އިރާނުގެ އިންޒާރު: ސަރަހައްދުން "ތެޔޮ ލީޓަރެއް" ވެސް ބޭރު ވިޔަ ނުދީ ހިފަހައްޓަފާނަން

އިރާނުގެ އިންފްރާސްޓްރަކްޗާއަށާއި އެ ގައުމަށް އަމާޒުކޮށް އެމެރިކާގެ އަސްކަރިއްޔާއާއި އިޒްރޭލުން ދެމުންދާ ހަމަލާތައް ކުރިއަށްދާނަމަ، އެ ސަރަހައްދުން "ތެޔޮ ލީޓަރެއް" ވެސް ބޭރުވިޔަ ނުދިނުމަށް އަޅަންޖެހޭ ފިޔަވަޅުތައް އަޅާނެ ކަމުގެ އިންޒާރު އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ) ގެ ތަރުޖަމާނު ދެއްވައިފިއެވެ.

އެއްވެސް އުދުވާނަކާ ނުލައި އެމެރިކާއާއި ޒަޔަނިސްޓް އިޒްރޭލުން އިރާނާ ދެކޮޅަށް ފަށާފައިވާ ހަނގުރާމައަށް 10 ދުވަސް ފުރުނުއިރު، ޖެނެރަލް އަލީ މުހައްމަދު ނައީނީ ހޯމަ ދުވަހުގެ ރޭ ވިދާޅުވީ، އެމެރިކާގެ ރައީސް ޑޮނަލްޑް ޓްރަމްޕަކީ ދޮގުވެރިއެއް ކަމަށާއި، އޭނާ އިރާނުގެ އަސްކަރީ ބާރު ކެނޑިފައިވާ ކަމަށް ބުނެ ދޮގު ހަދަނީ ހަނގުރާމައިގެ ފިއްތުންތަކުން ސަލާމަތްވުމަށާއި، އެ ސަރަހައްދުގައި ތިބި އެމެރިކާ ސިފައިންގެ މާޔޫސްކަން ފޮރުވުމަށް ކަމަށެވެ.

ޖެނެރަލް ނައީނީ ވިދާޅުވީ، މުޖުރިމު ޓްރަމްޕް ހަނގުރާމައިގައި ލަދުވެތި ނާކާމިޔާބީތަކަކާ ކުރިމަތިލާން ޖެހުމުން، މިހާރު މަސައްކަތް ކުރަނީ ހަނގުރާމައިގެ މައިދާނުގައި ކާމިޔާބީތަކެއް ހޯދާފައިވާ ކަމަށް ދައްކައިގެން އާންމު ރައްޔިތުންގެ ޚިޔާލު އޮޅުވާލައި، ނަފްސާނީ ފިއްތުންތަކުން ރެކުމަށް ކަމަށެވެ. އަދި ޓްރަމްޕްގެ ފަރާތުން ފެންނަނީ ހުސް ދޮގު ކަމަށާއި، ވިޔަފާރި އުޅަނދުތަކާއި އަސްކަރީ މަނަވަރުތައް ހޯރްމޫޒް ކަނޑުއޮޅިން ފަސޭހަކަމާއެކު ދަތުރުކުރާ ކަމަށް އޭނާ ބުނާއިރު، އެމެރިކާގެ މަނަވަރުތަކާއި ހަނގުރާމަމަތީ ބޯޓުތައް ވަނީ އިރާނުގެ ބާރުގަދަ މިސައިލްތަކާއި ޑްރޯންތަކުގެ ނުރައްކަލުން ސަލާމަތްވުމަށްޓަކައި 1،000 ކިލޯމީޓަރަށްވުރެ ދުރަށް ފަހަތަށް ޖެހިފައި ކަމަށް ވެސް އޭނާ ވިދާޅުވިއެވެ.

ތަރުޖަމާނު އިތުރަށް ވިދާޅުވީ، ޓްރަމްޕްގެ ކަނޑުގެ ސިފައިންނަކީ ފިނޑި ބައެއް ކަމަށާއި، އެމެރިކާގެ މަނަވަރު "ޔޫއެސްއެސް އަބްރަހަމް ލިންކަން" އަށް ހަތަރު މިސައިލް ފޮނުވާލުމާއެކު، އެމީހުން ވަނީ 1،000 ކިލޯމީޓަރަށްވުރެ ދުރަށް ދުވެފައި ކަމަށެވެ.

އެ ސަރަހައްދުގައި ތިބި އެމެރިކާ ސިފައިން ތިބީ ވަރަށް ރަނގަޅު ހާލަތެއްގައި ކަމަށް ޓްރަމްޕް ވިދާޅުވި ނަމަވެސް، އެމެރިކާގެ އަސްކަރީ މަރުކަޒުތަކުން ފިލައިގެން ގޮސް އެމެރިކާ ސިފައިން މިހާރު އުޅެނީ ރެފިއުޖީންގެ ގޮތުގައި އެކި ސިޓީތަކުގެ ހޮޓާތަކުގައި ކަމަށް ނައީނީ ވިދާޅުވިއެވެ. އަދި އިޒްރޭލު ސިފައިން އާންމު ރައްޔިތުންނާއި މަދަނީ ވަސީލަތްތަކުގެ ފަހަތުގައި ފިލައި ތިބެ، އާންމުން އިންސާނީ އައްޑަނައެއްގެ ގޮތުގައި ބޭނުންކުރަމުންދާ ކަމަށް ވެސް އޭނާ ފާހަގަކުރެއްވިއެވެ.

އައިއާރުޖީސީގެ ތަރުޖަމާނު ވިދާޅުވީ، އިރާނުން މިސައިލް ފޮނުވުން މަދުވެއްޖެ ކަމަށް ޓްރަމްޕް ވިދާޅުވި ނަމަވެސް، އިރާނުގެ މިސައިލްތައް މިހާރު މާ ބާރުގަދަ ކަމަށެވެ. އަދި ހަނގުރާމަ ފެށުނުއިރު ބޭނުންކުރި މިސައިލްތަކަށްވުރެ ބަރު، އެއް ޓަނަށްވުރެ ބަރު ހަނގުރާމަވެރި ބޯލްޓްތަކާއެކު އެމެރިކާގެ މަރުކަޒުތަކަށާއި ޒަޔަނިސްޓް އިޒްރޭލަށް މިސައިލް ހަމަލާތައް ދެމުންދާ ކަމަށް އޭނާ ވިދާޅުވިއެވެ.

އިޒްރޭލުން ހިފާފައިވާ ބިންތަކުގައި މެދުނުކެނޑި ނުރައްކަލުގެ ސައިރަންގެ އަޑު އިވެމުންދިއުމާއި، އިޒްރޭލުގެ ރައްޔިތުން ބަންކަރުތަކުގައި ފިލައި ތިބެންޖެހުމުގެ އިތުރުން، އެއާޕޯޓްތަކުން އެމީހުން ފިލައިގެންދާ މަންޒަރުން ބިމުގެ ހަގީގަތް މާ ސާފުކޮށް ފެންނަން އޮތް ކަމަށް ވެސް އޭނާ ވިދާޅުވިއެވެ.

ޖެނެރަލް ނައީނީ ފާހަގަކުރެއްވި ގޮތުގައި، އިރާނުގެ ރައްޔިތުން ސަރުކާރާ ދެކޮޅަށް މަގުތަކަށް ނެރެ، އިޖުތިމާއީ ހަލަބޮލިކަމެއް ގެނައުމަށް ޓްރަމްޕް ކުރި މަސައްކަތް ވަނީ ނާކާމިޔާބުވެފައެވެ. އޭގެ ބަދަލުގައި މިއަދު ފެންނަނީ ހޭލުންތެރި އިރާނު ރައްޔިތުން މަގުތަކަށް ނުކުމެ ޓްރަމްޕާއި މުޖުރިމު ނަތަންޔާހޫއަށް ނަފްރަތުކޮށް، ބަދަލުހިފުމުގެ ރޫހެއްގައި ތިބި މަންޒަރު ކަމަށް އޭނާ ވިދާޅުވިއެވެ.

އިރާނުގެ އިސް ވެރިންނާއި އަސްކަރީ ކޮމާންޑަރުން އަވަހާރަކޮށްލައިގެން، ވަރަށް އަވަހަށް އަދި އަގުހެޔޮކޮށް އިރާނުގެ ސަރުކާރު ބަލިކޮށްލުމަށް ޓްރަމްޕް ރޭވި ނަމަވެސް، އިރާނުގެ ރޫހާނީ ލީޑަރުގެ ހަރުދަނާ ނިންމެވުންތަކާއި އަސްކަރީ ކޮމާންޑަރުން ހަނގުރާމަ މެނޭޖްކުރާ ގޮތުން އެމެރިކާ ވަނީ މާޔޫސްވެފައި ކަމަށް ތަރުޖަމާނު ވިދާޅުވިއެވެ. އަދި އިރާނުގެ ސަރުކާރު ވައްޓާލެވިދާނެ ކަމަށް ޓްރަމްޕްގެ ބައިވެރިން ކުރި އުންމީދު ވެސް މިހާރު ގެއްލިފައިވާ ކަމަށް އޭނާ ވިދާޅުވިއެވެ.

ޓްރަމްޕް ބޭނުންވާ ގޮތަށް އިރާނުގެ ލީޑަރަކު އައްޔަންކުރުމަށް ނުފޫޒު ފޯރުވޭނެ ކަމަށް އޭނާ ދައުވާ ކުރި ނަމަވެސް، މިއަދު އިންތިޚާބުވެފައިވަނީ އެމެރިކާއާ ދެކޮޅު، އިންގިލާބީ ޝަޚްސިއްޔަތެއް ކަމަށާއި، ލޮބުވެތި ޚާމަނާއީ މިހާރު މާ ޒުވާންވެފައިވާ ކަމަށް ވެސް ނައީނީ ވިދާޅުވިއެވެ.

ޖެނެރަލް ވިދާޅުވީ، ޓްރަމްޕް މި ހަނގުރާމަ ފެށީ އެމެރިކާގެ ރައްޔިތުންނަށް ދޮގު ހަދައިގެން ކަމަށާއި، ނަމަވެސް އިރާނުގެ ރައްދު ހަމަލާތަކުގެ ސަބަބުން އޭނާ މިހާރު ހުރީ ގޮތް ހުސްވެފައި ކަމަށެވެ. ހަނގުރާމައިގެ ކުރިން ތެލުގެ އަގު ކޮންޓްރޯލް ކުރާނެ ކަމަށް ޓްރަމްޕް ބުނި ނަމަވެސް، ހަނގުރާމައިގެ ފުރަތަމަ ނުވަ ދުވަހުގެ ތެރޭގައި ތެލުގެ އަގު ދެގުނަވެފައިވާ ކަމަށާއި، މިހާރު އޭނާ މަސައްކަތް ކުރަނީ އޭނާގެ ބައިވެރިންނަށްޓަކައި ތެލުގެ އަގު އާޓިފިޝަލްކޮށް ހިފެހެއްޓުމަށް ކަމަށް ވެސް އޭނާ ވިދާޅުވިއެވެ.

އެމެރިކާގެ އަސްކަރިއްޔާއާއި އިޒްރޭލުން އިރާނުގެ ރައްޔިތުންނަށާއި އިންފްރާސްޓްރަކްޗާއަށް ދެމުންދާ ހަމަލާތައް ހުއްޓާނުލާހާ ހިނދަކު، އެ ސަރަހައްދުން އެންމެ ތެޔޮ ލީޓަރެއް ވެސް ބޭރުވިޔަ ނުދޭނެ ކަމަށް އޭނާ ވިދާޅުވިއެވެ. އަދި ތެލާއި ގޭހުގެ އަގު ކޮންޓްރޯލް ކުރުމަށް އެމީހުން ކުރާ މަސައްކަތަކީ ވަގުތީ އަދި އެއްވެސް ނަތީޖާއެއް ނުނިކުންނާނެ މަސައްކަތެއް ކަމަށް ވެސް ވިދާޅުވިއެވެ.

ތަރުޖަމާނު ވިދާޅުވީ، ޕާޝިއަން ގަލްފް ސަރަހައްދުގައި ހުރި އެމެރިކާގެ ހުރިހާ އަސްކަރީ ވަސީލަތްތަކެއް ސުންނާފަތިވެފައިވާކަން އެމެރިކާގެ ރައްޔިތުންނަށް އެނގުމަށް ޓްރަމްޕް ބޭނުންނުވާ ކަމަށެވެ.

އެ ސަރަހައްދުގައި ހުރި އެމެރިކާގެ އެންމެ ޒަމާނީ 10 ރާޑަރު ސިސްޓަމް ހަލާކުކޮށްލާފައިވާ ކަމަށާއި، އެމެރިކާގެ އަގުބޮޑު އެތައް ޑްރޯނެއް އިރާނުގެ ވައިގެ ދިފާއީ ނިޒާމުން ވައްޓާލާފައިވާ ކަމަށް ނައީނީ ވިދާޅުވިއެވެ. އަދި ހަނގުރާމަ ވަރުގަދަ ކުރުމުގެ ފުރުސަތު އިރާނަށް އެބައޮތް ކަމަށާއި، އެންމެންނަށް ސަލާމަތްތެރިކަން ނެތް ނަމަ އެކަކަށް ވެސް ސަލާމަތްތެރިކަމެއް ނޯންނާނެ ކަމަށް އޭނާ ވިދާޅުވިއެވެ. ހަނގުރާމަ ނިމޭނެ ގޮތް ނިންމާނީ އިރާނުން ކަމަށް ވެސް އޭނާ އިތުރަށް ވިދާޅުވިއެވެ.

އިރާނުގެ އަސްކަރިއްޔާއިން ތިބީ ހޯރްމޫޒް ކަނޑުއޮޅިން އެމެރިކާގެ މަނަވަރުތަކާއި "ޔޫއެސްއެސް ޖެރަލްޑް ފޯޑް" އަންނާނެ ވަގުތެއްގެ އިންތިޒާރުގައި ކަމަށް އޭނާ އިންޒާރު ދެއްވިއެވެ. ހަނގުރާމައިގެ މައިދާނުގެ ކަންކަން ނިންމުމުގެ ބާރު އޮތީ އިރާނުގެ އަތްމަތީގައި ކަމަށާއި، އެމެރިކާ ސިފައިންނަށް މި ހަނގުރާމަ ނިންމާލުމުގެ ފުރުސަތެއް ނުލިބޭނެ ކަމަށް ވެސް އޭނާ ވިދާޅުވިއެވެ.

އިރާނުގެ މިސައިލްތައް ހުސްވެއްޖެ ކަމަށާއި އޭގެ ބާރު ކެނޑިއްޖެ ކަމަށް ޓްރަމްޕް ވިދާޅުވާއިރު، އެއީ ތެދެއް ނަމަ ނޫސްވެރިންނަށް އެ ސަރަހައްދުތަކަށް ގޮސް ލިބިފައިވާ ގެއްލުންތަކުގެ ފޮޓޯ ނެގުމަށް ފުރުސަތު ނުދެނީ ކީއްވެގެންތޯ އާއި، މަރުވި މީހުންގެ އަދަދުތައް ފޮރުވަނީ ކީއްވެގެންތޯ ނައީނީ ސުވާލު ކުރެއްވިއެވެ.