއުކުރުމަށް އަސްކަރީ މަތިންދާބޯޓާއި މިސައިލް ފޮނުވާނެ ކަމަށް ބުނި އޮސްޓްރޭލިއާއިން ވެސް ބުނީ އެ ގައުމުގެ ކަނޑުގެ ސިފައިން ނުފޮނުވާނެ ކަމަށެވެ.

ޖަރުމަނުގެ ޑިފެންސް މިނިސްޓަރު ބޮރިސް ޕިސްޓޯރިއަސް ވަނީ އީރާނު ހަނގުރާމައިގެ އެއްވެސް އަސްކަރީ ހަރަކާތެއްގައި، އަދި ކަނޑުއޮޅި ހުޅުވުމުގެ މަސައްކަތުގައި ވެސް ޖަރުމަނުން ބައިވެރިނުވާނެ ކަމަށް ވިދާޅުވެފައެވެ. "މިއީ އަހަރެމެންގެ ހަނގުރާމައެއް ނޫން، މިއީ އަހަރެމެން ފެށި ކަމެއް ނޫން،" އޭނާ ވިދާޅުވިއެވެ.

ޓްރަމްޕް އާދީއްތަ ދުވަހު ފައިނޭންޝަލް ޓައިމްސްއަށް ވިދާޅުވީ، ހޯރްމޫޒް ކަނޑުއޮޅި ހުޅުވުމަށް ޗައިނާއިން އެހީތެރިނުވާނަމަ، މި މަހުގެ ފަހުކޮޅު ރައީސް ޝީ ޖިންޕިންއާ ބައްދަލުކުރެއްވުމަށް ހަމަޖެހިފައިވާ ދަތުރުފުޅު ފަސްކުރައްވަފާނެ ކަމަށެވެ.

ޔޫރަޕިއަން ޔޫނިއަންގެ ޚާރިޖީ ވަޒީރުން ހޯމަ ދުވަހު ބާއްވާ ބައްދަލުވުމުގައި، މެދުއިރުމަތީގައި އޮތް ކުޑަ އަސްކަރީ މިޝަން ވަރުގަދަކުރުމާ މެދު މަޝްވަރާ ކުރައްވާނެއެވެ. ނަމަވެސް، ބަންދުވެފައިވާ ހޯރްމޫޒް ކަނޑުއޮޅިއާ ހަމައަށް އެ މިޝަންގެ ދައުރު ފުޅާކުރުމަށް ނިންމާނެ ކަމަށް ނުބެލެވޭ ކަމަށް ޑިޕްލޮމެޓުންނާއި އޮފިޝަލުން ބުނެއެވެ.

އަނެއްކޮޅުން ހިޒްބުالله އާއި ހަމާސްގެ ހަނގުރާމަވެރިންނަށް އަމާޒުކޮށް އިޒްރޭލުން ލުބުނާނާއި ޣައްޒާ އަށް ދެމުންދާ ހަމަލާތައް ވަނީ ކުރިއަށް ގެންގޮސްފައެވެ. އިޒްރޭލު އަސްކަރިއްޔާއިން ހޯމަ ދުވަހު ބުނީ، ލުބުނާނުގެ ދެކުނުގައި ހިޒްބުالله އިން ހިފާފައިވާ ސަރަހައްދުތަކަށް އަމާޒުކޮށް އެއްގަމު މަގުން އޮޕަރޭޝަންތައް ފަށާފައިވާ ކަމަށެވެ.