ޓްރަމްޕް ނައްތާލަފާނެ ކަމުގެ އިންޒާރު އީރާނުން ދީފި

އީރާނުގެ ނޭޝަނަލް ސެކިއުރިޓީ ކައުންސިލްގެ ސެކްރެޓަރީ އަލީ ލަރިޖާނީ، އެމެރިކާގެ ރައީސް ޑޮނަލްޑް ޓްރަމްޕަށް އިންޒާރު ދެއްވައި، އީރާނަކީ ބިރުދެއްކުންތަކަށް ޖެހިލުންވާނެ ގައުމެއް ނޫން ކަމަށާއި، އަމިއްލަފުޅަށް ސަލާމަތްވެވަޑައިގަތުމަށް މަސައްކަތްޕުޅު ކުރެއްވުމަށް ގޮވާލައްވައިފިއެވެ.

އަންގާރަ ދުވަހު އެކްސްގައި ކުރެއްވި ޕޯސްޓެއްގައި ލަރިޖާނީ ވަނީ، އީރާނަށް ބިރުދައްކަވަމުން ގެންދަވާ ޑޮނަލްޑް ޓްރަމްޕަށް ވަރުގަދަ ރައްދެއް ދެއްވާފައެވެ.

އޭނާ ވިދާޅުވީ، އާޝޫރާގެ ފިލާވަޅުތަކުން ހިތްވަރު ލިބިގަނެގެން ތިބި އީރާނުގެ ކެރޭ ރައްޔިތުންނަކީ، އެމެރިކާގެ ރައީސް ދައްކަވާ އެއްވެސް އަސާސެއް ނެތް ބިރުދެއްކުންތަކަށް ބިރުގަންނާނެ ބައެއް ނޫން ކަމަށެވެ.

ލަރިޖާނީ ޓްރަމްޕަށް މުޚާތަބު ކުރައްވައި ވިދާޅުވީ، ޓްރަމްޕަށް ވުރެ މާ ވަރުގަދަ ފަރާތްތަކުން ވެސް އީރާނު ނައްތާލުމަށް ކުރި މަސައްކަތް ނާކާމިޔާބުވެފައިވާ ކަމަށެވެ.

އީރާނުގެ ސަލާމަތީ އިސް އޮފިޝަލް އެމެރިކާގެ ރައީސަށް އިންޒާރު ދެއްވަމުން ވިދާޅުވީ، ޓްރަމްޕް ނައްތާލެވިދާނެ ކަމަށާއި، އެކަމަށްޓަކައި ސަމާލުވެވަޑައިގަތުމަށެވެ.

ލަރިޖާނީ މިފަދައިން ވިދާޅުވީ، ހޯރްމޫޒް ކަނޑުއޮޅިން ތެޔޮ އުފުލުން އީރާނުން ހުއްޓުވައިފި ނަމަ، އެ ގައުމަށް މިހާތަނަށް ދީފައިވާ ހަމަލާތަކަށް ވުރެ "20 ގުނަ ވަރުގަދަ" ހަމަލާއެއް ދޭނެ ކަމަށް ޓްރޫތު ސޯޝަލްގައި ޓްރަމްޕް ވިދާޅުވުމާ ގުޅިގެންނެވެ.

ޓްރަމްޕްގެ ޕޯސްޓުގައި ބުނެފައިވަނީ، އެ ކަނޑުއޮޅިން ތެޔޮ ބޭރުކުރުން ހުއްޓުވުމަށް އީރާނުން އެއްވެސް ކަމެއް ކޮށްފި ނަމަ، އެމެރިކާއިން އެ ގައުމަށް މިހާތަނަށް ދީފައިވާ ހަމަލާތަކަށް ވުރެ 20 ގުނަ ވަރުގަދަ ހަމަލާއެއް ދޭނެ ކަމަށެވެ. މީގެ އިތުރުން، އީރާނަކީ އަލުން އާރާާސްތު ނުކުރެވޭނެ ފަދަ ގައުމަކަށް ހެދުމަށްޓަކައި، ފަސޭހައިން ހަލާކުކޮށްލެވޭނެ އަމާޒުތަކަށް ހަމަލާދީ، މަރާއި އަލިފާނާއި ނުރައްކާތެރިކަން އެ ގައުމަށް ކުރިމަތިކުރުވާނެ ކަމަށް ވެސް ޓްރަމްޕް ވަނީ ވިދާޅުވެފައެވެ. ނަމަވެސް އެފަދަ ކަމެއް ނުވުމަށް އުންމީދުކުރާ ކަމަށް ވެސް އޭނާ ވިދާޅުވިއެވެ.

ފެބްރުއަރީ 28 ވަނަ ދުވަހު އީރާނުގެ ރޫހާނީ ލީޑަރު އާޔަތުﷲ ސައްޔިދު އަލީ ޚާމަނާއީ އާއި، ސިފައިންގެ އިސް ކޮމާންޑަރުންތަކެއް އަދި އާންމުންގެ ބަޔަކު އަވަހާރަކޮށްލުމާ ގުޅިގެން، އެމެރިކާ އާއި ޒަޔަނިސްޓް އިޒްރޭލުން ވަނީ އީރާނާ ދެކޮޅަށް ފުޅާ ދާއިރާއެއްގައި އަސްކަރީ ކެމްޕޭނެއް ފަށާފައެވެ.

މި ހަމަލާތަކުގައި އީރާނުގެ އެކި ސަރަހައްދުތަކުގެ އަސްކަރީ އަދި އާންމުން ދިރިއުޅޭ ތަންތަނަށް ވައިގެ މަގުން ވަރުގަދަ ހަމަލާތަކެއް ދީފައިވާއިރު، މީގެ ސަބަބުން ގިނަ ބަޔަކު މަރުވެ، ގައުމުގެ އުމްރާނީ ވަސީލަތްތަކަށް ބޮޑެތި ގެއްލުންތަކެއް ވަނީ ލިބިފައެވެ.

މިކަމުގެ ރައްދުގައި އީރާނުގެ ހަތިޔާރު އެޅި ފައުޖުތަކުން ވަނީ، އިޒްރޭލުން ހިފާފައިވާ ބިންތަކަށާއި ސަރަހައްދީ ބޭސްތަކުގައި ތިބި އެމެރިކާގެ ސިފައިންނަށް އަމާޒުކޮށް، ގިނަ އަދަދެއްގެ މިސައިލާއި ޑްރޯން ބޭނުންކޮށްގެން ބަދަލުހިފުމުގެ އޮޕަރޭޝަންތަކެއް ހިންގާފައެވެ.