ލަރިޖާނީގެ ވަރުގަދަ ސުވާލެއް އިސްލާމީ އުންމަތަށް: "ކަލޭމެން ތިޔަ ތިބީ ކޮން ފަޅިއެއްގައި؟"

އެމެރިކާ އާއި އިޒްރޭލްއާ ދެކޮޅަށް ކުރަމުން އަންނަ ހަނގުރާމައިގައި އީރާން އިން ސާބިތުކަމާ އެކު ދެމި އޮންނާނެ ކަމަށް ވިދާޅުވެ، އީރާންގެ ސަލާމަތީ ކަންކަމާ ބެހޭ އިސްވެރިޔާ އަލީ ލަރިޖާނީ، އިސްލާމީ އުންމަތަށް ވަރުގަދަ މެސެޖެއް ފޮނުއްވައިފި އެވެ. 

އެގޮތުން ލަރިޖާނީ ވަނީ، އެމެރިކާ އާއި އިޒްރޭލް އިން އީރާން އަށް ހަމަލާ ތަކެއް އަމާޒުވީ ވަގުތު، އިސްލާމީ ޤައުމު ތަކުގެ ފަރާތުން އެކަށީގެންވާ އެއްބާރުލުމެއް ލިބިފައި ނުވާތީ އެކަމާ ހިތާމަ ކުރައްވާ ކަމަށް ވިދާޅުވެފަ އެވެ. 

އިސްލާމީ ޤައުމު ތަަކަށް ފާޑު ވިދާޅުވަމުން ލަރިޖާނީ ވިދާޅުވީ، ބައެއް ޤައުމު ތަކުން އީރާން އަކީ އެ ޤައުމު ތަކުގެ ދުޝްމަނުންގެ ގޮތުގައި ކަނޑައަޅާފައިވާ ކަމަށެވެ. އެ ޤައުމު ތަކުން އެގޮތަށް އަމަލު ކޮށްފައި ވަނީ، އެ ޤައުމު ތަކުގެ ސަރަހައްދުގައި ޤާއިމު ކޮށްފައިވާ އެމެރިކާގެ އަސްކަރީ މަރުކަޒު ތަކަށާއި، އެމެރިކާ އާއި އިޒްރޭލްގެ މަސްލަހަތު އޮތް ތަންތަނަށް އީރާން އިން ހަމަލާ ދިނުމާާ ގުޅިގެން ކަމަށް ވެސް އޭނާ ފާހަގަ ކުރެއްވި އެވެ. 

މެދު އިރުމަތީގައި ހުރި އެމެރިކާގެ އަސްކަރީ ބޭސް ތަކުގެ އިތުރުން، އެމްބަސީ ތަަކަށް ވެސް އީރާން އިން ވަނީ ހަމަލާ ދީފަ އެވެ. އެކަމަށް އިޝާރާާތް ކުރައްވައި ލަރިޖާނީ ވިދާޅުވީ، އަވަށްޓެރި ޤައުމު ތަކުގައި އެމެރިކާގެ އަސްކަރީ މަރުކަޒުތައް ހުރިއިރު، އީރާާން އިން އަތް އައްސައިގެން، ހިމޭޏުން އޮންނާނެ ކަމަށް އުންމީދު ކޮށްގެން ނުވާނެ ކަމަށެވެ. 

މީގެ އިތުރުން ލަރިޖާނީ ވިދާޅުވީ މިއަދު ކުރިމަތިވެފައިވާ ކުރިމަތިލުމަކީ އެއްކޮޅުން އެމެރިކާ އާއި އިޒްރޭލް އަދި އަނެއް ކޮޅުން މުސްލިމް އީރާން އާއި ފަލަސްޠީނުގެ މިނިވަން ކަމަށް މަސައްކަތް ކުރާ ބާރުތަކާ ދެމެދު ހިނގާ ހަނގުރާމައެއް ކަމަށެވެ. އެ މޭރުމުން ވާހަކަ ދައްކަވަމުން ލަރިޖާނީ ވަނީ އިސްލާމީ އުންމަތުގެ ޤައުމު ތަކަށް ވަރުގަދަ ސުވާލެއް އަމާޒު ކުރައްވައިފަ އެވެ. އެގޮތުން، އިސްލާމީ ޤައުމުތައް އޮތީ ކޮން ފަޅިއެއްގައިތޯ ސުވާލު އުފައްދަވައި، ލަރިޖާނީ ވަނީ އިސްލާމީ ޤައުމު ތަކުގެ އެއްބައިވަންތަ ކަަމަށް ގޮވާލައްވައިފަ އެވެ. 

ލަރިޖާނީ ވިދާޅުވީ އީރާާން އިން ސަރަހައްދީ ޤައުމު ތަކުގެ މައްޗަށް ބާރު ފޯރުވަން، ނުވަތަ ބާރުވެރި ކަމެއް ޤާއިމު ކުރަން ބޭނުން ނުވާ ކަމަށެވެ. އަދި އެމެރިކާ އަކީ އެއްވެސް އިތުބާރެއް އޮތްް ބައެއް ނޫން ކަމަށާއި، އިޒްރޭލް އަކީ ހަގީގަތުގައި ވެސް މުސްލިމް ޤައުމު ތަކުގެ ދުޝްމަނެއްކަން އެ ޤައުމު ތަަކަށް ވަރަށް ރަނގަޅަށް އިނގޭނެ ކަމަށް ވެސް ލަރިޖާނީ ވިދާޅުވި އެވެ.

އެމެރިކާ އާއި އިޒްރޭލްގެ ހަމަލާ ތަކުގެ ރައްދުގައި އީރާން އިން އެމެރިކާގެ އަސްކަރީ ތަން ތަނަށް ހަމަލާ ދީފައިވާއިރު، މެދު އިރުމަތީގެ ޤައުމު ތަކުން ވަނީ އީރާން ކުށްވެރި ކޮށްފަ އެވެ.