އެމެރިކާގެ ބޭސް ތަކަށް އީރާން އިން ހަމަލާ ދިނުމުން ހައިރާންވި، ލިބުނީ ޝޮކެއް: ޓްރަމްޕް

އެމެރިކާ އާއި އިޒްރޭލް އިން އީރާންއާ ދެކޮޅަށް ފެށި ހަނގުރާމައިގެ ރައްދުގައި، މެދު އިރުމަތީގައި ހުރި އެމެރިކާގެ ބޭސް ތަަކަށް އީރާން އިން ހަމަލާ ދިނުމަކީ ލިބުނު ހައިރާން ކަމެއް ކަމަށް، އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

ވައިޓް ހައުސްގައި ނޫސްވެރިންނާ ވާހަކަ ދައްކަވަމުން ޓްރަމްޕް ވިދާޅުވީ، އެކުވެރި ޤައުމު ތަކުގައި ހުރި އެމެރިކާގެ ބޭސް ތަކަށް އަމާޒުކޮށް އީރާން އިން ހަމަލާ ދިނުމަކީ ހައިރާންވީ ކަމެއް ކަމަށެވެ. އަދި އެކަމުގެ ސަބަބުން ބޮޑު ޝޮކެއް ވެސް ލިބުނު ކަމަށް ޓްރަމްޕް ވިދާޅުވި އެވެ. އެއާ އެކު ޓްރަމްޕް ވިދާޅުވީ، މެދު އިރުމަތީގައި ހުރި ޤައުމު ތަކަށް ހަމަލާ ދިނުމަކީ އީރާން އިން ކޮށްގެން ވާނެ ކަމެއް ނޫން ކަމަށެވެ.

ޓްރަމްޕް މިހެން ވިދާޅުވެފައިވާއިރު، މެދު އިރުމަތީގެ ޤައުމު ތަކުގައި ހުރި އެމެރިކާގެ އަސްކަރީ ބޭސް ތަކުގެ އިތުރުން، އެމްބަސީ ތަކަށް ވެސް އީރާން އިން ވަނީ ވަރުގަދަ ހަމަލާ ތަކެއް ދީފަ އެވެ. އެގޮތުން އެ ސަރަހައްދުގެ 12 ޤައުމެއްގައި ހުރި އެމެރިކާގެ އަމާޒު ތަކަށް އީރާން އިން ހަމަލާ ދީފައިވާ ކަމަށް ބައިނަލްއަޤުވާމީ މީޑިއާ ތަކުގައި ވަނީ ބުނެފަ އެވެ. 

ޓްރަމްޕް ވިދާޅުވީ އީރާން އިން ސައުދީ އަރަބިއްޔާ އާއި، ޤަތަރާއި، ޔޫއޭއީ، ބަހްރެއިން އަދި ކުވެއިތު ފަަދަ ޤައުމު ތަކަށް ހަމަލާ ދިންއިރު، އެއީ އެއްވެސް މީހަކު އަންދާޒާ ކޮށްގެން ހުރި ކަމެއް ނޫން ކަމަށެވެ. އެކަމުގެ ސަބަބުން "އަހަރަމެން ތިބީ ޝޮކެއްގައި ކަމަށް ވެސް ޓްރަމްޕް ވިދާޅުވެފައިވެ އެވެ. 

އެމެރިކާ އާއި އިޒްރޭލް އިން އީރާންއާ ދެކޮޅަށް ހަމަލާ ދޭން ފަށާފައި ވަނީ މިދިޔަ ފެބްރުވަރީ މަހުގެ 28 ވަނަ ދުވަހު އެވެ. އެ ހަމަލާ ތަކުގައި އީރާންގެ އެންމެ މަތީ ވެރިޔާ، އަދި ރޫހީ ލީޑަރު އާޔަތުﷲ އަލީ ޚާމަނާއީ ވެސް ވަނީ އަވަހާރަ ކޮށްލައިފަ އެވެ. އޭގެ އިތުރުން އީރާންގެ އަސްކަރީ އިސް ކޮމާންޑަރުންނާއި، އޮފިސަރުން ވެސް ވަނީ އަވަހާރަވެފަ އެވެ. 

އެ ހަމަލާ ތަކުގެ ރައްދުގައި އީރާން އިން ހަމަލާ ދޭން ފަށާފައިވާއިރު، މިހާތަނަށް އީރާން އިން ގެންދަނީ ދޫ ދިނުމެއް ނެތި، ވަރުގަދަ ހަމަލާ ތަކެއް ދެމުންނެވެ.