ނަތަންޔާހޫ ދިރިހުރިކަން ސާބިތު ކޮށްދޭން ނެރުނު އާ ވީޑިއޯ އަކީ ފޭކެއްކަން ސާބިތުވެއްޖެ

ނަތަންޔާހޫ ދިރިހުރިކަން ސާބިތު ކޮށްދިނުމުގެ ގޮތުން ނެރުނު އާ ވީޑިއޯއަކީ ފޭކެއްކަން ސާބިތުވެއްޖެ އެވެ.

އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ މަރުވެފައިވާ ކަމަށް ސޯޝަލް މީޑިއާ ގައި ވާހަކަތައް ފެތުރޭން ފެށުމުން އެއީ ދޮގެއްކަން ދެއްކުމަށް އެންމެ ފަހުން އާންމުކުރި ވީޑިއޯއަކީ އާޓިފިޝަލް އިންޓެލިޖެންސް (އޭއައި) ބޭނުންކޮށްގެން އުފައްދާފައިވާ ވީޑިއޯއެއްކަން ސާބިތުވެ އަނެއްކާ ވެސް އޭނާ ދުނިޔޭގައި ހުރި ކަމާ މެދު ޝައްކުތައް އުފައްދާ އިތުރު ސުވާލުތައް ސޯޝަލް މީޑިއާ ގައި ވަނީ އާންމުވެފަ އެވެ.

ނަތަންޔާހޫއަށް ވީގޮތަކާ މެދު ފެތުރެމުންދާ އަޑުތައް ދޮގުކުރުމަށްޓަކައި، ހާމަ ކުރި ވީޑިއޯ އާންމު ކުރީ އޭނާގެ އޮފީހުންނެވެ. މީގެ ކުރިން އާންމުކުރި ވީޑިއޯއަކީ ވެސް އޭއައި ބޭނުންކޮށްގެން އުފައްދާފައިވާ އެއްޗެއްކަން ވަގުތުން ސާބިތުވެފައިވާތީ، މި ފަހަރުގެ ވީޑިއޯ އާންމުކުރީ އޭނާ މަރުވެފައިވާ ކަމަށް ނުވަތަ އަނިޔާވެފައިވާ ކަމަށް ކުރެވޭ ތުހުމަތުތަކަށް ނިމުމެއް ގެނައުމަށް ކަމަށް ބެލެވެ އެވެ.

އީރާނުން ދިން މިސައިލް ހަމަލާތަކުގައި ނަތަންޔާހޫ މަރުވެފައި ނުވަތަ ޒަޚަމްވެފައިވާ ކަމަށް ބުނެ އިބްރާނީ ބަހުންނާއި އިނގިރޭސި ބަހުން ޚަބަރު ފަތުރާ ވަސީލަތްތަކުގައި ދަނީ ތަފާތު ވާހަކަތައް ދެކެވެމުންނެވެ. އަދި އޭނާގެ އޭއައި ވީޑިއޯއެއް ފެނުމާއެކު މި ޝައްކުތައް ވަނީ އިތުރަށް ވަރުގަދަވެފައެވެ.

ޝައްކުތައް ފިލުވައިލުމަށް އެންމެ ފަހުން އާންމުކުރި ވީޑިއޯއަކީ ވެސް އޭއައި ބޭނުންކޮށްގެން ތައްޔާރުކޮށްފައިވާ ވީޑިއޯއެއްކަން ސާބިތުވުމާ ގުޅިގެން، އަދި ވެސް އުފެދިފައިވާ ސުވާލުތަކަށް ޖަވާބު ނުލިބޭ ކަމަށް ގިނަ ބަޔަކު އަންނަނީ ބުނަމުންނެވެ.

އިންޓަރނެޓް ބޭނުންކުރާ ފަރާތްތަކުން ސުވާލު އުފައްދަމުންދަނީ ނަތަންޔާހޫ މަރުވީތޯ، ނުވަތަ އޭނާ ސިއްރު ރައްކާތެރި ތަނެއްގައި ފިލައިގެން އުޅެނީތޯއެވެ. ނުވަތަ އޭނާ ފަށާފައިވާ ބޭކާރު ހަނގުރާމައެއްގެ ތެރެއިން އޭނާ ފިލާ ހުރެގެން އިޒްރޭލުގެ ރައްޔިތުންނާއި އެމެރިކާގެ އަސްކަރިއްޔާ ގުރުބާން ކުރަނީތޯ ވެސް ގިނަ ބަޔަކު ދަނީ ސުވާލު ކުރަމުންނެވެ.

އެންމެ ފަހުން އާންމުކުރި ވީޑިއޯއަކީ އޭއައި ވީޑިއޯއެއްކަން އެނގޭ އެންމެ ސާފު އެއް ހެއްކަކީ، ވީޑިއޯއިން ފެންނަ ކޮފީ ތަށި އެއްކޮށް ފުރިފައި ހުރި ނަމަވެސް، ތަށި އަރިކޮށްލާ އިރު ވެސް އޭގެއިން ތިއްކެއްގެ މިންވަރު ވެސް ބޭރުނުވުމެވެ. އަދި ނަތަންޔާހޫ ކޮފީ ބޮމުންދާއިރު ވެސް ތަށީގައި ހުރި ކޮފީ މަދުނުވާކަން ފާހަގަކުރެވެއެވެ.

މީގެ އިތުރުން، ވީޑިއޯއިން ފެންނަ ނަތަންޔާހޫގެ ސިފައަށް އަންނަ ބަދަލުތަކަކީ ވެސް މިއީ ފޭކް ވީޑިއޯއެއްކަން އަންގައިދޭ ހެއްކެކެވެ. ޚާއްސަކޮށް އޭނާގެ މޫނު އެއްފަރާތުން ފެންނައިރު، އެ މަންޒަރުތައް އޭނާގެ އަސްލު ފޮޓޯތަކާ އަޅާކިޔުމުން އެއީ ސައްހަ ވީޑިއޯއެއް ނޫންކަން ސާފުވެއެވެ.

ނަތަންޔާހޫގެ ވީޑިއޯއަކީ ފޭކެއްކަން ސާބިތުކޮށްދިނުމަށްޓަކައި، ބައެއް މީހުން ވަނީ ހަމަ އެ ބައްޓަމަށް އޭއައި ބޭނުންކޮށްގެން އަމިއްލަ ވީޑިއޯތައް އުފައްދާފައެވެ. މިގޮތުން އާންމުކޮށްފައިވާ އެއް ވީޑިއޯއެއްގައި ނަތަންޔާހޫގެ ބަދަލުގައި ފެންނަނީ އީރާނުގެ އައު ރޫހާނީ ލީޑަރު މުޖްތަބާ ޚާމަނާއީ އެވެ.