ޓްރަމްޕް: އީރާނުގެ އާ ލީޑަރަށް އެމެރިކާގެ ރުހުން ބޭނުންވާނެ، ނޫނީ މާ ގިނަ ދުވަހަކު ނުހުންނާނެ
8 މާރިޗު 2026 | އާދީއްތަ 16:28ޓްރަމްޕް މިހެން ވިދާޅުވީ އީރާނުގެ އާ ލީޑަރަކު ހޮވުމުގެ މަސައްކަތް އެ ގައުމުގެ ދީނީ އިލްމުވެރިންގެ މަޖިލީހުން ނިންމާފައިވާ ކަމުގެ ރިޕޯޓުތައް ފެންމަތިވެފައިވާ ދަނޑިވަޅެއްގައި. އޭބީސީ ނިއުސްއަށް ދެއްވި ބަސްދީގަތުމެއްގައި ޓްރަމްޕް ވަނީ އެމެރިކާގެ ރުހުން ނެތް ބޭފުޅަކަށް އެ މަގާމުގައި ގިނަ ދުވަހަކު ނުހުރެވޭނެ ކަމަށް ތަކުރާރުކޮށް ވިދާޅުވެފައި.
މިއާމީ އިންޓަނޭޝަނަލް އެއާޕޯޓަށް ވަޑައިގަތުމަށްފަހު، ރައީސް ޑޮނަލްޑް ޓްރަމްޕް އެއާފޯސް ވަން މަތިންދާބޯޓުން ފައިބައިވަޑައިގަންނަވަނީ. | އޭއެފްޕީ
އެމެރިކާގެ ރައީސް ޑޮނަލްޑް ޓްރަމްޕް ވިދާޅުވި ގޮތުގައި، ވައިގެ ހަމަލާއެއްގައި އަވަހާރަކޮށްލާފައިވާ އާޔަތުﷲ އަލީ ޚާމަނާއީގެ ބަދަލުގައި އީރާނުން ކަނޑައަޅާ އާ އެންމެ މަތީ ވެރިޔާއަށް، އެމެރިކާގެ ރުހުން ނުލިބިއްޖެ ނަމަ އެ މަގާމުގައި ގިނަ ދުވަހަކު ދެމިއެއް ނުހުރެވޭނެއެވެ.
އޭބީސީ ނިއުސްއަށް ދެއްވި ބަސްދީގަތުމެއްގައި ޓްރަމްޕް ވިދާޅުވީ، އީރާނުގެ އާ ލީޑަރަކަށް ވާންޖެހޭނީ އެމެރިކާގެ ރުހުން ލިބިފައިވާ ފަރާތަކަށް ކަމަށެވެ. އަދި އެމެރިކާގެ ރުހުން ނެތި އެ މަގާމަށް އަންނަ ބޭފުޅަކަށް އެ މަގާމުގައި ގިނަ ދުވަހު ނުހުރެވޭނެ ކަމަށް ވެސް ޓްރަމްޕް ތަކުރާރުކޮށް ވިދާޅުވިއެވެ.
ޓްރަމްޕް މިހެން ވިދާޅުވެފައި މިވަނީ، އަވަހާރަކޮށްލާފައިވާ އީރާނުގެ ރޫހާނީ ލީޑަރު އަލީ ޚާމަނާއީގެ ބަދަލުގައި އެ މަގާމަށް އަންނާނެ ބޭފުޅަކު ހޮވުމުގެ ޒިންމާ އޮންނަ އީރާނުގެ ދީނީ އިލްމުވެރިންގެ މަޖިލީހުން، އާ ލީޑަރަކު ހޮވުމަށް ވޯޓުލައި ނިންމާފައިވާ ކަމަށާއި، ވަރަށް އަވަހަށް އެ ބޭފުޅެއްގެ ނަން އިއުލާން ކުރާނެ ކަމުގެ ރިޕޯޓުތައް ފެންމަތިވެފައިވާ ދަނޑިވަޅެއްގައެވެ.
