ފާއިތުވި ދުވަސްތަކުގައި އީރާނުން އެމެރިކާއާ މުއާމަލާތްކުރަން މަސައްކަތްކޮށްފައިވާ ކަމަށް ބުނެ ފަތުރަމުންދާ ރިޕޯޓްތަކަކީ ކަނޑައެޅިގެން ދޮގެއް: އީރާން
އެމެރިކާއާއެކު މަޝްވަރާކުރަން އީރާނުން މަސައްކަތްކުރާ ކަމަށް ބުނެ ފަތުރާ ޚަބަރުތައް އެ ގައުމުގެ އިސް އޮފިޝަލުން ދޮގުކުރައްވައިފި. އީރާނުގެ ޚާރިޖީ ވަޒީރު ވިދާޅުވީ އެމެރިކާއާއި އިޒްރޭލުގެ އުދުވާނުތަކާ ދެކޮޅަށް ސާބިތުކަމާއެކު ދިފާއީ މަސައްކަތް ކުރިއަށްގެންދާނެ ކަމަށާއި، ހަމަލާ ބަދަލުކުރުން ހުއްޓާލުމަށް އެދި އެއްވެސް މެސެޖެއް ފޮނުވާފައި ނުވާނެ ކަމަށް. އަދި އެމެރިކާގެ ވައުދުތަކަށް އިތުބާރެއް ނެތް ކަމަށާއި، ގައުމީ މަސްލަހަތު ކަށަވަރުނުވާ އެއްވެސް އެއްބަސްވުމެއްގައި ސޮއިނުކުރާނެ ކަމަށްވެސް އީރާނުން ވަނީ ބުނެފައި.
އީރާނުގެ ތެހެރާނުގައި ހުންނަ ޝަހްރާން ތެޔޮ ގުދަނަށް އެމެރިކާއާއި އިޒްރޭލުން ދިން ހަމަލާތަކަކާ ގުޅިގެން، 2026 މާރިޗު 8 ވީ އާދީއްތަ ދުވަހު އެ ތަނުގައި ބޮޑު އަލިފާނުގެ ހާދިސާއެއް ހިނގާފައިވާ މަންޒަރު. މި ހަމަލާތަކުގެ ސަބަބުން އެ ސަރަހައްދުގައި ހުރި ގިނަ އަދަދެއްގެ ތެޔޮ ބައުޒަރުތަކާއި އުޅަނދުފަހަރު ބޭނުންނުކުރެވޭ ވަރަށް ވަނީ ހަލާކުވެފައި. | ގެޓީ އިމޭޖަސް
ފާއިތުވި ދުވަސްތަކުގައި އީރާނުން އެމެރިކާއާ މުއާމަލާތްކުރަން މަސައްކަތްކޮށްފައިވާ ކަމަށް ބުނެ ފަތުރަމުންދާ ރިޕޯޓްތަކަކީ ކަނޑައެޅިގެން ދޮގެއް ކަމަށް ބުނެ، މައުލޫމާތު އެނގޭ މަސްދަރަކުން އެކަން ދޮގުކޮށްފިއެވެ.
އީރާނުގެ އިސް އޮފިޝަލަކު ތަސްނީމް ނިއުސް އެޖެންސީއަށް މައުލޫމާތު ދެމުން ވިދާޅުވީ، އީރާނާއި އެމެރިކާގެ ގުޅުމާ ބެހޭގޮތުން ދޮގު ޚަބަރު ފެތުރުމަށް މަޝްހޫރު "އެކްސިއޯސް" އިން، ތެހެރާނުން ދާދިފަހުން ވޮޝިންޓަނާ މުއާމަލާތްކުރަން އުޅުނު ކަމަށް ބުނެ ކުރި ރިޕޯޓަކީ ހަގީގަތާ ޚިލާފު ދޮގު ވާހަކައެއް ކަމަށެވެ.
އެ އޮފިޝަލް ފާހަގަކުރެއްވި ގޮތުގައި، އެމެރިކާގެ ރައީސް ޑޮނަލްޑް ޓްރަމްޕަށް ކުރިމަތިވަމުންދާ އަސްކަރީ އަދި އިގްތިސާދީ ފިއްތުންތައް އިތުރުވުމާ ގުޅިގެން، އޭނާ މިހާރު ހުންނެވީ ގޮތް ހުސްވެފައެވެ. އަދި ހަކަތައިގެ ބާޒާރަށް ނުފޫޒު ފޯރުވުމަށްޓަކައި، ސިޔާސީ މައިދާނުގައި މަޝްވަރާ ކުރުމުގެ ސިގްނަލްތަކެއް ޓްރަމްޕް ދެއްވަމުން ގެންދަވާ ކަމަށްވެސް އޭނާ ވިދާޅުވިއެވެ.
ނަމަވެސް، އީރާނުގެ ރައްޔިތުންނާ ދެކޮޅަށް ޓްރަމްޕް ހިންގަވާ އުދުވާނުތަކާއި އަސްކަރީ ހަރަކާތްތަކަށް އެއްވެސް މަޑުޖެހުމެއް ނާންނަ ކަމަށާއި، އެފަދަ އަމަލުތައް ދަނީ އިތުރުވަމުން ކަމަށް އެ މަސްދަރުން ބުނެފައިވެއެވެ.
މައުލޫމާތު ދިން އޮފިޝަލް ވިދާޅުވީ، ޓްރަމްޕް ވެވަޑައިގަންނަވާ ވައުދުތަކަށް އީރާނުގެ އެއްވެސް އިތުބާރެއް ނެތް ކަމަށެވެ. ސަބަބަކީ މީގެ ކުރިންވެސް މަޝްވަރާތައް ކުރިއަށްދަނިކޮށް، މަދުވެގެން ދެ ފަހަރަކު ޓްރަމްޕް މިފަދަ މަކަރުވެރި ރޭވުންތައް ރާވައި އީރާނަށް ހަމަލާދީފައިވާތީ ކަމަށް އޭނާ ވިދާޅުވިއެވެ.
އީރާނުގެ ގައުމީ ސަލާމަތާއި ސަރަހައްދީ ބައިވެރިންގެ ދިގުމުއްދަތުގެ މަސްލަހަތު ކަށަވަރުނުވާ އެއްވެސް އެއްބަސްވުމެއްގައި ސޮއިނުކުރާނެ ކަމަށާއި، ސަރަހައްދުގެ މަސްރަހު ހަނގުރާމައިގެ ކުރިން އޮތް ހާލަތަށް ދެން އެނބުރި ނުދާނެކަން އެ މަސްދަރުން ވަނީ ބަޔާންކޮށްފައެވެ.
މީގެ ކުރިން އީރާނުގެ ޚާރިޖީ ވަޒީރު އައްބާސް އަރާގްޗީ ވިދާޅުވީ، އެމެރިކާއާއި ޒަޔަނިސްޓް އިޒްރޭލުން ކުރިމަތިކުރި އުދުވާނީ ހަނގުރާމައާ ދެކޮޅަށް އީރާނުން ކުރަމުންދާ "ޝަރަފުވެރި އަދި ސާބިތުކަމާއެކީގައިވާ ދެކޮޅުވެރިކަމުގެ" ތެރެއިން، ހަމަލާ ބަދަލުކުރުން ހުއްޓާލުމަށް އީރާނުން އެދިފައިނުވާނެ ކަމަށެވެ.
ހޯމަ ދުވަހު ތެހެރާނުގައި ބޭއްވި ޚާރިޖީ ވުޒާރާގެ ހަފުތާގެ ނޫސްވެރިންގެ ބައްދަލުވުމުގެ ހަވާސާގައި ވާހަކަދައްކަވަމުން އަރާގްޗީ ވިދާޅުވީ، އެމެރިކާއާއި އިޒްރޭލުގެ އަސްކަރީ ކެމްޕޭން ފެށުނު ފަހުން، ހަމަލާ ބަދަލުކުރުން ހުއްޓާލުމަށް އެދި އީރާނުން އެއްވެސް މެސެޖެއް ފޮނުވާފައި ނުވާނެ ކަމަށެވެ.
އެމެރިކާއާއި އިޒްރޭލުގެ ދުޝްމަނުންނަށް މިހާރު ކުރިމަތިލާން ޖެހިފައިވަނީ ކިހާ ވަރުގަދަ ގައުމަކާކަން އެ ފަރާތްތަކަށް މިހާރު އިހުސާސް ކުރެވޭނެ ކަމަށް އޭނާ ވިދާޅުވިއެވެ. އަދި އަމިއްލަ ނަފްސު ދިފާއުކުރުމުގައި އީރާނުން ފަސްނުޖެހޭނެ ކަމަށާއި، ބޭނުންވާ މުއްދަތަކަށް ހަނގުރާމަ ކުރިއަށް ގެންދާނެ ކަމަށްވެސް އޭނާ ނިންމަވާލައްވަމުން ވިދާޅުވިއެވެ.
އެމެރިކާއާއި އިޒްރޭލުން އީރާނާ ދެކޮޅަށް ފުޅާދާއިރާއެއްގައި އުދުވާނީ އަސްކަރީ ކެމްޕޭނެއް ފަށާފައިވަނީ ފެބްރުއަރީ މަހުގެ 28 ވަނަ ދުވަހުއެވެ.
މި ހަމަލާތަކުގައި އީރާނުގެ އެކި ސަރަހައްދުތަކުގައި ހުރި އަސްކަރީ މަރުކަޒުތަކަށާއި އާންމުން ދިރިއުޅޭ ތަންތަނަށް ވައިގެ މަގުން ގިނަ ހަމަލާތަކެއް ދީފައިވާއިރު، މީގެ ސަބަބުން ގިނަ ބަޔަކު މަރުވެ، އުމްރާނީ ވަސީލަތްތަކަށް ބޮޑެތި ގެއްލުންތަކެއް ވަނީ ލިބިފައެވެ.
މީގެ ރައްދުގައި އީރާނުގެ ހަތިޔާރު އެޅި ފައުޖުތަކުން ވަނީ، އިޒްރޭލުން ހިފާފައިވާ ބިންތަކަށާއި ސަރަހައްދުގައި ހުރި އެމެރިކާގެ އަސްކަރީ މަރުކަޒުތަކަށް އަމާޒުކޮށް ގިނަ އަދަދެއްގެ މިސައިލާއި ޑްރޯން ބޭނުންކޮށްގެން ބަދަލުހިފުމުގެ ހަމަލާތަކެއް ދީފައެވެ.
