ކިއުބާ ހިފުމުގެ "ޝަރަފު" ލިބޭނެ ކަމަށް އުއްމީދު ކުރައްވާ ޓްރަމްޕް ވިދާޅުވެއްޖެ
އެމެރިކާގެ ދަތިކުރުމުގެ ފިޔަވަޅުތަކުގެ ސަބަބުން ކިއުބާއަށް ހަކަތައިގެ ބޮޑު ކާރިސާއަކާ ކުރިމަތިވެ، މުޅި ގައުމުން ކަރަންޓު ކެނޑިފައިވާ ދަނޑިވަޅެއްގައި، އެ ގައުމުގެ ވެރިކަން ބަދަލުކުރުމުގެ އިޝާރާތެއް ރައީސް ޓްރަމްޕް ވަނީ ދެއްވާފައި. ދެ ގައުމުގެ ދެމެދުގައި މަޝްވަރާތައް ކުރިއަށްދާއިރު، ކިއުބާގެ މިނިވަންކަމަށް އުނިކަން އަންނަ ފަދަ ފިޔަވަޅުތަކާ ދެކޮޅަށް ރަޝިޔާއިން ވަނީ ކަންބޮޑުވުން ފާޅުކޮށްފައި. ކިއުބާގެ ރައީސް ވިދާޅުވާ ގޮތުގައި އެމެރިކާގެ މި އަމަލުތަކަކީ އިންސާނީ ބޮޑު ކާރިސާއަކަށް މަގުފަހިވާ، ބައިނަލްއަގުވާމީ މިންގަނޑުތަކާ ޚިލާފު ކަންތައްތަކެއް.
މާރިޗު މަހުގެ 7 ވަނަ ދުވަހު މިއާމީއަށް ކުރެއްވި ދަތުރުފުޅުގައި، ރިޔާސީ މަތިންދާބޯޓު "އެއަރ ފޯސް ވަން" ގައި މީޑިއާގެ މަންދޫބުންނާ ރައީސް ޑޮނަލްޑް ޓްރަމްޕް ވާހަކަދައްކަވަނީ. | ގެޓީ އިމޭޖަސް
ކިއުބާއާ ބޭނުން ކޮންމެ ކަމެއް ކުރެވިދާނެ ކަމަށާއި، އެ ގައުމުގެ މައްޗަށް "ކޮންމެވެސް ސިފައެއްގައި" ވެރިވެގަތުމުގެ "ޝަރަފު" ލިބޭނެ ކަމަށް އުއްމީދު ކުރައްވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ.
އެމެރިކާގެ ތެލުގެ ބްލޮކޭޑް ނުވަތަ ދަތިކުރުމުގެ ފިޔަވަޅުތަކުގެ ސަބަބުން ކިއުބާއަށް ހަކަތައިގެ ބޮޑު ކާރިސާއަކާ ކުރިމަތިވެ، މުޅި ގައުމުން ކަރަންޓު ކެނޑެމުންދާ ދަނޑިވަޅެއްގައި، ވޮޝިންޓަނާއި ހަވާނާއާ ދެމެދު މަޝްވަރާތައް ކުރިއަށްދަނިކޮށް ޓްރަމްޕް މިމޭރުމުން ވާހަކަދެއްކެވީ ހޯމަ ދުވަހު ވައިޓް ހައުސްގެ އޯވަލް އޮފީހުގައެވެ.
"އަޅުގަނޑު ގަބޫލުކުރަނީ ކިއުބާ ހިފުމުގެ ޝަރަފު އަޅުގަނޑަށް ލިބޭނެ ކަމަށް. އެއީ ވަރަށް ބޮޑު ޝަރަފެއް،" ޓްރަމްޕް ވިދާޅުވިއެވެ. އަދި އިތުރަށް ވިދާޅުވީ "ކޮންމެވެސް ސިފައެއްގައި ކިއުބާގެ މައްޗަށް ވެރިވެގަންނާނެ،" ކަމަށެވެ.
ނޫސްވެރިން ސުވާލު ކުރުމުން ޓްރަމްޕް ވިދާޅުވީ، ކިއުބާއާ މެދު އެމެރިކާއަށް ތަފާތު ފިޔަވަޅުތައް އެޅިދާނެ ކަމަށެވެ. "އެ ގައުމު މިނިވަން ކުރިޔަސް ނުވަތަ ހިފިޔަސް، ތެދަށް ބުނާނަމަ އެ ގައުމާ މެދު އަޅުގަނޑު ބޭނުން ކޮންމެ ކަމެއް ކުރެވިދާނެ ކަމަށް އަޅުގަނޑު ދެކެން،" އިތުރު ތަފްސީލެއް ނުދެއްވައި ޓްރަމްޕް ވިދާޅުވިއެވެ.
ޓްރަމްޕް މިހެން ވިދާޅުވިއިރު، ތެލުގެ ދަތިކަމުގެ ސަބަބުން ކިއުބާގެ ދުވަސްވީ އިންޖީނުގެތަކަށް ބާރުބޮޑުވެ، ހޯމަ ދުވަހު މުޅި ގައުމުން ވަނީ ކަރަންޓު ކެނޑިފައެވެ. މީގެ ސަބަބުން ގާތްގަނޑަކަށް 11 މިލިއަން މީހުން ތިބީ ކަރަންޓާ ނުލައެވެ.
އެމެރިކާގެ ރައީސްގެ މި ވާހަކަތަކާ ގުޅިގެން ނިއުޔޯކް ޓައިމްސް އިން ރިޕޯޓުކޮށްފައިވާ ގޮތުގައި، ދެ ގައުމުގެ ދެމެދުގައި ކުރިއަށްދާ މަޝްވަރާތަކުގައި ކިއުބާގެ ރައީސް މިގޭލް ޑިއާޒް-ކާނެލް މަގާމުން ދުރުކުރުމަކީ އެމެރިކާގެ މައިގަނޑު އެއް އަމާޒު ކަމަށް އެމެރިކާގެ އޮފިޝަލުން ވަނީ އިޝާރާތް ކުރައްވާފައެވެ. ނަމަވެސް ވޮޝިންޓަނުން ރަސްމީކޮށް މިކަން ކަށަވަރުކޮށްދީފައެއް ނުވެއެވެ.
މިއީ ފާއިތުވި 10 އަހަރަށްވުރެ ގިނަ ދުވަހުގެ ތެރޭގައި، ވޮޝިންޓަނާއެކު ރަސްމީ މަޝްވަރާތަކެއް ކުރިއަށްދާކަން ހަވާނާއިން އާންމުކޮށް އެއްބަސްވި ފުރަތަމަ ފަހަރެވެ. މި މަޝްވަރާތައް ފެށިފައި މިވަނީ، އެމެރިކާއިން ވެނެޒުއޭލާގެ ރައީސް ނިކޮލަސް މަދޫރޯ ހައްޔަރުކުރުމާ ގުޅިގެން ވެނެޒުއޭލާއިން ކިއުބާއަށް ފޮނުވާ ތެޔޮ ހުއްޓި، އަދި އެހެން ގައުމުތަކުން ތެޔޮ ހޯދުމަށް އެމެރިކާއިން ހުރަސްއެޅުމުގެ ސަބަބުން ކިއުބާގައި ކަރަންޓު ކެނޑުމާއި ތެލުގެ ދަތިކަން ކުރިމަތިވެ، ރައްޔިތުންގެ ނުރުހުން އިންތިހާއަށް ބޮޑުވެފައިވާ ދަނޑިވަޅެއްގައެވެ.
ޓްރަމްޕް ވަނީ ކިއުބާއަށް ތެޔޮ އެތެރެކުރުން މުޅިން ހުއްޓުވާލާނެ ކަމުގެ އިންޒާރު ތަކުރާރުކޮށް ދެއްވައި، އެ ގައުމަށް ސާފުނުކުރާ ތެޔޮ ވިއްކާ ގައުމުތަކަށް ޓެރިފް ނުވަތަ ޑިއުޓީގެ ފިޔަވަޅުތައް ކުރިމަތިވާނެ ކަމަށް ވިދާޅުވެފައެވެ.
ކިއުބާގެ ރައީސް ޑިއާޒް-ކާނެލް މިދިޔަ ހަފުތާގައި ވިދާޅުވީ، ވޮޝިންޓަނާއެކު ކުރެވޭ ކޮންމެ މަޝްވަރާއެއް ބިނާވާންވާނީ ދެ ގައުމުގެ ސިޔާސީ ނިޒާމަށް އިހުތިރާމްކުރުމާއި ހަމަހަމަކަމުގެ މައްޗަށް ކަމަށެވެ. އަދި ގައުމުގެ މިނިވަންކަމާއި އަމިއްލަ އިޚުތިޔާރު ދެމެހެއްޓުމުގެ މުހިންމުކަން އޭނާ ފާހަގަކުރެއްވިއެވެ. މީގެ އިތުރުން، އެމެރިކާގެ "ނުބައި" ބްލޮކޭޑްގެ ސަބަބުން ފާއިތުވި ތިން މަސް ދުވަހު ކިއުބާއަށް އެއްވެސް ތެލެއް ލިބިފައިނުވާ ކަމަށާއި، މީގެ ސަބަބުން ބޭސްފަރުވާ ބޭނުންވާ ކުޑަކުދިން ހިމެނޭހެން ގިނަ ބަޔަކަށް އޭގެ ނޭދެވޭ އަސަރުކޮށްފައިވާ ކަމަށް އޭނާ ވިދާޅުވިއެވެ.
އެމެރިކާއިން ކިއުބާއާ ދެކޮޅަށް އަޅާފައިވާ އިގްތިސާދީ ދަތިކުރުމުގެ ފިޔަވަޅުތައް ކުށްވެރިކޮށް، ރަޝިޔާއިން ވަނީ އެއީ ޣައިރު ގާނޫނީ އަދި ސަރަހައްދީ ހަމަޖެހުން ގެއްލުވާލާ ފިޔަވަޅުތަކެއް ކަމަށް ބުނެފައެވެ. ރަޝިޔާގެ ފޮރިން މިނިސްޓަރު ސަރްގޭ ލަވްރޯވް ވިދާޅުވީ، ކިއުބާގެ މިނިވަންކަން ދިފާއުކުރުމުގައި "އުޚުއްވަތްތެރި ކިއުބާގެ ރައްޔިތުންނަށް" މޮސްކޯއިން ތާއީދުކުރާ ކަމަށެވެ.
