އީރާނާ ދެކޮޅަށް ކުރަމުންދާ ހަނގުރާމަ ދިގު ދެންމުމަށް ސައުދީން ހިތްވަރުދޭ ކަމަށް ބުނި ރިޕޯޓް ދޮގުކޮށްފި
އީރާނަށް ހަމަލާދިނުމަށް ސައުދީ އަރަބިއްޔާއިން އެމެރިކާއަށް ބާރުއަޅަމުންދާ ކަމަށް ނިއުޔޯކް ޓައިމްސް އާއި ވޮޝިންގޓަން ޕޯސްޓުން ވަނީ ރިޕޯޓު ކޮށްފައި.
އީރާނުގެ ތެހެރާންގެ ހުޅަނގު އުތުރުގައި ހުންނަ ޝަހްރާން ތެޔޮ ސާފުކުރާ ކާރުޚާނާއަށް 2026 މާރިޗު 8 ވީ އާދީއްތަ ދުވަހުގެ ރޭ ދިން ވައިގެ ހަމަލާތަކާ ގުޅިގެން އުފެދުނު ބޮޑު އަލިފާންގަނޑުން އަރަމުންދިޔަ ދުންގަނޑުތަކުގެ ތެރޭގައި، އީރާނުގެ ރެޑް ކްރެސެންޓް ސޮސައިޓީގެ އަންހެން މެންބަރުންތަކެއް ހަރަކާތްތެރިވަނީ. | ގެޓީ އިމޭޖަސް
އީރާނާއެކު ދިގުދެމިގެންދާ ހަނގުރާމައަކަށް ސައުދީ އަރަބިއްޔާގެ ލީޑަޝިޕުން ހިތްވަރުދޭ ކަމަށް ބުނެ "ދަ ނިއުޔޯކް ޓައިމްސް" އިން ޝާއިއުކުރި ރިޕޯޓަކީ ދޮގު ރިޕޯޓެއް ކަމަށް ސައުދީގެ މަސްދަރަކުން ހޯމަ ދުވަހު އަލް އަރަބިއްޔާ ނޫހަށް މައުލޫމާތު ދީފި އެވެ.
މި މަސްދަރުން މިހެން ބުނެފައި މިވަނީ، ސައުދީގެ ވަލީއަހުދު މުހައްމަދު ބިން ސަލްމާން، އެމެރިކާގެ ރައީސް ޑޮނަލްޑް ޓްރަމްޕަށް "އީރާނަށް ވަރުގަދަ ހަމަލާތަކެއް ދިނުމުގައި ދެމިއޮތުމަށް" ލަފާދެއްވަމުން ގެންދަވާ ކަމަށް ބުނެ އާދީއްތަ ދުވަހު ނިއުޔޯކް ޓައިމްސްއިން ރިޕޯޓެއް ޝާއިއުކޮށްފައި ވަނިކޮށެވެ.
މީގެ އިތުރުން، އީރާނަށް ހަމަލާދިނުމަށް ސައުދީ އަރަބިއްޔާއިން ސިއްރިއްޔާތުގައި ޓްރަމްޕަށް ބާރުއަޅަމުންދާ ކަމަށް ބުނެ "ދަ ވޮޝިންގޓަން ޕޯސްޓް" އިން ނެރުނު ރިޕޯޓެއް ވެސް، ވޮޝިންގޓަންގައި ހުންނަ ސައުދީ އެމްބަސީން މި މަހުގެ ކުރީކޮޅު ވަނީ ދޮގުކޮށްފައެވެ.
ސަރަހައްދުގެ އެއްވެސް ހަނގުރާމައެއްގައި އެ ގައުމުން ބައިވެރިނުވާނެ ކަމަށް ސައުދީން މީގެ ކުރިން ބުނެފައިވެ އެވެ.
މަސްދަރު: އަލްއަރަބިއްޔާ
